قازاق ۇلتتىق تاعامدارىن دايىندايتىن مەيرامحانا حالىقارالىق ۇزدىكتەر تىزىمىنە ەندى
استانا. قازاقپارات - Qazaq Gourmet مەيرامحاناسى 50 Best Discovery بەدەلدى حالىقارالىق تىزىمىنە ەندى. بۇل جايىندا Kazakh Tourism ۇلتتىق كومپانياسى حابارلادى.
بۇل شارا - قازاقتىڭ ۇلتتىق تاعامدارى مەن قازاقستاننىڭ گاسترونوميالىق يندۋسترياسىنىڭ الەمدىك ارەناداعى مويىندالۋى مەن تانىلۋىنىڭ ايعاعى.
50 Best Discovery - بۇكىل الەمنەن The World’s 50 Best Restaurants جانە The World’s 50 Best Bars سىيلىعىنىڭ ساراپشىلارى تاڭداعان، مەيرامحانالار مەن بارلاردىڭ تاڭداۋلى جيىنتىعى بولىپ تابىلاتىن بەدەلدى حالىقارالىق پلاتفورما.
بۇل ءتىزىم اسپازداردىڭ، رەستوراتورلاردىڭ، سىنشىلاردىڭ جانە 1000-نان اسا تاۋەلسىز بەدەلدى مامانداردىڭ ۇسىنىستارىنا نەگىزدەلگەن.
ول ەكسكليۋزيۆتى مەيرامحانالاردان كوشە تاعامدارىنا دەيىن، گاسترونوميا سۇيەر قاۋىمعا ءارتۇرلى مادەنيەتتەر مەن ەلدەردىڭ بىرەگەي دامدىك اسەرلەرى مەن كۋلينارلىق جاڭالىقتارىن ۇسىنىپ، جاڭا گاسترونوميالىق ۇردىستەردى بەينەلەيتىن جانە ۇنەمى جاڭارتىلىپ وتىراتىن كۋلينارلىق تاجىريبەلەردىڭ كەڭ سپەكترىن قامتيدى.
اۆتور
جانات قاپالبايەۆا
