قازاقستان 2,3 ميلليارد تەڭگەگە تۇركى ينۆەستيتسيالىق قورىنىڭ اكسيالارىن ساتىپ الدى
استانا. KAZINFORM - قازاقستان تۇركى ينۆەستيتسيالىق قورىنىڭ اكسيالارىن ساتىپ الۋعا 2,3 ميلليارد تەڭگە جۇمساعان. بۇل تۋرالى ۇلتتىق ەكونوميكا مينيسترلىگىنىڭ بيۋجەت تۋرالى انىقتاماسىندا ايتىلعان.
قۇجاتتاعى مالىمەت بويىنشا، ۆەدومستۆونىڭ ءۇش جىلدىق بيۋجەتى 995,4 ميلليارد تەڭگە بولىپ بەلگىلەنگەن. سونىڭ ىشىندە 2024-جىلعا تەڭگە، 2025-جىلعا 272,5 ميلليارد تەڭگە، 2026-جىلعا 263,7 ميلليارد تەڭگە قاراستىرىلعان.
بيىلعا بولىنگەن 459,2 ميلليارد تەڭگەنىڭ قالاي يگەرىلگەنىنە كوز سالساق، ىشىندە فورۋمدار وتكىزۋ، حالىقارالىق قوردىڭ اكسياسىن ساتىپ الۋ شىعىندارى بار.
مىسالى، تۇركى ينۆەستيتسيالىق قورىنىڭ اكسيالارىن ساتىپ الۋعا 2,3 ميلليارد تەڭگە جۇمسالعان. 10 تاقىرىپ بويىنشا اناليتيكالىق زەرتتەۋ جۇرگىزۋگە 1,4 ميلليارد تەڭگە باعىتتالعان. «استانا» حالىقارالىق فورۋمىن وتكىزۋگە دە ءدال وسىنشا قاراجات كەتكەن.
StandardPoor's, Fitch جانە Moody's حالىقارالىق رەيتينگ اگەنتتىكتەرىمەن جۇمىسقا 1 ميلليارد تەڭگە بولىنگەن.
بيىلعى شىعىننىڭ ەڭ ۇلكەن بولىگى «اۋىل-ەل بەسىگى» جوباسىنا باعىتتالعان - 76,9 ميلليارد تەڭگە. بۇل قاراجات اۋىلداردىڭ ينفراقۇرىلىمىن رەتكە كەلتىرۋگە كەتكەنىن ايتۋ كەرەك.
ال وبلىس ورتالىقتارىندا ينجەنەرلىك كوممۋنيكاتسيالار جۇرگىزۋگە 35,2 ميلليارد تەڭگە جۇمسالعان. «ديپلوممەن اۋىلعا» باعدارلاماسىنا 30 ميلليارد تەڭگە، استانا، الماتى، شىمكەنت قالالارى مەن اقمولا وبلىسىنىڭ اگلومەراتسيالارىن دامىتۋعا 23,9 ميلليارد تەڭگە، مونوقالالار مەن شاعىن قالالاردا ينفراقۇرىلىمىن جەتىلدىرۋگە 22,8 ميلليارد تەڭگە بولىنگەن.
ەسكە سالساق، تۇركى ينۆەستيتسيالىق قورىنىڭ پرەزيدەنتى باعدات امىرەيەۆتىڭ اگەنتتىك تىلشىسىنە بەرگەن ارنايى سۇحباتىندا اتالعان قوردىڭ جۇمىسىنا قاتىستى تىڭ مالىمەتتەر ايتىلعان.
