قازاق انيماتسيانى استاناعا كوشىرۋ كىمگە كەرەك - ۆيتسە-مينيستر جاۋابى

- الماتىداعى انيماتورلار «قازاق انيماتسيا» شىعارماشىلىق بىرلەستىگىن استاناعا كوشىرۋگە قارسى ەكەندەرىن ءبىلدىرىپ جاتىر. شەشىم ناقتى قابىلداندى ما، قابىلدانسا، الماتىداعى ۇجىمدى استاناعا كوشىرۋ كىمگە كەرەك؟ - دەپ سۇرادى جۋرناليست.

ۆيتسە-مينيستر جاۋابى انيماتسيانى دامىتۋعا ارنالعان ستراتەگيا ازىرلەپ جاتقاندارىنان باستادى.

- ءبىز قازىر انيماتسيانى دامىتۋدىڭ الداعى 5 جىلعا ارنالعان كەشەندى جوسپارىن ازىرلەپ جاتىرمىز. ول جوسپاردا قارجىلاندىرۋ تەتىكتەرى دە قاراستىرىلعان. «قازاق انيماتسيا» شىعارماشىلىق بىرلەستىگىن استاناعا كوشىرۋ تۋرالى پايىمدار دا بار. ونداي پايىمعا نە نەگىز بولىپ وتىر؟

بىرىنشىدەن، ءوزىڭىز بىلەتىندەي، بۇل جەردە Astana hub ورتالىعى ورنالاسقان. انيماتسيالىق قىزمەت IT- يندۋستريانىڭ دا ءبىر بولشەگى بولىپ ەسەپتەلەدى. Astana hub-تاعى يمپۋلس انيماتسيانىڭ دامۋىنا دا سەرپىن بەرەدى دەگەن ءۇمىت بار.

ەكىنشىدەن، بۇل جەردە جىل سايىن Comic Con فەستيۆالى وتەدى. بۇل جالپى تۇتاس انيماتسيا سالاسىنا ارنالعان، بۇكىل ت م د اۋماعىنداعى ەڭ نەگىزگى شاراعا اينالىپ ۇلگەردى.

ۇشىنشىدەن، كرەاتيۆتى يندۋستريانى قولداۋعا ارنالعان مامانداندىرىلعان قوردىڭ قۇرىلاتىنىن ايتتىم. وسى سەبەپتەردى نەگىزىندە بىرلەستىكتى استاناعا كوشىرۋ تۋرالى پايىمعا كەلىپ وتىرمىز دەۋگە بولادى، - دەدى ەۆگەني كوچەتوۆ.

ۆيتسە-ءمينيستردىڭ ايتۋىنشا، پايىم بار بولعانىمەن ناقتى شەشىم ءالى قابىلدانباعان.

- انيماتسيانى دامىتۋدىڭ ستراتەگياسىن دايىنداپ بولعان كەزدە اقتىق شەشىم بەلگىلى بولادى. قازىرگى پايىمىمىز وسىنداي. مەنىڭشە، بۇل «قازاق انيماتسيانى» ءارى قاراي دامىتۋ تۇرعىسىنان بارىنشا قيسىنعا كەلەتىن پايىم سياقتى. ءبىز انيماتورلاردىڭ بارىمەن بايلانىستامىز، ولاردىڭ ۋاجدەرىمەن دە تانىسپىز. ماسەلە ءالى تالقىلاۋ پروتسەسىندە. انيماتورلارمەن ءبىر-ەكى رەت كەزدەستىك تە. ءبارىنىڭ پىكىرى ەسكەرىلەدى. ونسىز ەشكىم شەشىم قابىلدامايدى، - دەدى ەۆگەنيي كوچەتوۆ.

بۇعان دەيىن ۇكىمەت اۆتورلىق قۇقىق ماسەلەسىنە مەملەكەتتىك مونوپوليا ەنگىزۋ ۇسىنىسىن قولداماي تاستاعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى