قايتا-قايتا كەزەككە تۇرىپ، مەملەكەتتەن ءبىر ەمەس، بىرنەشە پاتەر الىپ جاتقاندار بار-مينيستر
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى Kazinform.
ماجىلىستە ءبىرىنشى وقىلىمدا ماقۇلدانعان جاڭا زاڭ جوباسىنا باسپانا كەزەگىنە تۇراتىنداردىڭ كەيىنگى 10 جىلدا ەشقانداي ءۇي- جايى بولماسىن دەگەن تالاپ ەنگىزىلدى.
قازىرگى قولدانىستاعى زاڭناماعا سايكەس كەزەككە تۇرۋ ءۇشىن 5 جىل ىشىندە تۇرعىن ءۇيى بولماۋى قاجەت.
«باسپانا الاردا تۇرعىندار تەك ءبىر رەت مەملەكەتتىك قولداۋدى پايدالانۋى كەرەك. ويتكەنى بىزدە ۇزىن-سونار ۇلكەن كەزەك بار. ەگەر ادامدار مەملەكەتتەن قولداۋ العان بولسا، ولار ەكىنشى رەت ءوتىنىش بەرمەۋى كەرەك. ءبىراق جاعدايدىڭ ءتۇرلى دارەجەدە ءوربۋى مۇمكىن ەكەنىن ءتۇسىنىپ وتىرمىز، سوندىقتان بۇل شەكتەۋدى 10 جىل دەپ بەلگىلەدىك. ەگەر ءسىز مەملەكەتتەن كومەك العان بولساڭىز، وندا 10 جىل بويى قايتادان كەزەككە تۇرا المايسىز»،-دەدى ق. شارلاپايەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول كەيبىر تۇرعىندار ءار بەس جىل سايىن قايتادان باسپانا كەزەگىنە تۇرىپ جاتقانىن ايتتى.
«وكىنىشكە قاراي، مەملەكەتتەن پاتەر الۋعا قۇقىعى بار كەي ازاماتتاردىڭ قازىرگى قولدانىستاعى بەسجىلدىق مەرزىمدى پايدالانىپ، قايتادان كەزەككە تۇرىپ جاتقانى بار. ياعني ءار بەس جىل سايىن پاتەر الىپ وتىرعان. مۇنداي وقيعالار انىقتالىپ جاتىر. كەزەك بويىنشا مەملەكەتتەن ءبىر رەت پاتەر الىپ، كەيىن ونى ساتىپ جىبەرگەندەر بار. اراعا بەس جىل سالىپ بۇل ادام قايتادان كەزەككە تۇرىپ جاتسا، بۇل جاعداي باسپاناسىن كۇتىپ جۇرگەن مۇگەدەك بالالار مەن كوپبالالى انالار الدىندا ادىلەتسىز دەپ سانايمىن. ءبىز بۇل شەكتەۋدى 10 جىل مەرزىمگە بەلگىلەۋدى ۇسىنىپ وتىرمىز»، - دەدى مينيستر.
