قازاقستان انتيكورى مەن ا ق ش مەملەكەتتىك دەپارتامەنتى اكتيۆتەردى قايتارۋ ماسەلەلەرىن تالقىلادى
قازاقستان سىبايلاس جەمقورلىققا قارسى ءىس- قيمىل اگەنتتىگى امەريكا قۇراما شتاتتارىنداعى ارىپتەستەرىمەن جەمقورلىققا قارسى كۇن ءتارتىبى بويىنشا ىنتىماقتاستىق ماسەلەلەرىن تالقىلادى، دەپ حابارلايدى Kazinform اگەنتتىكتىڭ باسپا ءسوز قىزمەتىنە سىلتەمە جاساپ.
اگەنتتىك ءتوراعاسى اسحات جۇماعالي ا ق ش مەملەكەتتىك دەپارتامەنتىنىڭ ەسىرتكىمەن حالىقارالىق بايلانىستار جانە قۇقىق قورعاۋ ورگاندارى بيۋروسىنىڭ كەڭەسشىسى، ازيا ايماعىندا باعدارلامالار مەن جوبالاردى ەنگىزۋ سالاسىنداعى ساراپشى كايل ودجيمامەن كەزدەستى. اسحات جۇماعالي اگەنتتىكتىڭ قىزمەتى جانە جۇرگىزىلىپ جاتقان رەفورمالار تۋرالى حاباردار ەتىپ، سونداي- اق امەريكالىق تاراپتىڭ جەمقورلىققا قارسى جوبالاردى ىسكە اسىرۋدا جانە ىلگەرىلەتۋدە كورسەتىپ وتىرعان قولداۋىنىڭ ماڭىزىن اتاپ ءوتتى.
تاراپتار ەكىجاقتى ىنتىماقتاستىق ماسەلەلەرىن تالقىلاپ، قارجىلىق تەرگەۋ، اكتيۆتەردى قايتارۋ، سيفرلىق قارجى اكتيۆتەرىن، كريپتوبيرجالاردى جانە باسقا دا سيفرلىق پلاتفورمالاردى پايدالانا وتىرىپ جاسالعان جەمقورلىق قىلمىستارعا قارسى ءىس- قيمىل ماسەلەلەرى بويىنشا بىرلەسكەن ءىس- شارالار وتكىزۋ تۋرالى ۋاعدالاستى.
كايل ودجيما سەرىكتەستىك قاتىناستاردى ودان ءارى دامىتۋعا قىزىعۋشىلىق تانىتىپ، قول جەتكىزىلگەن كەلىسىمدەردى ىسكە اسىرۋدا جان- جاقتى كومەك كورسەتۋگە دايىن ەكەنىن ءبىلدىردى. كەزدەسۋ سوڭىندا امەريكالىق تاراپ اگەنتتىك دەلەگاتسياسىن امەريكا قۇراما شتاتتارىندا جەلتوقسانىندا وتەتىن بۇۇ سىبايلاس جەمقورلىققا قارسى كونۆەنتسياسىنا قاتىسۋشى مەملەكەتتەر كونفەرەنتسياسىنىڭ مەرەيتويلىق سەسسياسىنا قاتىسۋعا شاقىردى.
