قاي ەلدە ادامدار باقىتتى ءومىر سۇرەدى؟

الەمدەگى ەڭ باقىتتى 10 ەلدىڭ جارتىسى - ەۋرووداق قۇرامىنداعى ەلدەر. بۇل تىزىمدە نەگىزىنەن شاعىن مەملەكەتتەر بار. حالقى 15 ميلليوننان اسپايتىن ەلدەر ءوز ءومىر ساپاسىن جوعارى باعالايدى. بۇل تۋرالى Aikyn.kz سايتى euronews-تەگى ماتەريالعا سۇيەنە وتىرىپ جازادى.

World Happiness Report 2025 ەسەبىنە سايكەس، فينليانديا قاتارىنان سەگىزىنشى جىل الەمدەگى ەڭ باقىتتى ەل دەپ تانىلدى. ساراپشىلار بۇل ناتيجەنى تابيعاتقا قولجەتىمدىلىك پەن الەۋمەتتىك قامتاماسىز ەتۋ جۇيەسىنىڭ مىقتىلىعىمەن بايلانىستىرادى.

تىزىمدە فينليانديادان كەيىن دانيا، يسلانديا، شۆەتسيا ورنالاسقان.

بۇل ەلدەر الەۋمەتتىك قولداۋ، سەنىم جانە جالپى ءال-اۋقات سياقتى كورسەتكىشتەر بويىنشا تۇراقتى تۇردە جوعارى بال جينايدى.

World Happiness Report زەرتتەۋى كەزىندە 140 ەل مەن ايماقتاعى 100000-نان استام ادام سۇحباتتان وتكەن.

«فينليانديادا باقىت دەگەنىمىز - ۇنەمى قۋانىپ ءجۇرۋ ەمەس، قاۋىپسىزدىك، سەنىم مەن كۇندەلىكتى ومىردەگى تەپە-تەڭدىك سەزىمى. مەيلى ول الەۋمەتتىك ساياسات، ساپالى ءبىلىم نەمەسە تابيعاتقا قولجەتىمدىلىك بولسىن، بۇل جەردە قاجەت بولعان جاعدايدا ادامعا كومەك كورسەتىلەتىنىنە دەگەن سەنىم بار»، - دەيدى HappyOrNo فين كومپانياسىنىڭ باس ديرەكتورى مييكا مياكيتالو.

بۇل كومپانيا كليەنتتەردىڭ قاناعاتتانۋ دەڭگەيىن ولشەۋمەن اينالىسادى.

سونىمەن قاتار مياكيتالو ءسوزىن جالعاستىرا كەلە:

«ءبىز قوعام رەتىندە تەڭدىك پەن تۇراقتىلىقتى جوعارى باعالايمىز. بۇل ادامدارعا قولداۋ كورسەتىلىپ، دامۋعا مۇمكىندىك بەرىلەتىن ورتا قۇرۋعا نەگىز بولادى. مۇنداعى بالا كۇتىمىنە بايلانىستى بەرىلەتىن دەمالىس پەن قولجەتىمدى بالاباقشا ساياساتى وتباسىنا قارجىلىق قاۋىپسىزدىك پەن بالالارىمەن بىرگە ۋاقىت وتكىزۋ مۇمكىندىگىن بەرەدى. بۇل - جالپى ءومىر ساپاسىن جاقسارتۋعا دەگەن ۇمتىلىس. ءسويتىپ جۇمىس پەن جەكە ءومىر اراسىنداعى تەپە- تەڭدىك ساقتالادى»، - دەيدى.

بىرگە اس ءىشۋ مەن ءبىر-بىرىنە سەنىم ارتۋ

ادامدار ءجيى بىرگە تاماق ىشەتىن قوعامداردا باقىت پەن الەۋمەتتىك قولداۋ دەڭگەيى جوعارى.

پولشا - العاشقى وندىققا ەنگەن ە و-نىڭ جالعىز ەلى. مۇندا ءبىر اپتادا ورتا ەسەپپەن 10 نان استام ۇلكەن تاماق ىشەتىن ورىندا بىرگە اس ىشەدى.

ال ەستونيادا كەرىسىنشە. ءتىزىمنىڭ سوڭىندا تۇر. سەبەبى تۇرعىندارى اپتاسىنا ورتاشا ەسەپپەن 2,7 رەت قانا بىرگە تاماق ىشەتىنىن ايتقان.

جالعىز تۇراتىن ادامداردىڭ باقىت دەڭگەيى تومەن.

ەۋروپادا ەڭ جوعارى باقىت دەڭگەيى ءتورت-بەس ادامنان تۇراتىن وتباسىلاردا بايقالادى. ءبىراق جاستار اراسىنداعى جالعىزدىق كۇشەيىپ بارادى. ساۋالناماعا قاتىسقان جاستاردىڭ %19 ى «سەنەتىن ادامى جوق» ەكەنىن ايتقان. بۇل 2006 -جىلمەن سالىستىرعاندا، %39 عا كوپ.

كوپتەگەن جاس ءوز قاتارلاستارىنىڭ جاناشىرلىعىن باعالاماي، باسقالارمەن ارالاسۋدان قاشادى. سوندىقتان بۇل تولىققاندى قارىم-قاتىناس ورناتۋعا كەدەرگى كەلتىرەدى.

COVID-19 پاندەمياسى كەزىندە قايىرىمدىلىق ءىسى كوبەيىپ، سول دەڭگەي ءالى دە ساقتالىپ وتىر. سەبەبى پاندەمياعا دەيىنگى كورسەتكىشپەن سالىستىرعاندا، %10 عا جوعارى.

ورتالىق جانە شىعىس ەۋروپادا قايىرىمدىلىق پەن ەرىكتىلىك كەڭ تارالعان بولسا، باتىس ەۋروپادا ماتەريالدىق رەسۋرستاردى ءبولىسۋ ءجيى كەزدەسەدى.

وكسفوردتاعى ءال-اۋقاتتى زەرتتەۋ ورتالىعىنىڭ ديرەكتورى جانە باقىت تۋرالى دۇنيەجۇزىلىك باياندامانىڭ رەداكتورى يان-ەممانۋەل دە نيەۆە: «بيىلعى بايانداما ءبىزدى دەنساۋلىق پەن بايلىق سياقتى ءداستۇرلى فاكتورلاردان تىس ويلاۋعا ماجبۇرلەيدى. بىرگە تاماق ءىشۋ مەن سەنىم ارتۋ ادامداردىڭ ءال-اۋقاتىنىڭ كۇتپەگەن، ءبىراق كۇشتى كورسەتكىشى بولىپ شىقتى. الەۋمەتتىك وقشاۋلانۋ مەن ساياسي پولياريزاتسيا داۋىرىندە ادامداردى داستارحان باسىنا قايتا جيناۋدىڭ جولىن تابۋ اسا ماڭىزدى. بۇل ءبىزدىڭ جەكە ءارى ۇجىمدىق باقىتىمىز ءۇشىن قاجەت»، - دەپ تۇيىندەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى