قايتارىلعان اكتيۆتەر ەسەبىنەن اقمولا وبلىسىنىڭ 10 اۋىلىندا جاڭا مەديتسينالىق نىساندار سالىنادى
استانا. KAZINFORM - مەملەكەت باسشىسىنىڭ تاپسىرماسىنا سايكەس، ۇكىمەت ەلگە قايتارىلعان زاڭسىز يەمدەنىلگەن اكتيۆتەر ەسەبىنەن الەۋمەتتىك ماڭىزى بار ينفراقۇرىلىم سالۋ جونىندەگى جوبالاردى جۇزەگە اسىرىپ كەلەدى.
وبلىستىڭ ءبىرقاتار اۋىلىندا جاڭا فەلدشەرلىك- اكۋشەرلىك پۋنكتتەر (فاپ) مەن دارىگەرلىك امبۋلاتوريالار قۇرىلىسىن اياقتاۋ جۇمىستارىنا ارناۋلى مەملەكەتتىك قوردان 1,7 ميلليارد تەڭگە ءبولۋ تۋرالى شەشىم قابىلداندى.
بارلىعى 4 دارىگەرلىك امبۋلاتوريا، 5 فەلدشەرلىك- اكۋشەرلىك پۋنكت جانە 1 مەديتسينالىق پۋنكت سالىنادى. ءار اۋىسىمدا 405 ناۋقاستى قابىلداي الاتىن دارىگەرلىك نىساندار اۋىلدىق جەرلەردە حالىقتىڭ ساپالى مەديتسينالىق كومەككە قولجەتىمدىلىگىن ەداۋىر جاقسارتۋعا مۇمكىندىك بەرەدى.
دارىگەرلىك امبۋلاتوريالار اقمولا وبلىسىنىڭ كەلەسى اۋىلدارىندا:
ارشالى اۋدانى ارناساي اۋىلىندا،
استراحان اۋدانىنداعى ەسكى قالقۇتان اۋىلىندا،
جارقايىڭ اۋدانى پياتيگورسكوە اۋىلىندا،
سەلينوگراد اۋدانى جاڭا ەسىل اۋىلىندا بوي كوتەرەدى.
سونداي-اق:
جاقسى اۋدانىنىڭ كيروۆ اۋىلىندا،
سەلينوگراد اۋدانى جارلىكول اۋىلىندا،
بۇلاندى اۋدانىنىڭ پارتيزانكا اۋىلىندا،
بۇلاندى اۋدانى التىندى اۋىلىندا،
شورتاندى اۋدانىنىڭ پريگورودنوە اۋىلىندا فاپ- تار سالىنادى.
سەلينوگراد اۋدانىنىڭ شالقار اۋىلىندا مەديتسينالىق پۋنكت پايدالانۋعا بەرىلەدى.
بۇعان دەيىن الماتىدا الەۋمەتتىك، مەديتسينالىق جانە ءبىلىم سالاسى قىزمەتكەرلەرىنىڭ جالاقىسى وسەتىنى حابارلاندى.
