قازاقمىس كومپانياسى بالقاشتىڭ ەكوجۇيەسىن ساقتاۋعا 5 ميلليون دوللار بولەدى
استانا. KAZINFORM - مەملەكەت باسشىسى قاسىم- جومارت توقايەۆ بىرەر كۇن بۇرىن One Water سامميتىنە قاتىسۋ ءۇشىن ساۋد ارابياسىنا جۇمىس ساپارىمەن باردى.
سامميت بارىسىندا قازاقستانداعى بىرەگەي بالقاش كولى نازاردا بولدى. وسى ورايدا بالقاش كولىنىڭ ەكوجۇيەسى مەن وعان ىرگەلەس سۋلى-باتپاقتى جەرلەردى قورعاۋ جانە ساقتاۋ ماقساتىندا «قازاقمىس» جەكە كومپانياسى 5 ميلليون ا ق ش دوللارى كولەمىندە قارجى بولەتىنى بەلگىلى بولدى.
ايتا كەتەيىك، One Water Summit 2024 حالىقارالىق فورۋمى قازاقستان مەن فرانسيانىڭ توراعالىعىمەن، ساۋد ارابياسى جانە دۇنيەجۇزىلىك بانك توبىنىڭ قولداۋىمەن ءوتتى.
مەملەكەت باسشىسى قاسىم-جومارت توقايەۆ اتالعان ءسامميتتىڭ اشىلۋ سالتاناتىندا ءسوز سويلەدى.
— بارشا ادامزات، اسىرەسە شالعايدا تىرشىلىك ەتىپ جاتقان تۇرعىندار مەن حالىقتاردىڭ وسال توبى سانيتارلىق تالاپتارعا ساي كەلەتىن تازا اۋىزسۋعا قول جەتكىزۋگە ءتيىس. بۇل - ولاردىڭ قۇقى. كليمات پەن سۋ ينفراقۇرىلىمىنا ارنالعان ماقساتتى ينۆەستيتسيالار سۋ كوزىمەن قامتاماسىز ەتىپ، ورنىقتى وسىمگە سەپتىگىن تيگىزەدى. وسى ارقىلى تۇتاس وڭىرلەر وركەندەيدى. قازاقستاننىڭ تازا اۋىزسۋعا جاپپاي قول جەتكىزۋدى كوزدەيتىن Freshwater Challenge جاھاندىق باستاماسىنا قوسىلۋى ەلىمىزدىڭ وسى ماقساتقا جەتۋگە بەيىل ەكەنىن راستايدى، - دەدى پرەزيدەنت.
مەملەكەت باسشىسى ەلىمىزدىڭ دۇنيەجۇزىلىك بانكپەن ستراتەگيالىق سەرىكتەستىگىنىڭ ءمانىن ەرەكشە اتاپ ءوتتى.
پرەزيدەنتتىڭ ايتۋىنشا، بۇگىندە قارجى ينستيتۋتىمەن بىرلەسە سۋ رەسۋرستارى، كولىك جانە ءبىلىم بەرۋ سالالارىندا جالپى قۇنى 3,5 ميلليارد دوللار بولاتىن بەس ءىرى جوبا جۇزەگە اسىرىلىپ جاتىر.
سونداي- اق One Water سامميتىندە ق ر پرەزيدەنتىنىڭ حالىقارالىق ەكولوگيالىق ىنتىماقتاستىق جونىندەگى ارنايى وكىلى ءزۇلفيا سۇلەيمەنوۆا ەلىمىزدىڭ سۋ قورىن ەكولوگيالىق قورعاۋ ماسەلەسىن قوزعاپ، بەس ۇلتتىق باستامانى كوتەردى. سونىڭ ءبىرى وتاندىق «قازاقمىس» كومپانياسىنىڭ بالقاش كولىن قورعاۋعا ارنالعان جوباسى.
- ەكوجۇيەسىن قورعاۋدى نازارعا الاتىن ءبىزدىڭ ىشكى سۋ قويمالارىمىز بار، سونىڭ ءبىرى - بالقاش كولى. كولدىڭ بىرەگەيلىگى - جارتىلاي تۇزدى سۋ، جارتىلاي تۇشى سۋدان تۇرادى. ونىڭ وڭتۇستىگىندە رامسار كونۆەنتسياسىنىڭ سۋلى-باتپاقتى اۋماعى ورنالاسقان. ءسىزدىڭ رۇقساتىڭىزبەن قازاقستاننىڭ جەتەكشى جەكە كومپانياسى «قازاقمىس» كورپوراتسياسى بالقاش كولىنىڭ ەكوجۇيەسىن ساقتاۋعا باعىتتالعان جوبالارعا 5 ميلليون ا ق ش دوللارىن بولەتىنىن جاريالاعىم كەلەدى. جەكە سەكتور وكىلدەرى سۋ ەكوجۇيەلەرىن ساقتاۋدا بەلسەندىلىك تانىتىپ وتىر، - دەدى ءزۇلفيا سۇلەيمەنوۆا.
ەسكە سالا كەتسەك، بيىل مامىردا «بالقاش-2024» حالىقارالىق سۋ-كليمات فورۋمى ءوتتى. فورۋمعا قاتىسۋشىلار بالقاش كولىنىڭ ەكولوگيالىق دەگراداتسياسىنىڭ الدىن الۋ ماسەلەلەرىن كوتەردى. سول سياقتى بالقاش كولىنىڭ جاعدايىنا الاڭداۋلى قوعامداستىق مۇشەلەرى ءبىرقاتار يننوۆاتسيالىق شەشىمدەر ۇسىندى.
«قازاقمىس» كومپانياسى ەكولوگيالىق ساياسات جانە ESG قاعيداتتارىن ۇستانا وتىرىپ، فورۋمدا بەلگىلەنگەن ءىس-شارالارعا بەلسەندى اتسالىسىپ، بالقاش كولىن قورعاۋ جانە ساقتاۋ باعدارلاماسىن ازىرلەۋگە ۇلەس قوساتىنىن بىلدىرگەن ەدى.
