قازاقستان 997+ كودىنان باس تارتتى
قازاقستان 7+ تەلەفون كودىن وزگەرىسسىز قالدىرادى. سيفرلىق دامۋ مينيسترلىگى جاڭا كودقا كوشۋگە بولاتىنىن، ءبىراق قارجىلىق جانە تەحنولوگيالىق پروبلەمالار تۋىندايتىنىن ايتۋدا، دەپ حابارلايدى Kazinform اگەنتتىگى.
«قازاقستان مەن رەسەيدىڭ بايلانىس ۆەدومستۆولارى اراسىندا جاسالعان «دۇنيەجۇزىلىك نومىرلەۋدىڭ 7 ايماعىنىڭ نومىرلەنۋىن پايدالانۋ تۋرالى» 2006-جىلعى 17- ماۋسىمداعى كەلىسىمگە سايكەس، قازاقستان قازىرگى ۋاقىتتا رەسەي فەدەراتسياسىمەن بىرلەسىپ «7+» ينتەگراتسيالانعان حالىقارالىق كودىن پايدالانادى. جەكە كودتى الۋ ماقساتىندا 2021-جىلى قازاقستان 997+ حالىقارالىق تەلەفون كودىن رەزەرۆكە قويدى. بايلانىس وپەراتورلارىمەن جاڭا كودقا كوشۋ ماسەلەسىن پىسىقتاۋدا جاڭا كودقا كوشۋگە بولاتىنى، ءبىراق ءبىرقاتار قارجىلىق جانە تەحنولوگيالىق پروبلەمالارعا اكەپ سوقتىراتىنى ايتىلدى»، - دەپ جازىلعان سيفرلىق دامۋ مينيسترلىگىنىڭ رەسمي جاۋابىندا.
سونىمەن قاتار، وتاندىق بايلانىس وپەراتورلارىنىڭ بارلىق ابونەنتتەرىنە مەملەكەتتىك جانە بانكتىك قىزمەتتەردى، الەۋمەتتىك جەلىلەردى جانە ءتۇرلى قوسىمشالاردى الۋ ءۇشىن بارلىق سەرۆيستەردە ءوز دەرەكتەرىن جاڭارتۋ قاجەتتىلىگى تۋىندايدى. تيىسىنشە، وتپەلى كەزەڭدە ساتسىزدىكتەر مەن جاعىمسىز تاجىريبەلەر ىقتيمالدىعى جوعارى.
«سونداي-اق، مينيسترلىك حالىقارالىق تەلەكوممۋنيكاتسيا وداعىمەن قايتا كەلىسسوزدەر جۇرگىزىپ، 7+ حالىقارالىق كودىن وزگەرتپەي قالدىرۋ تۋرالى شەشىم قابىلدادى. وسىعان بايلانىستى رەسەي فەدەراتسياسىنىڭ تسيفرلىق دامۋ، بايلانىس جانە بۇقارالىق كوممۋنيكاتسيالار مينيسترلىگىمەن رەسەي فەدەراتسياسىنىڭ ۇكىمەتى مەن قازاقستان ۇكىمەتى اراسىندا دۇنيەجۇزىلىك نومىرلەۋدىڭ 7-ايماعىنىڭ ءنومىرىن پايدالانۋ تۋرالى جاڭا كەلىسىم جاساۋ ماسەلەسى پىسىقتالدى. قازىرگى ۋاقىتتا جوبا مەملەكەتتىك ورگاندارمەن جانە مۇددەلى تاراپتارمەن كەلىسىلگەن. كەلىسۋ ناتيجەلەرى بويىنشا جوبا رەسەي فەدەراتسياسىنداعى ديپلوماتيالىق ارنالار ارقىلى جىبەرىلدى»، - دەيدى ۆەدومستۆو.
قازىرگى ۋاقىتتا رەسەي فەدەراتسياسى جاعىندا مەملەكەتىشىلىك قايتا كەلىسۋ راسىمدەرى ءجۇرىپ جاتىر.
ءارى قاراي جوبانى كەلىسۋ تۋرالى رەسەي فەدەراتسياسىنىڭ نوتاسىن العان سوڭ كەلىسىمگە قول قويۋ جانە قابىلداۋ جۇمىستارى جۇرگىزىلەدى.
