قاۋىپتى جەردە جۇمىس ىستەيتىن قازاقستاندىقتاردىڭ 15,4 پايىزى قاراعاندى وبلىسىندا شوعىرلانعان
كەيىنگى ەكى جىلدا زياندى جانە قاۋىپتى ەڭبەك جاعدايىندا جۇمىس ىستەيتىن قازاقستاندىقتاردىڭ سانى 5 پايىز ارتقان، دەپ حابارلايدى Kazinform.
23- قازانعا دەيىن اشىق ن ق ا پورتالىندا 2030-جىلعا دەيىنگى قاۋىپسىز ەڭبەك تۇجىرىمداماسى قوعام تالقىسىندا بولعان ەدى.
وسى قۇجاتتاعى دەرەكتەرگە سۇيەنسەك، 2022-جىلى زياندى جانە قاۋىپتى ەڭبەك جاعدايىندا جۇمىس ىستەيتىن ادام سانى 2020-جىلمەن سالىستىرعاندا %5 ارتىپ، 386,3 مىڭنان اسقان.
بۇل كورسەتكىش اسىرەسە وڭدەۋ ونەركاسىبىندە (%26,9)، تاۋ- كەن وندىرىسىندە (%24,5)، كولىك جانە قويما سالاسىندا (%14,1) جيى تىركەلگەن.
وڭىرلەر اراسىندا قاراعاندى (%15,4)، پاۆلودار (%10,5) جانە ماڭعىستاۋ وبلىستارى (%10,0) العاشقى ۇشتىكتە تۇر.
رەسمي ستاتيستيكا بويىنشا، 2022-جىلدىڭ قورىتىندىسىندا قىزمەتىنە بايلانىستى جازاتايىم وقيعا كەزىندە زارداپ شەككەندەردىڭ جيىلىك كوەففيتسيەنتى 1000 جۇمىسكەرگە شاققاندا 0,44 زارداپ شەگۋشىدەن كەلگەن.
ال جازاتايىم وقيعادان قازا تاپقاندار جيىلىگىنىڭ كوەففيتسيەنتى 1000 جۇمىسكەرگە شاققاندا 0,037 بولعان. ياعني، بىلتىر ەلدەگى ءاربىر 1 ميلليون جۇمىسكەردىڭ ىشىندە 37 ادام جۇمىس ىستەپ ءجۇرىپ قازا تاپقان.
سالالاردىڭ ىشىندە وندىرىستىك جاراقاتتىڭ نەعۇرلىم جوعارى دەڭگەيى دە (1000 ادامعا 1,9) قازا تاپقانداردىڭ جيىلىك كوەففيتسيەنتى دە (0,12) تاۋ كەن سالاسىندا تىركەلگەن.
ودان كەيىنگى ورىندا - وڭدەۋ ونەركاسىبى (تيىسىنشە 1,2 جانە 0,07).
قاراعاندى وبلىسى ءوندىرىس كەزىندەگى وقىس وقيعالاردان ادام ەڭ كوپ زارداپ شەگەتىن وڭىرلەردىڭ دە كوشىن باستاپ تۇر (جازاتايىم وقيعالاردان زارداپ شەككەندەردىڭ جيىلىك كوەففيتسيەنتى - 1,2؛ جازاتايىم وقيعالاردان قازا تاپقانداردىڭ جيىلىك كوەففيتسيەنتى — 0,09).
ودان كەيىنگى ورىندارعا ۇلىتاۋ (تيىسىنشە 4,3 جانە 0,03) مەن شىعىس قازاقستان وبلىسى (تيىسىنشە 1,0 جانە 0,04) جايعاسقان.
2022-جىلدىڭ قورىتىندىسى بويىنشا قازاقستاندا جاسىرىن جاراقاتتانۋ كورسەتكىشى 11:1 بولدى، ياعني ءار 11 جاراقاتتانۋ فاكتىسىنىڭ بىرەۋى جاسىرىن قالادى دەگەن ءسوز.
بۇل الەمنىڭ دامىعان ەلدەرىنىڭ كورسەتكىشىمەن سالىستىرعاندا وتە جوعارى.
مىسالى، بۇل كورسەتكىش فينليانديادا 5750:1، گەرمانيادا - 1811:1، يتاليادا - 548:1 جانە جاپونيادا - 177:1.
ەلدەگى جاسىرىن جاراقاتتانۋدىڭ ەڭ ۇلكەن كورسەتكىشى قۇرىلىس (4:1) جانە اۋىل شارۋاشىلىعى (4:1) سالالارىندا تىركەلگەن.
«بۇل ەڭبەكتى قورعاۋدى باسقارۋ جۇيەسىن ۇيىمداستىرۋدىڭ تومەن دەڭگەيىمەن تۇسىندىرىلەدى»، - دەلىنگەن تۇجىرىمدامادا.
ال تاۋ-كەن وندىرىسىندە بۇل كورسەتكىش - 21:1.
