قازاق رۋحىن الەمگە تانىتتىق - «سۇڭقار» جاساعىنىڭ كاپيتانىمەن سۇحبات
دۋبايدا وتكەن «The UAE SWAT Challenge 2025» ارنايى ماقساتتاعى بولىمشەلەر سايىسىندا قازاقستاننىڭ 5 كومانداسى العاشقى وندىققا ىلىكتى. ال ىشكى ىستەر مينيسترلىگىنىڭ «سۇڭقار» جاساعى سايىستىڭ كۇمىس جۇلدەگەرى اتانعان بولاتىن. وسى ورايدا كوماندا كاپيتانى مەيرامبەك جايلاۋبايەۆپەن سۇحباتتاسۋدىڭ ءساتى ءتۇستى.
- «The UAE SWAT Challenge 2025» سايىسىنان ولجالى ورالدىڭىزدار. جارىسقا دايىندىق قالاي ءجۇردى؟ بۇل «سۇڭقار» كومانداسىنىڭ اسكەريلەرگە ارنالعان بايقاۋعا العاش قاتىسۋى ما؟
- سالالىق سايىس اسكەري قۇرىلىمدى شىڭدايدى ەمەس پە، بۇل جولعى بايقاۋ دا «سۇڭقار» ارنايى ماقساتتاعى جاساعى ءۇشىن تاجىريبەگە اينالدى. اۋەلدەن كوماندا جان-جاقتى دايىندىق جۇرگىزىپ، ۇجىمدىق ستراتەگيا قۇردى. ءاربىر قاتىسۋشى وزىنە جۇكتەلگەن تاپسىرمانى كاسىبي شەبەرلىكپەن ورىنداعانىن ايتا كەتكەن ءجون. مۇنى شەتەلدىك ارىپتەستەرىمىز بەن ب ا ق- تىڭ بەرگەن باعاسىنان اڭعاردىق.
ونىڭ ۇستىنە «The UAE SWAT Challenge 2025» بايقاۋىنا العاش قاتىسۋىمىز ەمەس. 2024-جىلى سايىستا بوي كورسەتتىك. ول كەزدە سايىستىڭ بەل ورتاسىنا دەيىن العاشقى ورىندا كورىنگەنىمىزبەن، قورىتىندى ەسەپتە VII ورىن بۇيىردى. وعان كوماندا مۇشەسىنىڭ جاراقات الۋى سەبەپ بولعان ەدى. ايتا كەتەرلىگى، تورەشىلەر كوماندانى جارىستان شىعارماۋى ءۇشىن جاراقات العان اسكەري قىزمەتكەر اياعىنىڭ سىنعانىنا قاراماستان جاتتىعۋدى سوڭىن جەتكىزگەن بولاتىن. 74 كوماندانىڭ ىشىندە ۇزدىك وندىققا ەنۋ كوڭىل كونشىتكەنى راس، دەسە دە قايتا اينالىپ الدىڭعى قاتارعا قوسىلاتىنمىزعا سەنىم جوعارى بولدى.
بيىل كەتكەن ەسەنى قايتارۋ ماقساتىندا تىڭعىلىقتى دايىندىق ءجۇردى. كوماندا ءوز قارۋ-جاراعى، قاجەتتى تەحنيكالىق بازاسىمەن دۋبايعا اتتانىپ، جەڭىسكە لايىق ەكەنىن دالەلدەدى. قازاقتىڭ جاۋىنگەرلىك رۋحى، اسكەري جىگەر، ازامات بويىنداعى كۇش- قۋاتتى الەمگە تانىتتىق.
- كوماندا قۇرامىندا تاجىريبەلى ماماندار جەتكىلىكتى سەكىلدى. كوماندا قۇرامىنا ىرىكتەۋ قالاي جۇرگىزىلدى، سايىسقا قانشا مامان باردى؟
- ىشكى ىستەر مينيسترلىگىنىڭ «سۇڭقار» جاساعىندا بىلىكتى مامان جەتكىلىكتى. جاۋىنگەرلەر قۇرامى تولىق، ءبارى تاجىريبەلى. سوندىقتان كوماندا قۇرامىن ىرىكتەۋ بارىسىندا قيىندىق تۋعان جوق. الەمدىك ارەنادا ەل نامىسىن قورعاپ جۇرگەن جانكەشتى جاۋىنگەرلەر ازىرلىگىن كورسەتىپ، 14 اسكەري جارىستا بارىن سالدى. جەڭىسكە دەگەن ۇمتىلىس سىناقتان سۇرىنبەي وتۋىمىزگە سەپ بولعانداي.
- قىتايلىق كوماندا جالپى ەسەپتە كوش باسىندا بولعانىن كوردىك. جەڭىمپاز كوماندانىڭ قانداي ارتىقشىلىعى بولدى؟
- الدىمەن اتالعان جارىس اسكەري ماماننان قانداي ماشىقتى تالاپ ەتەتىنىن اڭعارۋىمىز كەرەك. سايىستا تەك بىلەكتى جەڭبەيدى، تاكتيكالىق شەشىم مەن ۇجىمنىڭ بىرلەسكەن ارەكەتى ماڭىزدى. دۋبايعا بارار الدىندا كۇندەلىكتى جەكە قۇراممەن تاربيە جۇمىسىن، جاۋىنگەرلىك دايارلىق جۇرگىزىلدى. كوماندانىڭ پسيحولوگيالىق احۋالى، كۇش-جىگەرى باقىلاۋدا بولدى. وسى ماشىقتاردى جەتىلدىرۋ ارقىلى العا جىلجىدىق. ونسىز ەشقانداي ناتيجە بولمايدى.
ق ح ر كومانداسىنىڭ ەرەكشىلىگىنە كەلسەك، مەن بايقاعان بىرنەشە سەبەپتى اتايىن. ولاردا وقۋ-دايىندىق ورتالىعىنىڭ ماتەريالدىق جابدىقتالۋى جوعارى دەڭگەيدە. جاساقتىڭ شتاتتىق سانى دا كوپ. وعان قوسا كوماندا مۇشەلەرى فارماتسيەۆتيكالىق دارۋمەندەردى تۇراقتى قابىلداپ، قارۋ-جاراعىن ساقاداي ساي اكەلگەن. مۇنىڭ بارلىعى جاناما فاكتور بولعانىمەن، كوزگە كورىنەتىن ارتىقشىلىق دەپ سانايمىن. ال جاۋىنگەرلىك دايارلىق تۇرعىسىنان بىزدەن ارتىقشىلىعى جوق. سەبەبى «سۇڭقار» جاساعى قارسىلاستارىمىزعا قاجەتتى تويتارىس بەرە ءبىلدى.
- سايىسقا قازاقستاندىق وزگە كۇشتىك قۇرىلىمدار كوماندا قوسقانىن بايقادىق. سايىس بارىسىندا ءوزارا باسەكە بولدى ما؟
- «The UAE SWAT Challenge 2025» شاراسىنا قازاقستاننان بىرنەشە كوماندانىڭ قاتىسۋى - سالا دامۋىنىڭ كورىنىسى. ياعني، كۇشتىك قۇرىلىمدار دەربەس كوماندا جاساقتاپ، ءوزارا باسەكەگە تۇسەتىن دەڭگەيگە جەتتى دەگەن ءسوز. مۇنداي قولايلى جاعدايعا مينيسترلىك تاراپىنان جۇرگىزىلگەن رەفورمالار، اسكەري مەكتەپتەردىڭ باسەكەگە ىلەسۋ قابىلەتى سەپ بولعانداي.
جارىس بارىسىندا قازاقستاندىق ارىپتەستەرىمىزبەن قاتار ونەر كورسەتكەنىمىزگە قۋانىشتىمىز. شەتەلدە ەل نامىسىن قورعاۋ ابىرويلى مىندەت ەكەنى انىق. بۇل مىندەتتى قاي قۇرىلىم موينىنا العانى ماڭىزدى ەمەس، باستىسى - ساپالى جۇمىس پەن وڭ ناتيجە.
P. S. بۇعان دەيىن مەملەكەت باسشىسى قاسىم-جومارت توقايەۆ «THE UAE SWAT Challenge 2025» سايىسىندا توپ جارعان كۇشتىك قۇرىلىم وفيتسەرلەرىن ماراپاتتاعان بولاتىن.
اۆتور ەرسىن شامشادين
