قازاق ءتىلى ءۇشىن جاڭا سيفرلىق پلاتفورما جاسالادى - ايماعامبەتوۆ

- ءبىزدىڭ اۆتورلىعىمىزبەن دايىندالعان زاڭ دارىندى جاستاردى قولداپ، مەملەكەتتىك ءتىلدى دامىتۋعا مۇمكىندىك جاساپ، جاساندى ينتەللەكتپەن ۇيلەستىرىپ، ءبىلىم بەرۋ جۇيەسىن جەتىلدىرۋگە باعىتتالعان. ەڭ بەدەلدى حالىقارالىق عىلىمي جارىستاردا جەڭىمپاز اتانعان وقۋشىلار ۇ ب ت تاپسىرماي- اق مەملەكەتتىك گرانتپەن ۋنيۆەرسيتەتكە تۇسە الادى. بۇل ولاردىڭ ەلدە ءبىلىم الىپ، قازاقستاننىڭ دامۋىنا ۇلەس قوسۋىنا جول اشادى. بۇرىن مۇنداي مۇمكىندىك تەك وليمپيادا جەڭىمپازدارىنا عانا بەرىلەتىن، - دەدى اسحات ايماعامبەتوۆ.

ول «بولاشاق» باعدارلاماسى كەڭەيتىلىپ، ەندى باكالاۆريات دەڭگەيىندە دە بەرىلەتىنىن اتاپ ءوتتى.

- بۇرىن «بولاشاق» ستيپەندياسى تەك ماگيستراتۋرا مەن دوكتورانتۋراعا ارنالعان بولسا، ەندى حالىقارالىق وليمپيادا جەڭىمپازدارى باكالاۆريات دەڭگەيىندە دە وقۋ مۇمكىندىگىنە يە بولادى، - دەدى دەپۋتات.

قازاق ءتىلى ءۇشىن جاڭا سيفرلىق پلاتفورما جاسالادى.

- قازاق ءتىلىنىڭ سيفرلىق ۇلتتىق سوزدىك قورى جانە ۇلتتىق ءتىل كورپۋسى زاڭمەن رەتتەلدى. بۇل جاساندى ينتەللەكتتەردىڭ (ChatGPT، اليسا جانە ت. ب. ) قازاق تىلىندە ساپالى جۇمىس ىستەۋىنە مۇمكىندىك بەرەدى. مەملەكەت باسشىسى بۇل ماڭىزدى ماسەلەنى ءوز باقىلاۋىندا ۇستاپ وتىر، - دەدى ول.

دەپۋتات قازاق ءتىلىنىڭ بارلىق نورمالارى مەن ەرەجەلەرى ونلاين اشىق جۇيەدە قولجەتىمدى بولاتىنىن ايتتى.

- بۇل باستامانىڭ باستى ماقساتى - قازاق ءتىلىن جاساندى ينتەللەكتپەن ۇيلەستىرۋ جانە تسيفرلىق الەمدە ونىڭ ساپالى جۇمىس ىستەۋىنە جاعداي جاساۋ، - دەدى اسحات ايماعامبەتوۆ.

سيفرلىق سوزدىك قوردىڭ ماڭىزى:

1 . جاساندى ينتەللەكت ءۇشىن بازا:
بۇل سوزدىك قور جاساندى ينتەللەكتكە قازاق تىلىندە دۇرىس سويلەۋدى، سوزدەردى كونتەكستكە ساي قولدانۋدى ۇيرەتەدى.

2. كۇندەلىكتى قولدانىس:
اشىق اقپاراتتىق جۇيە ارقىلى كەز كەلگەن ازامات سوزدەردىڭ دۇرىس ەملەسىن، ناقتى ماعىناسىن وڭاي تابا الادى.

3. ءبىلىم بەرۋ:
وقۋشىلار، ستۋدەنتتەر مەن مۇعالىمدەرگە ساپالى سوزدىكتەر مەن انىقتامالىقتارعا قول جەتكىزۋ مۇمكىندىگى بەرىلەدى. بۇل وقۋ مەن وقىتۋ ۇدەرىسىن جەڭىلدەتەدى.

- سيفرلىق سوزدىك قور - بۇل جاي عانا سوزدەردىڭ ءتىزىمى ەمەس. بۇل - ءتىلدى تۇسىنەتىن، ونى دۇرىس قولدانا الاتىن ينتەللەكتۋالدى پلاتفورما، - دەپ اتاپ ءوتتى ايماعامبەتوۆ.

ەسكە سالساق اسحات ايماعامبەتوۆ ەڭبەك نارىعىنداعى تەڭسىزدىك پەن ماماندار تاپشىلىعى ماسەلەسىن كوتەرگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى