قازاق جاستارى تۋرالى الەمنىڭ ءار تۇكپىرىندە قارا جۇمىس ىستەۋگە ءماجبۇر - دەپۋتات

«بۇل ساۋالدى وزگە ەلدە زاڭسىز ەڭبەك ميگرانتى اتانىپ، قۇقىعى قورعالماي، قاۋىپ قايدان كەلەدى دەپ جاۋتەڭدەپ وتىرعان 20 مىڭنان استام قازاق بالاسىنىڭ ارىزى دەپ ءبىلىڭىز. جالاقىعا جارىماي، تاباقتاي ديپلومىنا لايىقتى جۇمىس تاپپاي، قازاق جاستارى قازىر الەمنىڭ ءار تۇكپىرىندە قارا جۇمىس ىستەۋگە ءماجبۇر. ولاردى سوگۋگە ەشكىمنىڭ قۇقىعى جوق. قازىر سول ازاماتتارىمىز زاڭدىق تۇرعىدا ەش قورعانسىز قالىپ جاتىر. ونىڭ ءبىر دالەلى - وڭتۇستىك كورەيادا ەڭبەك ەتىپ جاتقان وتانداستارىمىز. رەسمي دەرەككە توقتالساق، 2022-جىلعى جاعداي بويىنشا وڭتۇستىك كورەيادا ەلىمىزدىڭ 9600 ازاماتى زاڭسىز ەڭبەك ميگرانتى بولىپ جۇمىس ىستەدى. ال وتانداستارىمىزدىڭ باسىن بىرىكتىرەتىن ورتالىقتار قازىر وڭتۇستىك كورەيادا 20 مىڭعا جۋىق قازاقستاندىق جۇرگەنىن ايتىپ جاتىر. زاڭسىز جۇرگەن ەڭبەك ميگرانتىنىڭ جاعدايى تۇسىنىكتى. ەڭبەك قۇقىعى قورعالمايدى، زاڭعا سۇيەنىپ جۇمىس بەرۋشىدەن ءوز قۇقىعىن تالاپ ەتە المايدى»، - دەدى ن. سارسەنعاليەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

بۇل تۇرعىدا ول شەتەلدە دەنساۋلىعىنا زاقىم كەلگەن قازاقستان ازاماتتارىنا ەشكىم وتەماقى تولەمەيتىنىن، سونداي-اق جۇمىس بەرۋشى ولاردى زاڭسىز ەڭبەك ميگرانتى رەتىندە قۇزىرلى ورىندارعا ۇستاتىپ جىبەرە الاتىنىن ايتتى.

«وتانداستارىمىزدىڭ قۇقىعى قورعالماۋىنىڭ سەبەبى - ەكىجاقتى كەلىسىمشارت نەگىزىندە ۇسىنىلاتىن ە-9 ۋاقىتشا ەڭبەك ۆيزاسىنىڭ بەرىلمەۋى. مەملەكەت باسشىسى ۇكىمەتكە ماسەلەنى شەشۋدى تاپسىرعان بولاتىن. ءبىراق ءالى كۇنگە دەيىن بۇل تۇيتكىلدىڭ ءتۇيىنى تارقاعان جوق. كورەيا رەسپۋبليكاسىمەن 16 ەل «ەڭبەككە رۇقسات بەرۋ جۇيەسى» اتتى شەتەلدىكتەردى جۇمىسقا ورنالاستىرۋ جۇيەسىنە قوسىلعانىن بىلەمىز. اتالعان جۇيەگە قازاقستان نەگە قوسىلا الماي كەلەدى؟»، - دەدى دەپۋتات.

وسى ورايدا ول قازاقستاندىقتار قاشان وڭتۇستىك كورەيادا زاڭدى ەڭبەك ميگرانتى رەتىندە ەڭبەك ەتە الاتىنىن سۇرادى.

«بۇل رەتتە ەكى ۇسىنىس بار. بىرىنشىدەن، قازاقستاندى «ەڭبەككە رۇقسات بەرۋ جۇيەسىنە» قوسۋ ءۇشىن ءتيىستى ءىس-شارالار جوسپارىن جەدەل پىسىقتاۋدى تاپسىرۋ كەرەك. ەكىنشىدەن، ەكى ەل اراسىندا ورتاق كەلىسىم جاسالعانشا، وڭتۇستىك كورەيادا زاڭسىز ەڭبەك ميگرانتى بوپ جۇرگەن 20 مىڭعا جۋىق قازاقستاندىقتىڭ قۇقىعىن قورعايتىن زاڭدى تەتىكتى تەزىرەك تابۋ قاجەت»، - دەدى نارتاي سارسەنعاليەۆ.

ەسكە سالايىق، بۇعان دەيىن كورەيا رەسپۋبليكاسى زاڭسىز يمميگرانتتار ءۇشىن «جاسىل ءدالىز» جاريالاعان بولاتىن. وعان سايكەس زاڭسىز جۇرگەن شەتەلدىكتەرگە وسى جىلدىڭ 31- جەلتوقسانىنا دەيىن ءوز ەركىمەن ەلدەن شىعۋىنا مۇمكىندىك بەرىلەدى.

سونداي-اق وڭتۇستىك كورەياعا زاڭسىز كىرگەنى ءۇشىن ەكى قازاقستاندىققا سوت ۇكىمى شىققان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى