قازاقپارات قىزمەتكەرى جايلى كىتاپ شىقتى
«Kazinform» ح ا ا شىعارۋشى رەداكتورى، بەلگىلى جازۋشى، قازاقستان جازۋشىلار وداعىنىڭ مۇشەسى، ع. مۇسىرەپوۆ اتىنداعى سىيلىقتىڭ لاۋرەاتى بەگابات ۇزاقوۆتىڭ 50 جىلدىعىنا وراي كىتاپ شىقتى، دەپ حابارلايدى Kazinform ءتىلشىسى.
الماتىداعى «Media Invest Group» باسپاسىنان كورنەكتى جازۋشى بەگابات ۇزاقوۆتىڭ شىعارماشىلىعىنا ارنالعان «بيىككە بەتتەگەن بەگابات» اتتى كىتاپ جارىق كوردى. كىتاپتى قۇراستىرعان - بەلگىلى اقىن، تولەگەن ايبەرگەنوۆ اتىنداعى سىيلىقتىڭ لاۋرەاتى احمەت ءومىرزاق، العىءسوزىن «دارىن» مەملەكەتتىك سىيلىعىنىڭ جانە قازاقستان پرەزيدەنتى سىيلىعىنىڭ يەگەرى عابيت مۇسىرەپ جازعان.
كىتاپقا قالامگەردىڭ شىعارماشىلىق لابورتورياسى تۋرالى مول مالىمەت بەرەتىن ماقالا- ەسسەلەر ەنگەن. سونداي- اق وعان ارنالعان ولەڭدەر مەن جازۋشى جايىندا بەلگىلى قازاق قالامگەرلەرى، حالىقارالىق «الاش» ادەبي سىيلىعىنىڭ لاۋرەاتتارى مولداحمەت قانازدىڭ، سايلاۋباي جۇباتىر ۇلىنىڭ، قۋانىش جيەنبايدىڭ، ءاليا بوپەجانوۆانىڭ، ا. بايتۇرسىنوۆ اتىنداعى سىيلىقتىڭ لاۋرەاتى جازۋشى سەرىك بايحونوۆتىڭ، قازاقستاننىڭ ەڭبەك سىڭىرگەن قايراتكەرى قۇديار ءبىلالدىڭ، وزبەكستان عىلىم اكادەمياسىنىڭ اكادەميگى جۇمانازار بازاربايەۆتىڭ، وزبەكستانداعى تۇران عىلىم اكادەمياسىنىڭ اكادەميگى قالدىبەك سەيدانوۆتىڭ، فيلولوگيا عىلىمدارىنىڭ دوكتورى، بەلگىلى ادەبيەتتانۋشى ايگۇل ءىسىماقوۆانىڭ، بەلگىلى جۋرناليستەر قاراشا قارامانىڭ، بولات شاراحىمبايدىڭ، اسىلجان دۋلاتي پىكىرلەرى بەرىلگەن. سونداي- اق جازۋشى بەگابات ۇزاقوۆتىڭ ادەبيەت تۋرالى ايتقان پىكىرلەرى مەن سۇحباتتارى قامتىلعان.
كىتاپتىڭ ماقالالار بولىمىندەگى وزبەكستان جانە قاراقالپاقستان جازۋشىلار وداعىنىڭ مۇشەسى، فيلولوگيا عىلىمدارىنىڭ كانديتاتى قايىرجان ارالبايەۆتىڭ «قىسقا جانردىڭ حاس شەبەرى»، ونەر تانۋ ماگيسترى، قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى كۇنقوجا قايرۋللانىڭ «كوكىرەگىنە قونعان ءسوزدىڭ كيەسى»، بەرداق اتىنداعى قاراقالپاق مەملەكەتتىك ۋنيۆەرسيتەتى، فيلولوگيا كافەدراسىنىڭ وقىتۋشىسى، PhD دوكتورى شىرىن سمامۋتوۆانىڭ «تانىمى تەرەڭ، ويى اسقاق»، فيلولوگيا عىلىمدارىنىڭ كانديداتى، پروفەسسور حالىقارالىق اقپاراتتاندىرۋ اكادەمياسىنىڭ اكادەميگى مەڭدىباي ءابىل ۇلىنىڭ «جان جىلۋى جۇرەكتەردى تەربەگەن»، بەلگىلى جۋرناليست ازامات ەسەنجولدىڭ «ۇنسىزدىك» دەپ اتالاتىن ماقالالارىندا بەگابات ۇزاقوۆ تۋىندىلارىنداعى ءتۇرلى باعىتتا جازىلعان پروزالىق تۋىندىلاردىڭ ايتار ويى مەن يدەياسىنىڭ وتكىرلىگى، قالامگەر شەبەرلىگىنىڭ قىرلارى تۋرالى جان- جاقتى جازىلعان. ال س. دەميرەل اتىنداعى ۋنيۆەرسيتەتتىڭ ماگيسترانتى نۇربانۋ كامالدىڭ ب. ۇزاقوۆتىڭ «بالۋان قىز» اڭگىمەسىندەگى «ءباتيما» وبرازى جانە شىعارماداعى ۇلتتىق قۇندىلىقتار» دەگەن زەرتتەۋ ماقالاسىندا جازۋشىنىڭ ۇلتتىق حاراكتەر سومداۋدا ارحەتيپ وبرازدى قالاي جاساعانى تالدانسا، شىرىن ازاتباي قىزىنىڭ «قارا ءسوزدىڭ باتىرى - بەگابات»، ا. جۇماعاليەۆتىڭ «اقيقات دەپ سوعار تەك ادال جۇرەك» ەسسەلەرىندە قالامگەردىڭ ومىردە كورگەن قيىنشىلىقتارى مەن سونى جەڭۋ جولىنداعى كۇرەسى، ازاماتتىق ۇستانىمى قىزىقتى باياندالعان. سونىمەن بىرگە كىتاپتىڭ سوڭعى جاعىندا بەرىلگەن قازاقستان جازۋشىلار وداعىنىڭ مۇشەلەرى، بەلگىلى اقىندار احمەت ءومىرزاقتىڭ، قالباي ءابدىرامانوۆتىڭ، اقشاگۇل رامازانوۆانىڭ، ماقسات السەيىتوۆتىڭ، جالەل قۋاندىق ۇلىنىڭ، ەرعازى ارەپوۆتىڭ ارناۋ ولەڭدەرى جازۋشىنىڭ تالانتىنا دەگەن زور قۇرمەتتى، شىنايى سەزىمدى كەلىستى ورنەكتەسە، جازۋشى عۇمىرىنىڭ ءتۇرلى كەزەڭدەرىنەن سىر شەرتەتىن فوتوسۋرەتتەر دە كىتاپتىڭ ءارىن اشىپ، شىرايىن كەلتىرىپ، مازمۇنىن تولىقتىرىپ تۇر.
بەگابات ۇزاقوۆ شىعارماشىلىعى قازاقستاندا ورىس تىلىندە وقىتاتىن مەكتەپتەردىڭ 7-سىنىبىنا ارنالعان «قازاق ءتىلى جانە ادەبيەتى»، وزبەكستاندا ج و و- لارعا ارنالعان وقۋلىقتاردا وقىتىلىپ جاتقاندىقتان، بۇل تۋىندى وقۋشىلار مەن ستۋدەنتتەرگە جازۋشى جايلى كەڭىرەك ماعلۇمات بەرۋ ءۇشىن شىعارىلىپ وتىر. سونداي- اق بۇل كىتاپ ادەبيەتتى تەرەڭ بىلۋگە قىزىعاتىن جانە جازۋشىنىڭ شىعارماشىلىق لابوراتورياسى تۋرالى تەرەڭىرەك بىلگىسى كەلەتىن ادەبيەتشىلەر مەن وقىرماندارعا دا ارنالعان، جوعارى ساپادا اسەم بەزەندىرىلگەن كىتاپ «Media Invest Group» باسپاسىنان 1000 دانا تارالىممەن جارىق كورگەن.
ەسكە سالا كەتەيىك، 50 جىلدىق مەرەيتويى قارساڭىندا جازۋشىمەن سۇحباتتى جاريالاعان ەدىك.
