قازاقستان ازاماتى جاپونياداعى ۋنيۆەرسيتەتتىڭ ۆيتسە-پرەزيدەنتى بولىپ تاعايىندالدى

بۇل تۋرالى ق ر عىلىم جانە جوعارى ءبىلىم مينيسترلىگى باسپا ءسوز قىزمەتىنىڭ باسشىسى ولجاس بەركىنبايەۆ Facebook پاراقشاسىندا مالىمدەدى.

APU ۋنيۆەرسيتەتى جاپونيانىڭ بەپپۋ قالاسىندا ورنالاسقان.

بۇل تاعايىنداۋ تاريحي وقيعا دەسەك تە بولادى. سەبەبى، جاپونيانىڭ جوعارى وقۋ ورنىنىڭ باسشىلىق قۇرامىنا تۇڭعىش رەت قازاقستان ازاماتى جوعارى ءارى جاۋاپتى لاۋازىمعا كوتەرىلىپ وتىر. بۇل جايت پروفەسسور س. مەيىرمانوۆتىڭ كاسىبي جانە تۇلعالىق قاسيەتتەرىنىڭ جوعارى دەڭگەيدە ەكەنىن عانا ەمەس، سونىمەن قاتار قازاقستاندىق عىلىم مەن ءبىلىم بەرۋ جۇيەسىنىڭ حالىقارالىق دەڭگەيدە مويىندالىپ كەلە جاتقانىن كورسەتەدى.

ۆيتسە-پرەزيدەنت لاۋازىمىنا تاعايىندالعانعا دەيىن پروفەسسور سەرىك قاسىمحان ۇلى APU ۋنيۆەرسيتەتىندە اكادەميالىق ىستەر جونىندەگى دەكان (Dean of Academic Affairs) قىزمەتىن ءۇش جىل بويى تابىستى اتقاردى. وسى كەزەڭدە ول وقۋ باعدارلامالارى مەن ۋنيۆەرسيتەتتەگى اكادەميالىق ورتانىڭ دامۋىنا ەلەۋلى ۇلەس قوستى. ونىڭ باي تاجىريبەسى مەن بىلىكتىلىگى (MD ،PhD) ونى جاڭا باسشىلىق قىزمەتكە لايىق ەتتى.

پروفەسسور مەيىرمانوۆ جوعارى مەديتسينالىق ءبىلىمدى قازاقستاندا العان.

PhD دارەجەسىن جاپونيادا قورعاعان. بۇل ونىڭ تۋعان ەلىمەن دە، قازىرگى كاسىبي قىزمەت اتقارىپ جۇرگەن ەلىمەن دە تەرەڭ اكادەميالىق بايلانىستا ەكەنىن كورسەتەدى.

ايتا كەتەرلىك جايت - پروفەسسور مەيىرمانوۆ قازاقستاننىڭ عىلىمي سالاسىن دامىتۋعا دا بەلسەندى اتسالىسىپ كەلەدى. ول قازاقستان پرەزيدەنتى جانىنداعى ۇلتتىق عىلىم جانە تەحنولوگيالار كەڭەسىنىڭ بەلسەندى مۇشەسى، سونداي-اق ۇلتتىق عىلىمي كەڭەستە شەتەلدىك ساراپشى رەتىندە جۇمىس ىستەيدى.

ريتسۋمەيكان ازياتتىق-تىنىق مۇحيت ۋنيۆەرسيتەتى (APU) بۇكىل الەمدە ءوزىنىڭ شىنايى حالىقارالىق احۋالىمەن تانىمال: مۇندا 100 دەن استام ەل مەن ايماقتان كەلگەن 6000 عا جۋىق ستۋدەنت ءبىلىم الۋدا، ال وقىتۋشىلار قۇرامىنىڭ جارتىسىنان استامى - شەتەلدىك ماماندار. ۋنيۆەرسيتەتتىڭ باستى ماقساتى - جاڭا بۋىننىڭ جاھاندىق كوشباسشىلارىن دايىنداۋ.

ءوزىنىڭ تاعايىندالۋىنا قاتىستى پىكىر بىلدىرگەن پروفەسسور سەرىك قاسىمحان ۇلى:

- بۇل - مەن ءۇشىن زور قۇرمەت ءارى ۇلكەن جاۋاپكەرشىلىك. ۆيتسە-پرەزيدەنت رەتىندە APU ۋنيۆەرسيتەتىنىڭ دامۋىنا ءوز ۇلەسىمدى قوسا الاتىنىما قۋانىشتىمىن. ۋنيۆەرسيتەت باسشىلىعىنا بىلدىرگەن سەنىمى ءۇشىن العىسىم شەكسىز. APU - راسىمەن دە ەرەكشە ءبىلىم ورداسى، جانە مەن ونىڭ وركەندەۋى ءۇشىن ەڭبەك ەتۋدى جالعاستىراتىنىما قۋانىشتىمىن. سونىمەن قاتار، حالىقارالىق اكادەميالىق قاۋىمداستىقتا قازاقستاندى تانىستىرا الاتىنىمدى ماقتان تۇتامىن. بۇل تاعايىنداۋ قازاقستان مەن جاپونيا اراسىنداعى عىلىمي جانە ءبىلىم سالاسىنداعى ىنتىماقتاستىقتى ودان ءارى نىعايتۋعا سەپ بولادى دەپ سەنەمىن. اسىرەسە، ەلىمىزدىڭ پرەزيدەنتى عىلىمدى، حالىقارالىق عىلىمي زەرتتەۋلەر مەن ءبىلىم بەرۋدى دامىتۋعا ەرەكشە قولداۋ كورسەتىپ وتىرعانىن ەسكەرۋ قاجەت، - دەدى.

پروفەسسور مەيىرمانوۆتىڭ جاپونيانىڭ جەتەكشى حالىقارالىق ۋنيۆەرسيتەتتەرىنىڭ بىرىنە ۆيتسە-پرەزيدەنت بولىپ تاعايىندالۋى - قازاقستان ءۇشىن ۇلكەن جەتىستىك جانە ماقتانىش، سونداي-اق حالىقارالىق ارەنادا مانساپ جاساپ جۇرگەن وتاندىق عالىمدار مەن ماماندارعا شابىت بەرەرى انىق.

سەرىك مەيىرمانوۆ 2025-جىلدىڭ 1-ساۋىرىنەن باستاپ ۆيتسە-پرەزيدەنت لاۋازىمىنا رەسمي تۇردە كىرىسەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى