قازاق مەكتەپتەرى رەسەيدىڭ قاي وڭىرلەرىندە سالىنادى - عاني بەيسەمبايەۆ جاۋابى

ب ا ق وكىلدەرى مينيستردەن استراحان وبلىسىندا، ورىنبور مەن تومبىدا قازاق مەكتەبى اشىلاتىندىعى ايتىلعانىن، ماسەلە قالاي جۇرگىزىلىپ جاتقانىن سۇراعان ەدى.

- ءوڭىر دەرەكتەرى زەردەلەنىپ جاتىر. بۇل بۇتىندەي كەلىسسوز پروتسەسى. شامامەن قالالار انىقتالعان. كەلەسى كەزەڭ - ورنىن انىقتاۋ. قالا تاڭدالعان كەزدە قازاق باۋىرلارىمىز كوپ شوعىرلانعان جەرلەرىندە مەكتەپ سالۋ باستى ماقسات رەتىندە قاراستىرىلادى. بۇل قالالاردىڭ تاڭدالۋى دا، سول جەردە مەكتەپ سالۋ دا پىسىقتالىپ جاتىر. ءالى دە ءبىرشاما ۋاقىت الادى. ويتكەنى، جەرىن انىقتاۋ، كەلىسىمشارتقا قول قويۋ، ودان كەيىن قارجىسىن شەشۋ، قۇرىلىسى قانداي بولاتىندىعىن انىقتاۋعا ءبىرشاما ۋاقىت كەتەدى. ءبىراق، مەكتەپ سالۋ بويىنشا شەشىم قابىلدانعان. وسى باعىتتا ەكى تاراپتا دا جۇمىس جۇرگىزىپ جاتىر، - دەدى عاني بەيسەمبايەۆ.

ەسكە سالساق، قازاقستان پرەزيدەنتى قاسىم-جومارت توقايەۆ «يزۆەستيا» گازەتىنە جاريالانعان ماقالاسىندا رەسەي قالالارىندا قازاقستان مەكتەپتەرى اشىلاتىنىنا سەنەتىنىن ايتقان ەدى.

اۆتور
مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى