قازاقستان پالەستيناعا 1 ميلليون دوللار كومەك بەرەدى
مەملەكەت باسشىسى قاسىم-جومارت توقايەۆ استانادا ءوتىپ جاتقان تۇركى مەملەكەتتەرى ۇيىمىنىڭ 10- سامميتىندە قازاقستان تاراپى پالەستينا حالقىنا كومەك رەتىندە 1 ميلليون دوللار بەرەتىنىن ايتتى، دەپ حابارلايدى Kazinform اگەنتتىگى.
«مەدياتسيانىڭ (Mediation) ءرولىن ارتتىرۋ - وزەكتى ماسەلە. قازىر اينالامىزدا كۇردەلى احۋال قالىپتاسىپ وتىر.
سولتۇستىكتە رەسەي مەن ۋكراينا، تاياۋ شىعىستا يزرايل مەن پالەستينا اراسىندا قاندى قاقتىعىس بولىپ جاتىر. اۋعانستاننىڭ جاعدايى دا تۇراقسىز. باتىستا زاڭسىز كوشى-قون ماسەلەسى ۋشىعىپ تۇر. بۇگىندە گازا سەكتورىنداعى بەيبىت تۇرعىندار، اسىرەسە، بالالار جانە قارتتار جانجال ازابىن شەگۋدە. ولاردىڭ قاۋىپسىزدىگىن قامتاماسىز ەتۋ - باستى مىندەت. وسى ورايدا، قازاقستاننان پالەستينا حالقىنا 1 ميلليون دوللار كولەمىندە گۋمانيتارلىق كومەك بەرۋ تۋرالى شەشىم قابىلدادىم»، - دەدى پرەزيدەنت.
مەملەكەت باسشىسى ونداعان جىل بويى شەشىمىن تاپپاعان وزەكتى ماسەلەلەردى زورلىق-زومبىلىق كورسەتۋ جانە لاڭكەستىك ادىستەر ارقىلى شەشۋ مۇلدەم دۇرىس ەمەستىگىن اتاپ ءوتتى.
«قازاقستان مۇنداي تاسىلدەردى قاتاڭ ايىپتايدى. احۋال ۋشىعىپ كەتسە، ونىڭ سالدارى ءتىپتى اۋىر بولۋى مۇمكىن. بۇل رەتتە كەز كەلگەن جانجالدى بەيبىت كەلىسسوز جانە ديپلوماتيالىق ديالوگ ارقىلى عانا شەشۋگە شاقىرامىز. ءبىز ءۇشىن ءار ەلدىڭ اۋماقتىق تۇتاستىعىن ساقتاۋ جانە ونىڭ ىشكى ىسىنە قول سۇقپاۋ - باستى باسىمدىق. حالىقارالىق قۇقىق نورمالارىن ساقتاي وتىرىپ، بىرىككەن ۇلتتار ۇيىمى قاۋىپسىزدىك كەڭەسىنىڭ قارارلارىن مۇلتىكسىز ورىنداۋ ماڭىزدى»، - دەدى مەملەكەت باسشىسى.
ەسكە سالايىق، بۇگىن استانادا تۇركى مەملەكەتتەرى ۇيىمىنىڭ 10- سامميتى ءوتىپ جاتىر.
جيىنعا تۇركيا، ازەربايجان، وزبەكستان، قىرعىزستان پرەزيدەنتتەرى ۇيىمعا مۇشە مەملەكەت باسشىلارى رەتىندە، ماجارستان پرەمەر-ءمينيسترى مەن تۇرىكمەنستان باسشىسى باقىلاۋشى ەلدىڭ باسشىلارى رەتىندە قاتىسادى.
ت م ۇ سامميتى «تۇركى ءداۋىرى» ۇرانىمەن وتەدى.
بۇگىن سىرتقى ىستەر مينيسترلىگىندە تۇركى مەملەكەتتەرى ۇيىمىنىڭ سىرتقى ىستەر ميينسترلەرى كەڭەسىنىڭ جابىق وتىرىسى ءوتتى.
شارادا ق ر سىرتقى ىستەر ءمينيسترى مۇرات نۇرتىلەۋ يزرايل-حاماس قاقتىعىسىنداعى قازاقستان ۇستانىمىن ايتتى.
