«قايرات» 2025 -جىلعى سۋپەركۋبوك يەگەرى اتاندى
استانا. KAZINFORM - بۇگىن فۋتبولدان قازاقستان سۋپەركۋبوگىندا الماتىلىق «قايرات» ەلوردادا «اقتوبەدەن» باسىم ءتۇسىپ، سۋپەركۋبوك يەگەرى اتاندى.
بىلتىر الماتىلىق كلۋب ەل چەمپيونى اتانسا، اقتوبەلىك كوماندا قازاقستان كۋبوگىنا قول جەتكىزدى. ەكى كوماندا سۋپەركۋبوكتا العاش رەت كەزدەستى.
ويىننىڭ العاشقى مينۋتىندا اقتوبەلىك كوماندا تىزگىندى ءوز قولىندا ۇستاۋعا تىرىستى. ودان كەيىن «قايرات» تا قارسى شابۋىلعا شىقتى. كەيبىر ساتتەردە گول سوعاتىن مۇمكىندىگىن ءمۇلت جىبەرىپ الىپ جاتتى.
ەكىنشى كەزەڭدە ويىن تىزگىنىن «قايرات» ءوز قولىندا ۇستاۋعا تىرىستى. ناتيجەسىندە ولاردىڭ قاتارىنان 58-مينۋتتا ەلدەر سانتانا گول سوعىپ كەتتى.
ال 62-مينۋتتا الماتىلىق كلۋبتان ەركىن تاپالوۆ قىزىل قاعاز الىپ، الاڭنان قۋىلىپ كەتتى.
ويىننىڭ 70-مينۋتىندا «قايراتتىڭ» جاس جۇلدىزى داستان ساتپايەۆ الاڭعا شىقتى. كەزدەسۋ بارىسىندا ادەمى ويىن ورنەگىمەن جانكۇيەرلەر ريزاشىلىعىنا بولەندى.
ال 86-مينۋتتا الماتىلىق ۇجىمنان ۆالەريي گرومىكو قورىتىندى ەسەپتى بەلگىلەدى.
وسىلايشا «قايرات» قارسىلاسىن 2:0 ەسەبىمەن جەڭىپ، سۋپەركۋبوكقا يە بولدى.
قازىرگە دەيىن «اقتوبە» 2008، 2010، 2014 -جىلدارى ءۇش مارتە سۋپەركۋبوكتى توبەسىنە كوتەرسە، «قايرات» 2016، 2017 -جىلداردا ەكى مارتە جەڭىمپاز اتاندى.
اقتوبەلىك كلۋب ءوزى قاتىسقان سۋپەركۋبوكتىڭ بارلىعىندا جەڭسە، الماتىلىق كوماندا 2015، 2018، 2019، 2022 -جىلدارى قارسىلاستارىنا ەسە جىبەرىپ قويدى
سونداي- اق سۋپەركۋبوككە بارلىعى ءتورت كوماندا قول جەتكىزدى. ولاردىڭ قاتارىندا «استانا» - 6، «توبىل» - 2، «شاحتەر»، «ورداباسى» مەن «ەلىماي» - 1 مارتەدەن ەنشىلەدى.
بيىل ەل بىرىنشىلىگىنىڭ العاشقى تۋرى 1-2- ناۋرىز كۇندەرى وتەدى. دوپ دوداسىنا بارلىعى 14 كوماندا قاتىسادى. ولاردىڭ قاتارىندا «قايرات» (الماتى)، «استانا»، «اقتوبە»، «ورداباسى» (شىمكەنت)، «توبىل» (قوستاناي)، «ەلىماي» (سەمەي)، «اتىراۋ»، «قايسار» (قىزىلوردا)، «قىزىلجار» (پەتروپاۆل)، «جەڭىس» (استانا)، «جەتىسۋ» (تالدىقورعان)، «وقجەتپەس» (كوكشەتاۋ)، « ۇلىتاۋ» (جەزقازعان) كوماندالارى بار.
