قايىڭدىعا جول، كولسايعا قاتىنايتىن ەلەكتروموبيلدەر جانە تۇراق: جوبالار قالاي جۇزەگە اسىپ جاتىر

قايىڭدى كولىنە جاڭا جول سالۋ ماسەلەسى كوپتەن بەرى ايتىلىپ كەلەدى، اسىرەسە اتالعان جوبا 2023 -جىلدىڭ كۇزىندە قايىڭدى-ساتى تاۋلى جولىندا جولاۋشىلار مىنگەن اۆتوبۋس ۋاز كولىگىمەن سوقتىعىسقان قايعىلى جاعدايدان كەيىن قىزۋ تالقىلانىپ جاتىر.

جول 2024 -جىلى سالىناتىنى بەلگىلى بولدى.

الايدا جوبا ءالى جۇزەگە اسىرىلعان جوق. تۋريستەر كۇنى بۇگىنگە دەيىن ەسكى ۋاز كولىكتەرىمەن قاتىناۋعا ءماجبۇر.

الماتى وبلىستىق تۋريزم باسقارماسىنان اتاپ وتكەندەي، قايىڭدى كولىنە اسفالت جولىنىڭ قۇرىلىسى سوناۋ 2019 -جىلى جەرگە ورنالاستىرۋ جوباسىن ازىرلەۋ مەن مەملەكەتتىك اكتىنى الۋدان باستالعان.

جوبالىق- سمەتالىق قۇجاتتارى بەكىتىلىپ، قۇرىلىس- مونتاجداۋ جۇمىستارىنىڭ قۇنى - 1,2 ميلليارد تەڭگەگە باعالاندى.

باس مەردىگەر «BS Build» كومپانياسى 2021 -جىلى 10 شاقىرىم ۋچاسكەنى جوندەۋگە كىرىستى. وعان 190 ميلليون تەڭگە ءبولىندى.

الايدا، 2022-2023 -جىلدارى جوبالىق- سمەتالىق قۇجاتتامانى قايتا ەسەپتەۋگە جانە قۇجاتتاردى مەملەكەتتىك ساراپتاماعا دايىنداۋعا بايلانىستى جۇمىس ۋاقىتشا توقتاتىلدى. 2024 -جىلى جوبالىق- سمەتالىق قۇجاتتامانىڭ قۇنى قايتا ەسەپتەلىپ، 2,4 ميلليارد تەڭگە بولدى.

- 2024 -جىلدىڭ 27 -قازانىندا باس مەردىگەر الماتى قالاسىنىڭ اۋدانارالىق ەكونوميكالىق سوتىنا تاپسىرىس بەرۋشى «جولاۋشىلار كولىگى جانە اۆتوموبيل جولدارى باسقارماسى» م م- ءنىڭ ۇستىنەن تالاپ ارىزبەن جۇگىندى. 2025 -جىلدىڭ 8- قاڭتارىندا كەلىسىمنىڭ بولماۋىنا جانە 2023 -جىلدان باستاپ قاراجات بولىنبەگەندىكتەن سوت مەردىگەرمەن كەلىسىمشارتتى بۇزۋ تۋرالى شەشىم شىعاردى، - دەپ اتاپ ءوتتى باسقارمادان.

قازىر بۇل نىساننىڭ جوبالىق-سمەتالىق قۇجاتتاماسىن 24589355 تەڭگەگە قايتا ەسەپتەۋ جوسپاردا. ەسەپتەۋ اياقتالعاننان كەيىن ونىڭ ناقتى قۇنى انىقتالادى.

قايىڭدى كولىنە جاڭا جول سالىنعانان كەيىن تۋريستەر جەكە كولىكتەرىمەن قاتىناي الا ما

- قازىر تۋريستەرگە جەكە كولىكتەرىمەن قايىڭدى كولىنە دەيىن بارۋ شەكتەلگەن. كولىكتەرىن ارنايى تۇراققا قالدىرادى. بۇل شەشىم كولدىڭ ەكولوگياسىن قورعاۋ جانە ونىڭ بىرەگەي تابيعاتىن ساقتاۋ قاجەتتىلىگىنەن تۋىنداپ وتىر. سونىمەن قاتار، كولىكتەردىڭ قوسىمشا اعىنى كەپتەلىستەرگە اكەلىپ، تۋريستەردىڭ جايلىلىعىنا اسەر ەتەدى. بولاشاقتا بۇل تاجىريبە قورشاعان ورتاعا تيگىزەتىن اسەردى بارىنشا ازايتۋ جانە ينفراقۇرىلىمنىڭ شامادان تىس جۇكتەلۋىنە جول بەرمەۋ ءۇشىن ساقتالۋى مۇمكىن، - دەپ جاۋاپ بەردى باسقارمادان.

ينفراقۇرىلىمدى جاقسارتۋ

2024 -جىلى الماتى وبلىسىنىڭ تۋريزم باسقارماسى قايىڭدى كولىنە اپاراتىن ۇزىندىعى 425 مەتر جاياۋ جۇرگىنشىلەر جولىن اباتتاندىرۋ جۇمىستارىن اياقتادى. بۇل جۇمىستار «كولساي كولدەرى» مەملەكەتتىك ۇلتتىق تابيعي پاركىنىڭ اۋماعىندا ينفراقۇرىلىمدى جاقسارتۋ جانە تۋريستەردىڭ كولگە جايلى ءارى ءقاۋىپسىز بارۋىن قامتاماسىز ەتۋ ماقساتىندا جۇرگىزىلدى.

كولسايعا ەلەكتروموبيلمەن بارادى

- ساتى اۋىلىندا تۋريستەر جەكە كولىكتەرىن، تۋرفيرمالار اۆتوبۋستارىن قوياتىن ۇلكەن اۆتوتۇراق ۇيىمداستىرۋ جوباسى بويىنشا بايقاۋ جاريالانادى. 2023 -جىلى 1,5 گەكتار جەرگە تۇراق سالۋعا جوبالىق-سمەتالىق قۇجاتتاما ازىرلەندى. جوبانىڭ جالپى قۇنى -10 ميلليون تەڭگە. بارلىق قاجەتتى قاراجات ءبولىنىپ، مەردىگەر «قورعان گەودەزيا» جاۋاپكەرشىلىگى شەكتەۋلى سەرىكتەستىگىمەن كەلىسىم-شارت جاسالدى. اۆتوتۇراقتىڭ سمەتالىق قۇنى - 394,3 ميلليون تەڭگە. بىلتىر مەملەكەتتىك ساراپتامادان وڭ قورىتىندى الىندى. قازىر جوبا وبلىستىق مەملەكەتتىك ساتىپ الۋ باسقارماسى ارقىلى تەندەرگە شىعارىلۋدا، - دەلىنگەن جاۋاپتا.

جاقىن ارادا تۋريستەردى كولساي كولىنە تاسىمالداۋ ءۇشىن ەلەكتروموبيلدەردى شىعارۋ مۇمكىندىگىن قاراستىرۋ جوسپارلانىپ وتىر. بۇل ماسەلە بويىنشا شەشىم اۆتوتۇراق قۇرىلىسى اياقتالعاننان كەيىن قابىلدانادى. اتالعان جوبانى قارجىلاندىرۋعا ينۆەستورلار تارتۋ كوزدەلگەن. ءبىراق، 2025 -جىلى ۆەلوسيپەد، ساموكاتتارعا جەكە جول سالۋ جوسپاردا جوق. دەگەنمەن، الداعى ۋاقىتتا بۇل ماسەلە ينفراقۇرىلىمدى ودان ءارى جەتىلدىرۋ جانە بارلىق جول قوزعالىسىنا قاتىسۋشىلارعا قولايلى جاعداي جاساۋ اياسىندا قاراستىرىلاتىن بولادى.

«كولساي كولدەرى» ۇلتتىق پارك اۋماعىندا 11 سانيتارلىق- گيگيەنالىق قوندىرعى ورنالاسقان، ونىڭ 6- ۋى تومەنگى كولساي كولىندە، 5- ۋى قايىڭدى كولىندە. قازىر سۋ قۇبىرىنىڭ قاتىپ قالۋىنا بايلانىستى تومەنگى كولساي كولى باعىتىندا ورنالاسقان سانيتارلىق-گيگيەنالىق قوندىرعىنىڭ ەكەۋى عانا جۇمىس ىستەپ تۇر.

2024 -جىلى كولساي كولدەرىن تاماشالاۋعا قانشا تۋريست كەلدى

تۋريزم باسقارماسىنىڭ مالىمەتىنشە، بىلتىر «كولساي كولدەرى» ۇلتتىق تابيعي پاركىنە 395386 ادام تارتىلسا، ونىڭ 6712- ءسى شەتەلدىك تۋريستەر. سالىستىرمالى تۇردە ايتساق، 2023 -جىلى پارككە 244733 تۋريست كەلسە، ونىڭ 3331 شەتەلدىكتەر.

2021 -جىلى «كولساي كولدەرى» تابيعي پاركى يۋنەسكو- نىڭ بۇكىلالەمدىك جەلىسىنە ەنگىزىلگەن بولاتىن.

وسىعان دەيىن، الماتى وبلىسىندا تۋريستەر سانى رەكوردتىق كورسەتكىشكە جەتكەنى تۋرالى جازعان ەدىك.

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى