قازاقستان ازاماتتىعىن الۋدى جەڭىلدەتەتىن قۇجات جوباسى تالقىلاۋعا شىعارىلدى
استانا. KAZINFORM - عىلىم جانە جوعارى ءبىلىم مينيسترلىگى قازاقستان ازاماتتىعىن العىسى كەلەتىن جانە قالپىنا كەلتىرگىسى كەلەتىن شەتەلدىكتەرگە قويىلاتىن مەملەكەتتىك ءتىلدى ءبىلۋ تالابىن جەڭىلدەتەتىن بۇيرىق جوباسىن «اشىق ن ق ا» پورتالىنا شىعاردى.
- جوبانى قابىلداۋ قازاقستان رەسپۋبليكاسىنىڭ ازاماتتىعىن الۋعا ۇمىتكەرلەردى تەستىلەۋدىڭ ءاربىر ءپانى بويىنشا سۇراقتار سانىنىڭ ماكسيمالدى تەڭ قاتىناسىن قامتاماسىز ەتۋگە جانە شەكتى دەڭگەيدى %10 كە تومەندەتۋگە مۇمكىندىك بەرەدى، - دەپ جازىلعان قۇجاتتىڭ قابىلداۋىنان كۇتىلەتىن ناتيجە تۋرالى تۇسىندىرمەسىندە.
قۇجاتتىڭ رەسمي اتاۋى — «قازاقستان رەسپۋبليكاسىنىڭ ازاماتتىعىنا قابىلداۋ نەمەسە ازاماتتىعىن قالپىنا كەلتىرۋ كەزىندە مەملەكەتتىك ءتىلدى قاراپايىم دەڭگەيدە، قازاقستان رەسپۋبليكاسى كونستيتۋتسياسىنىڭ نەگىزدەرىن، سونداي- اق قازاقستان تاريحىن ءبىلۋ كولەمىن بەكىتۋ تۋرالى» بۇيرىق. وسى بۇيرىقتىڭ جاڭا رەداكسيامەن جازۋ ۇسىنىلىپ وتىر.
- قازاقستان رەسپۋبليكاسىنىڭ ازاماتتىعىنا قابىلداۋ نەمەسە ازاماتتىعىن قالپىنا كەلتىرۋ كەزىندە مەملەكەتتىك ءتىلدى قاراپايىم دەڭگەيدە 15 (ون بەس) بالدان كەم ەمەس، قازاقستان رەسپۋبليكاسى كونستيتۋتسياسىنىڭ نەگىزدەرىن 20 (جيىرما) بالدان كەم ەمەس، سونداي-اق قازاقستان تاريحىن 15 (ون بەس) بالدان كەم ەمەس ءبىلۋ كولەمى بەكىتىلسىن، - دەلىنگەن جاڭا رەداكتسيا جوباسىندا.
ەسكە سالساق، ءماجىلىس دەپۋتاتى ەرمۇرات باپي رەسەيدىڭ كىرەتىن شەتەلدىكتەردى ەلەكتروندى تىركەۋدەن وتۋگە ماجبۇرلەيتىن ەرەجەنىڭ قازاقستان ازاماتتارىنا دا قولدانىلۋىن «ۆيزالىق رەجيم» دەپ باعالاعان ەدى.
