قازاق بالالارى افريكا اسىپ كەتتى مە: سىرتقى ىستەر مينيسترلىگى دارحان قىدىرالىڭ فاكتىلەرىن جوققا شىعاردى

«شەتەلدىكتەر اسىراپ العان بالا 18 جاسقا دەيىن قازاقستان ازاماتى بولىپ قالا بەرەدى. ونى ءبىزدىڭ شەتەلدەگى كونسۋلدار كومەكتەسىپ، باقىلاپ جۇرەدى - ارنايى باعدارلاما بار. ءبىراق 18-گە تولعاننان كەيىن ول قاي ەلدىڭ ازاماتتىعىن الاتىنىن ءوزى شەشۋى كەرەك. ەگەر 18-دەن كەيىن سول ەلدىڭ ازاماتتىعىن السا، ءبىز ەشقانداي ارەكەت جاساي المايمىز، ءوزىنىڭ جەكە شەشىمى. ءبىراق 18 جاسقا دەيىن اسىراپ العان اتا-انالار كونسۋلعا ەسەپ بەرىپ تۇرۋى كەرەك. ال باعانا ءسىز ايتىپ وتىرعان «بىرنەشە بالا تۋرالى اقپارات جوق» دەگەن مالىمەت شىندىققا سايكەس كەلمەيدى. ويتكەنى بارلىق بالا بويىنشا اقپارات جيناپ وتىرامىز. ارينە، كەيبىر كەزدە ءبىر مەكەنجايدان باسقا مەكەنجايعا كوشىپ كەتىپ، اقپارات بولماي قالۋى مۇمكىن»، - دەدى سىرتقى ىستەر مينيسترلىگىنىڭ رەسمي وكىلى.

ونىڭ ايتۋىنشا، قازاق بالالارى شەتەلگە العاش جىبەرىلە باستاعاندا «تەك باتىس ەلدەرىنە بەرىلسىن» دەگەن تالاپ بولعان.

«سونىمەن قاتار «قازاق بالالارىن ءبىراز ەكزوتيكالىق ەلدەرگە الىپ كەتتى» دەگەن دە اقپاراتتى وقىدىم. ولاي ەمەس. ويتكەنى بىزدە كەزىندە توقسانىنشى جىلدارى «بالالاردى تەك باتىس ەلدەرىنىڭ وكىلدەرىنە بەرەتىن» تالاپ بولعان. باتىس ەلدەرىنىڭ ازاماتتارى سول ەلدەردە ديپلومات بولىپ جۇمىس ىستەۋى مۇمكىن. سولار اسىراپ العان. ال افريكالىق ەلدەرگە ءبىز بالالاردى بەرمەيمىز»، - دەدى ايبەك سمادياروۆ.

س ءى م رەسمي وكىلى قازىرگى تاڭدا 18 جاسقا دەيىنگى 1993 بالا كونسۋلدىق ەسەپتە تۇرعانىن جەتكىزدى.

«سەناتور دارحان قىدىرالى جۇزدەن اسا بالانى افريكا ەلدەرىنە اسىراپ الىپ كەتتى دەدى. ول اقپارات وتىرىك پە؟» دەپ ناقتىلادى ب ا ق وكىلى.

«ول اقپاراتتى قايدان العانىن بىلمەيمىن. بىزدەگى بار مالىمەتكە سايكەس، افريكا ەلدەرىنە بالا بەرگەن جوقپىز. شىندىققا جاناسپايدى»، - دەدى ايبەك سمادياروۆ.

ەسكە سالساق، سەناتور دارحان قىدىرالى وڭتۇستىك افريكا ەلىنە كەتكەن 30 بالادان حابار- وشار جوق ەكەنىن ءمالىم ەتكەن.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى