قازاقستان 77+ كودىن قالدىرۋ ءۇشىن رەسەيمەن مامىلەگە كەلەدى - مينيستر
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين +997 كودىنان نەلىكتەن باس تارتقاندارىن ءتۇسىندىردى، دەپ حابارلايدى Kazinform.
«كودتى ءبىز تالاپ ەتتىك، 997+ كودى بىزدە رەزەرۆتە تۇر. ءبىراق ءبىزدىڭ ازاماتتارىمىزدىڭ شاعىمدارىن ەسكەرە وتىرىپ، ءبىز جالپى نەگە 7+ كودىنان كەتۋىمىز كەرەك دەگەن سۇراقتى قايتا قويدىق. تاريحقا كوز جۇگىرتسەك، كەڭەس وكىمەتى قۇلاعان كەزدە 7+ كودى رەسەيدە قالدى. سودان كەيبىر مەملەكەتتەر شىعا باستادى. ءبىراق ءبىزدىڭ مەملەكەت رەسەيمەن ۆەدومستۆوارالىق كەلىسىمگە كەلىپ، 7+ دەن كەيىن تاعى ءبىر 7 سانى قازاقستانعا تيەسىلى قىلدىق. ءبىراق بۇل - ۆەدومستۆوارالىق قۇجات. سول قۇجاتتىڭ ىشىندە „ەكى جاقتىڭ بىرەۋى وسى كەلىسىمشارتتان باس تارتامىز دەسە، جارتى جىلدان اسپاي، ەكىنشى تاراپقا حاباردار ەتۋى كەرەك جانە شارت بۇزىلادى“ دەگەن پۋنكت بار. ياعني ءبىز كودسىز قالۋىمىز مۇمكىن ەدى. سوندىقتان وسى ماسەلەنى قايتا تالقىلاپ، رەسەي فەدەراتسياسىمەن ءبىر مامىلەگە كەلدىك»، - دەپ ءتۇسىندىردى مينيستر.
ونىڭ ايتۋىنشا، بۇل كەلسىمشارت ۇكىمەتارالىق دەڭگەيدە بولادى. ەكى ەل دەپۋتاتتارىنىڭ راتيفيكاتسياسىنان وتەدى جانە «باس تارتۋ» دەگەن پۋنكتتەر الىنىپ تاستالادى. ياعني، ول كەلەشەكتە «باس تارتۋعا» كەلمەيدى.
«تورتىنشىدەن، بىزگە 77+ ءنى وزىمىزگە قالدىرىپ، ونى مەملەكەتارالىق دەڭگەيدە كەلىسىمشارتتا بەكىتەتىن بولامىز. ياعني ازاماتتارعا ىڭعايلى بولسىن دەيمىز. ويتكەنى، جاڭا كودقا اۋىسۋ قيىن ەمەس، بىزگە ءبىر جىل عانا جەتەدى. ءبىراق 20 ميلليون ابونەنتىمىز باسقا دا ينتەرنەت- پلاتفورمالاردا تىركەگەن كودتارىن جاڭارتۋ جۇمىستارىن جۇرگىزۋى كەرەك. سوندىقتان، ءبىز دۇنيەجۇزىلىك ۇيىمدا +997 كودىن وزىمىزگە رەزەرۆكە قويدىق. ءبىراق 77+ ءنى ءتامامداپ، ءوزىمىزدىڭ كودىمىز رەتىندە قالدىرۋ ءۇشىن ءبىز سول كەلىسىمشارت ماسەلەلەرىن رەسەيمەن تالقىلاپ، ءبىر مامىلەگە كەلدىك. قازىر مەملەكەتارالىق ءتيىستى پروتسەدۋرالار جۇرگىزىلىپ جاتىر. ءبىزدىڭ جاقتان ءبارى ماقۇلداندى»، - دەدى باعدات مۋسين.
15-قاراشا كۇنى قازاقستان 7+ تەلەفون كودىن وزگەرىسسىز قالدىراتىنى حابارلانعان ەدى.
