قاي مەملەكەت قازاقستان ارقىلى گاز ەكسپورتتاپ وتىر
ەلىمىزدە جۇمىس ىستەپ تۇرعان ەكسپورتتىق گاز قۇبىرى بار. ول - قازاقستان-قىتاي گاز قۇبىرى. بۇل تۋرالى ەنەرگەتيكا ءمينيسترى الماسادام ساتقاليەۆ الماتىدا وتكەن بريفينگتە ايتتى، دەپ حابارلايدى Kazinform.
ءمينيستردىڭ سوزىنشە، بۇگىنگى كۇنى شىعىس قازاقستان وبلىسىندا وقشاۋلانعان گاز كەن ورنى جۇمىس ىستەپ تۇر. زايسان اۋدانىنداعى بۇرىن ق ح ر- عا گاز ەكسپورتتاعان سارىبۇلاق گاز كەن ورنى بۇگىنگى كۇنى وبلىس حالقىن عانا گازبەن قامتيدى.
«بۇل گاز كەن ورنى ازىرگە قازاقستاننىڭ ءبىرىڭعاي گاز تاسىمالداۋ جۇيەسىنە قوسىلماعان. بۇعان دەيىن ونىڭ يەلەرى گازدى ق ح ر- عا ەكسپورتتاعان بولاتىن. كەيىن وسىندا وندىرىلەتىن كوگىلدىر وتىننىڭ كولەمى ازايعان كەزدە ق ح ر- عا گاز ەكسپورتىنا تولىق تىيىم سالۋ جونىندە شەشىم قابىلداندى. سونداي-اق ءتيىستى تەحنيكالىق شارالار جاسالدى. بۇگىنگى كۇنى اتالعان گاز كەن ورنىنداعى بۇكىل گاز ش ق و تۇتىنۋشىلارىنا جەتكىزىلىپ وتىر»، - دەدى الماسادام ساتقاليەۆ.
مينيستر وسى گاز كەن ورنىنىڭ ينفراقۇرىلىمنىڭ تەحنيكالىق جاعدايىندا پروبلەمالار بار ەكەنىن اتاپ ءوتتى.
وسىعان وراي مينيسترلىكتىڭ كوميسسياسى بىرنەشە رەت شىعىپ، گاز قۇبىرىن پايدالاناتىن كومپانياعا ەسكەرتۋ جاساعان جانە اتالعان ماسەلە قازىر باقىلاۋدا.
«بىزدە جۇمىس ىستەپ تۇرعان ەكسپورتتىق گاز قۇبىرى بار. ول - قازاقستان-قىتاي گاز قۇبىرى. سونىمەن بىرگە قازاقستان اۋماعى ارقىلى ق ح ر- عا تۇرىكمەن گازى جەتكىزىلەدى. بۇرىن وزبەك گازىنىڭ ترانزيتى بولعان ەدى. بۇگىنگى كۇنى ءبىزدىڭ ەكسپورت قۇبىرلارىمىز ارقىلى وسىنداي تاسىمال جۇزەگە اسىپ جاتىر»، - دەدى ەنەرگەتيكا ءمينيسترى الماسادام ساتقاليەۆ.
