قايىرىمدىلىق قورلارى قانشا سالىق تولەپ ءجۇر

- 2023 -جىلى قايىرىمدىق قورلارى مەملەكەتكە 426,1 ميلليون تەڭگە، تابىس كوزىنەن %6,6 كولەمىندە سالىق تولەدى، - دەپ جازىلعان رەسمي مالىمەتتە.

الايدا بۇل - قايىرىمدىلىق قورلارىنىڭ بۇكىل تابىسىنىڭ 6,6 پايىزى 426,1 ميلليون تەڭگە دەگەن ءسوز ەمەس. ويتكەنى، كوميتەت ماماندارىنىڭ تۇسىندىرۋىنشە، قايىرىمدىلىق قورلارى كوممەرتسيالىق ەمەس ۇيىم بولىپ ەسەپتەلەتىندىكتەن، قىزمەتىنە قاراي تابىسىنا سالىناتىن سالىق مولشەرلەمەسى دە اركەلكى.

سالىق كودەكسىنىڭ 289-بابىنىڭ 2-تارماعى بويىنشا جەكە مۇددەسىنە كىرىس الۋدى ماقسات تۇتپايتىن، قىزمەتىنىڭ ناتيجەسىندە الىنعان دارا كىرىستى نەمەسە مۇلىكتى ءوزارا ءبولىپ المايتىن ۇيىمداردىڭ مىنا ساناتتاعى تابىستارىنا سالىق سالىنبايدى:

مەملەكەتتىك الەۋمەتتىك تاپسىرىستى ىسكە اسىرۋ شارتىنان تۇسكەن تابىس؛
دەپوزيت سىياقىلارى؛
ۇيىمعا كىرۋ جانە مۇشەلىك جارنالارى؛
كوپپاتەرلى تۇرعىن ۇيدەگى پاتەرلەر مەن تۇرعىن ەمەس ءۇي-جايلاردىڭ يەلەرى جاساعان جارنالار؛
دەپوزيتكە ورنالاستىرىلعان اقشانىڭ سىياقىسىنان تۋىنداعان باعام ايىرماسى؛
وتەۋسىز الىنعان مۇلىك تۇرىندەگى تابىس، (قايىرىمدىلىق كومەك، گرانت، دەمەۋشىلىك كومەك، وتەۋسىز نەگىزدە الىنعان اقشا جانە باسقا دا مۇلىك).
- سالىق كودەكسىنىڭ 289-بابىنىڭ 2-تارماعىندا كورسەتىلمەگەن كوممەرتسيالىق ەمەس ۇيىمداردىڭ تابىستارىنا جالپىعا بىردەي تارتىپتە سالىق سالىنادى، - دەلىنگەن جاۋاپتا.

ايتا كەتەيىك، قازىر حالىق اراسىندا قايىرىمدىلىق قورلاردىڭ جۇمىسىنا زاڭمەن تىيىم سالىنۋى مۇمكىن دەگەن بولجامدار ايتىلىپ ءجۇر. مەملەكەتتىك ورگاندار مۇنى شەكتەۋ نەمەسە تىيىم سالۋ ەمەس، قىزمەتىن جەتىلدىرۋ شاراسى دەپ تۇسىندىرەدى.

جۇرت ىشىندە وسىنداي اڭگىمە تاراعان كەزدە «ءبىز بىرگەمىز» قورى ارقىلى تانىمال بولعان پەريزات قايرات تاسقىن سالدارىن جويۋعا جينالعان قايىرىمدىلىق قاراجاتتان 1,5 ميلليارد تەڭگەدەن استام اقشا جىمقىردى دەگەن كۇدىكپەن ۇستالىپ، ەكى ايعا قاماۋعا الىندى.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى