قازاق سپورتشىلارىن وسى اپتادا قانداي جارىستار كۇتىپ تۇر

ق ر سپورت كوميتەتىنىڭ حابارلاۋىنشا، وسى اپتادا قازاق سپورتشىلارى ءبىرقاتار ماڭىزدى جارىستا ب ا ق سىناپ، ءوز شەبەرلىكتەرىن كورسەتە الادى.

ناقتىراق ايتساق، 24-اقپان - 9-ناۋرىز ارالىعىندا شاڭعىمەن تۇعىردان سەكىرۋدەن الەم چەمپيوناتى وتەدى. وندا ەل نامىسىن 4 وتانداسىمىز قورعايدى. اتالعان باسەكە نورۆەگيانىڭ ترونحەيم قالاسىندا وتەدى.

24-اقپان-3-ناۋرىز ارالىعىندا ماجارستاننىڭ دەبرەتسەن قالاسىندا مانەرلەپ سىرعاناۋدان جاسوسپىرىمدەر اراسىنداعى الەم چەمپيوناتى وتەدى. الەمدىك دوداعا ەل قۇراماسىنان 2 سپورتشى قاتىسادى.

23-اقپان - 7-ناۋرىز ارالىعىندا شۆەتسيانىڭ ەستەرسۋند قالاسىندا بياتلوننان جاسوسپىرىمدەر مەن جاستار اراسىنداعى الەم چەمپيوناتى وتپەك. وندا اتالعان بىرىنشىلىككە 11 وتانداسىمىز سىنعا تۇسەتىن بولادى.

24-28-اقپان ارالىعىندا سپورتتىق جانە جاۋىنگەرلىك سامبودان قازاقستان چەمپيوناتى جالاۋىن كوتەرمەك. اقتاۋ قالاسىندا وتەتىن ىشكى بىرىنشىلىكتە 17 وڭىردەن 110 سپورتشى باق سىنايدى دەپ جوسپارلانىپ وتىر.

25-28-اقپان ارالىعىندا استانا قالاسىندا قويان- قولتىق ۇرىستان ەل بىرىنشىلىگى وتەدى. چەمپيوناتقا ەلىمىزدىڭ بارلىق وڭىرىنەن 400 سپورتشى قاتىسادى دەپ كۇتىلۋدە.

26-اقپان - 2-ناۋرىز ارالىعىندا شورت- ترەكتەن جاسوسپىرىمدەر اراسىنداعى الەم چەمپيوناتىنىڭ الاۋى جەلبىرەيدى. كانادانىڭ كالگاري قالاسىندا وتەتىن بايراقتى باسەكەدە ەل نامىسىن 8 سپورتشى قورعاماق.

26-27-اقپان ارالىعىندا ەركىن كۇرەستەن Muhamet Malo حالىقارالىق رەيتينگتىك ءتۋرنيرى وتەدى. البانيانىڭ تيرانا قالاسىندا وتەتىن دوداعا قازاقستان قۇراماسىنان 10 بالۋان ەل نامىسىن قورعايدى.

26-اقپان-4 ناۋرىز ارالىعىندا فرانتسيا استاناسى پاريجدە كوركەم جۇزۋدەن الەم كۋبوگى (1 كەزەڭ) وتەدى. بۇل باسەكەدە قازاقستاننان 9 سپورتشى سىنعا تۇسپەك.

26-28-اقپان ارالىعىندا استانا قالاسىندا ارمرەستلينگتەن قازاقستان چەمپيوناتى وتپەك. سايىسقا 17 وڭىردەن 300 سپورتشى قاتىسادى.

28-اقپان - 6-ناۋرىز ارالىعىندا يتاليانىڭ تارۆيزيو قالاسىندا تاۋ شاڭعىسى سپورتىنان جاسوسپىرىمدەر اراسىنداعى الەم چەمپيوناتىنىڭ جالاۋى جەلبىرەيدى. وندا ەل نامىسىن 2 سپورتشى قورعايدى.

1-3-ناۋرىز ارالىعىندا گەرمانيانىڭ وبەرحوف قالاسىندا شاڭعىمەن تۇعىردان سەكىرۋدەن FIS كۋبوگى وتەدى. اتالعان باسەكەدە 4 وتانداسىمىز باق سىنايدى.

1-7-ناۋرىز ارالىعىندا شىمكەنت قالاسىندا پارا ساداق اتۋدان ەل چەمپيوناتى وتپەك. ىشكى بىرىنشىلىككە ءار وڭىردەن 60 سپورتشى قاتىسادى دەپ كۇتىلۋدە.

بۇعان دەيىن باتۋتتاعى گيمناستيكادان ەل قۇراماسى باكۋدە كۇمىس مەدال ەنشىلەگەنىن حابارلاعان ەدىك.

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى