قازا تاپقان 17 كەنشىنىڭ وتباسىنا الەۋمەتتىك تولەم تاعايىندالدى
ق ر ەڭبەك جانە حالىقتى الەۋمەتتىك قورعاۋ مينيسترلىگى مەن مەملەكەتتىك الەۋمەتتىك ساقتاندىرۋ قورى كوستەنكو اتىنداعى شاحتادا بولعان اپات سالدارىنان قازا تاپقان 17 كەنشىنىڭ بالالارىنا جاردەماقىلار مەن تولەمدەر تاعايىندادى، دەپ حابارلايدى Kazinform.
مينيسترلىكتىڭ مالىمەتىنشە، قايتىس بولعان 46 كەنشىنىڭ 21 ءىنىڭ قامقورلىعىنداعىلارعا مىناداي الەۋمەتتىك قولداۋ كورسەتىلەدى:
رەسپۋبليكالىق بيۋدجەت قاراجاتى ەسەبىنەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى.
وسى جاردەماقىنىڭ مولشەرى قايتىس بولعان ادامنىڭ اسىراۋىنداعى ادامداردىڭ سانىنا قاراي ايقىندالادى جانە ولاردىڭ اي سايىنعى مولشەرى 37322 تەڭگەدەن (1 بالاعا) 111560 تەڭگەگە دەيىن (5 بالاعا) بولادى.
جاردەماقىنىڭ بۇل ءتۇرى 8 جاسقا دەيىنگى بالا كۇتىمىن جۇزەگە اسىراتىن جۇمىس ىستەمەيتىن انالارعا دا تاعايىندالدى.
مەملەكەتتىك الەۋمەتتىك ساقتاندىرۋ قورىنىڭ (بۇدان ءارى –م ءا س ق) قاراجاتى ەسەبىنەن اسىراۋشىسىنان ايىرىلۋ جاعدايى بويىنشا الەۋمەتتىك تولەم.
بۇل تولەمنىڭ مولشەرى قايتىس بولعان ادامنىڭ تابىسى مەن ونىڭ الەۋمەتتىك ساقتاندىرۋ جۇيەسىنە قاتىسۋ ءوتىلى نەگىزىندە انىقتالادى. تولەمدەر مولشەرى ايىنا 56 مىڭ تەڭگەدەن 272 مىڭ تەڭگەگە دەيىنگى ارالىقتا جۇرەدى.
قولدانىستاعى زاڭناماعا سايكەس اسىراۋشىسىنان ايىرىلۋ جاعدايى بويىنشا تولەمدەر بالالار 18 جاسقا تولعانعا دەيىن، ال جوعارى وقۋ ورىندارىندا كۇندىزگى بولىمدە وقىعان جاعدايدا 23 جاسقا دەيىن تولەنەتىنىن ەسكە سالا كەتەيىك.
ايتا كەتۋ كەرەك، جاردەماقىلار مەن الەۋمەتتىك تولەمدەر قايتىس بولۋ تۋرالى كۋالىك نەگىزىندە تاعايىندالادى. بۇل باعىتتاعى جۇمىس جالعاسىپ جاتىر.
