قازاق قىزى قىتايدا تانىلدى
قازاقستاندىق ءالينۇر جەڭىس اتتى ارۋ قىتايدا تانىلدى، دەپ حابارلايدى 24KZ.
ەكى ەل اراسىندا ءتۇرلى فورۋمدار وتكىزگەن ول «دوستىق ەلشىسى» ناگراداسىن الدى. بۇعان دەيىن مۇنداي ماراپات تەك ديماش قۇدايبەرگەنگە بەرىلىپتى.
ءالينۇر مۇنىمەن شەكتەلمەي، جەكە كاسىپكەرلىكتى دە قولعا العان. بۇگىندە ءوز كوسمەتيكالىق برەندىن قالىپتاستىرىپ، ەلىمىزدە كاسىبىن ورلەتىپ ءجۇر. اسپان استى ەلىنەن 15 جىل بۇرىن كوشكەن ءالينۇر: «اتاجۇرتتا باعىم اشىلدى»، - دەيدى. ەلدە 6 جىل تەگىن وقىپ، ءبىلىم العان.
ءالينۇر جەڭىس، كاسىپكەر:
- دۇرىس شەشىم قابىلداعان اكەمىزگە راقمەت. سەبەبى ميللياردتاعان قىتايلاردىڭ ىشىندە جاي عانا ءبىر مۇشەسى بولامىز عوي. ەلىمىزدى تاپقانىما ريزامىن.
ءالينۇر كاسىبي ديپلومات بولماسا دا، قىتاي مەن قازاقستان اراسىنداعى حالىق ديپلوماتىنا اينالدى. 10 جىل بويى ءتۇرلى فورۋم مەن كورمە وتكىزىپ، حالىق جادىندا قالدى. ەل دامۋى ءۇشىن شەتەلدىك ينۆەستورلاردى تارتتى. استە بۇل ەڭبەگى ەسكەرۋسىز قالعان جوق.
بۇگىندە ءالينۇر العاشقىلاردىڭ ءبىرى بولىپ ۇلتتىق ناقىشتاعى كوسمەتيكا ونىمدەرىن شىعارادى. 20 ەلدە تۇتىنۋشىسى بار برەند ۇلتتىق بولمىسىمىزدى ودان ءارى تانىتسا ەكەن دەيدى. كاسىبى ورلەسە، زاۋىت اشۋعا نيەتتى.
ءالينۇر جەڭىس، كاسىپكەر:
- بەتكە ۇستار ۆيزيتكا دەيدى عوي، سونداي بولسا ەكەن دەيمىن. ويتكەنى شەتەلدە كوپتەگەن كىسىلەر كەلەدى دە «سىزدەردە شوكولاد پەن بالدان باسقا نارسە جوق اۋەجايدا» دەپ ايتادى. سوندىقتان مەن اۋەجايلارعا كىرگىم كەلەدى. ءبىزدىڭ ەلدە ۇلتتىق ناقىشتاعى ونىمدەر بار ەكەنىن كورسەتكىم كەلەدى.
كاسىپكەردىڭ ماقسات- مۇراتى مۇنىمەن شەكتەلمەيدى. حالىقارالىق ستاندارتقا ساي ۇلكەن بالاباقشا اشۋدى كوزدەيدى. باستىسى، كاسىپ باستاۋعا نيەت بولسا، ەلدە بۇعان بارلىق جاعداي جاسالعان، - دەيدى.
