قازاققا تۇرمىسقا شىققان ورىس قىزدىڭ ۆيدەوسى كوپشىلىكتى ءسۇيسىنتتى

الەنانىڭ ايتۋىنشا، ول ۆيدەو ارقىلى كۇيەۋىنىڭ اتاسى مەن اجەسى ۇيىنە العاش رەت قوناق بولعانىن كورسەتكىسى كەلگەن. ولار داستارحان باسىندا ازىلدەسىپ، ادەمى اڭگىمە- دۇكەن قۇرىپ وتىرعانىن كورۋگە بولادى.

«بۇل مەنىڭ جولداسىمنىڭ تۋعان كۇنى ەدى. ونى وتباسىمىزبەن ءبارىمىز اتاپ وتتىك. جەڭگەم ەكەۋمىز قوناقتارعا شاي قۇيدىق. ۆيدەوداعى ديالوگ اپكەممەن بولعان اڭگىمە ەدى. ول جالپى تەك تاۋىق ەتىن جەيتىن. وسى جولى قازى، جايا جەپ، ءدامىن كوردى. سوسىن مەنەن «ماعان سۇتپەن شاي قۇيدىڭ با؟» دەپ سۇرادى. سول كەزدە مەن «بۇگىن ەت جەدىڭ بە، وندا سۇتپەن شاي ءىش» دەپ شاي ۇسىندىم. بىلاي قاراساڭ، قاراپايىم نارسە، ءبىراق الەۋمەتتىك جەلىدە تانىمال بولىپ كەتتى، - دەدى ول.

ۆيدەو 4 ميلليوننان استام قارالىم جيناعان. كۇيەۋى ەستەلىك ءۇشىن تۇسىرگەن بەينەجازبانى دوستارىنىڭ توبىنا دا جىبەرگەن. ال الەۋمەتتىك پاراقشاداعى جاريالانعان ۆيدەوعا 700 دەن استام پىكىر جازىلعان. «باقىت، تۇسىنىستىك، ماحاببات»، «ءبىر-ءبىرىن جاقسى كورەتىنى كورىنىپ تۇر»، «باقىتتى وتباسى ەكەن»، «باستىسى - وتباسى باقىتى، باقىتتى بولىڭىزدار»، - دەپ جازدى جەلى قولدانۋشىلارى.

الەنانىڭ ايتۋىنشا، جولداسىمەن الماتى قالاسىندا تۇرادى. بەس جىل بۇرىن تانىسقان ولار وسى جىلى تويلارىن وتكىزگەن.

«ءبىز ءبىر اۋداندا تۇردىق، 2018 -جىلدان باستاپ كەزدەسىپ جۇردىك. باسىندا دوس بولىپ، كەيىن جۇپقا اينالدىق. سوسىن مەن رەسەيگە وقۋعا كەتىپ قالدىم دا، اراقاشىقتىقتا سويلەسىپ جۇردىك. الىستا بولۋ ءبىر- بىرىمىزگە قيىندىق تۋدىردى. سول ءۇشىن وقۋدان شىقتىم دا، قازاقستانعا ورالدىم. جاقىندا عانا ۇيلەنۋ تويىن وتكىزدىك. شۇكىر، باقىتتى ءومىر ءسۇرىپ جاتىرمىز»، - دەدى ول.

قازىر ول SMM سالاسىندا قىزمەت ەتەدى. TikTok پاراقشاسىندا 100 مىڭنان استام قارالۋشى جازىلعان.

«قازاققا تۇرمىسقا شىعىپ، سول وتباسىعا كەلىن بولىپ تۇسكەسىن كەز كەلگەن ۆيدەو جەلى قولدانۋشىلارىنىڭ نازارىن اۋدارتادى. ولار ءارتۇرلى پىكىر جازادى، وسى تاقىرىپ توڭىرەگىندە ۇنەمى قىزىعۋشىلىق تانىتىپ، قاراپ وتىرادى»، - دەدى ول.

Massaget.kz 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى