قازاق ءتىلىن ءبىلۋ تالابى كەيبىر ازاماتتاردىڭ قۇقىعىن شەكتەيدى - مەملەكەتتىك قىزمەت اگەنتتىگى
ورتالىق كوممۋنيكاتسيالار قىزمەتىندە وتكەن بريفينگىدە مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى ازامات جولمانوۆ مەملەكەتتىك قىزمەتشىگە قازاق ءتىلىن ەركىن مەڭگەرۋ تالابىن قويۋ نورماسى نەلىكتەن الىنىپ تاستالعانىن ءتۇسىندىردى، دەپ حابارلايدى Kazinform.
باسپا ءسوز ءماسليحاتىندا ب ا ق وكىلدەرى ازامات جولمانوۆقا 2021 -جىلى مەملەكەتتىك قىزمەتكە ورنالاسۋعا نيەتتى كانديدات قازاق ءتىلىن مىندەتتى تۇردە مەڭگەرۋى كەرەك دەگەن باستاما كوتەرىلگەنىن ەسكە سالىپ، قازىر مۇنداي تالاپتىڭ بار-جوعىن سۇرادى.
«شىنىمەن دە، 2021 -جىلى زاڭ جوباسىندا وسىنداي ماسەلەلەر قاراستىرىلعان بولاتىن. تالقىلاۋ كەزىندە وسى نورمانىڭ كەيبىر ازاماتتاردىڭ قۇقىعىن شەكتەيتىنى انىقتالدى. كونستيتۋتسياعا سايكەس، مەملەكەتتىك قىزمەتكە كىرەردە ەشكىمكە ءدىنى، ءتىلى، ۇلتى ارقىلى ديسكريميناتسيا جاساۋعا بولمايدى. سوندىقتان ءبىز بۇل ماسەلەنى الىپ تاستادىق. الايدا، پرەزيدەنتتىك جاستار كادرلىق رەزەرۆىنە ىرىكتەۋ كەزىندە B1 دەڭگەيىنەن تومەن مەڭگەرگەن كانديداتتار جىبەرىلمەيدى. سونىمەن قاتار اكادەمياعا تۇسەتىن مەملەكەتتىك قىزمەتشىلەر دە قازاق ءتىلىن ءبىلۋى ءتيىس»، - دەدى ازامات جولمانوۆ ورتالىق كوممۋنيكاتسيالار قىزمەتىندە وتكەن بريفينگىدە.
قوسا كەتەيىك، بيىل مەملەكەتتىك قىزمەت بەدەلىنە نۇقسان كەلتىرگەن 92 مامان جاۋاپقا تارتىلدى. ال جالپى 9 ايدىڭ قورىتىندىسى بويىنشا ادەپ كەڭەستەرىندە مەملەكەتتىك قىزمەتشىلەرگە قاتىستى 300 دەن استام تارتىپتىك ءىس قارالعان.
اۆتور
ءاليحان اسقار
