قاڭتار وقيعاسى كەزىندە 4 جاسار ايكوركەمدى ءولتىردى دەپ ايىپتالعان ارمان جۇمان 7 جىلعا سوتتالدى
الماتى. KAZINFORM – ق ر اسكەري سوتىنىڭ قىلمىستىق ىستەر جونىندەگى سوت القاسى قارۋ قولدانۋ ارقىلى بيلىكتى اسىرا پايدالانۋ بويىنشا (ق ك 451-بابى 2-بولىگىنىڭ 1-تارماعىمەن) ايىپتالعان اسكەري قىزمەتشى ا. جۇمانعا قاتىستى قىلمىستىق ءىستى اپەللياتسيالىق تارتىپتە قايتا قارادى.
ق ر اسكەري سوتىنىڭ مالىمەتىنشە، بۇعان دەيىن ءبىرىنشى ساتىداعى سوت اسكەري قىزمەتشىنىڭ ءىس-ارەكەتىندە قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى ونى اقتاعان. قىلمىستىق ءىس جابىق سوت وتىرىسىندا «قۇپيا» بەلگىسىمەن قارالعان.
اپەللياتسيالىق سوت القاسى جابىرلەنۋشى تاراپتىڭ شاعىمدارى مەن پروكۋروردىڭ نارازىلىعى نەگىزىندە ءىستى قايتا قارادى. سوت القاسىمەن انىقتالعانى: 2022 -جىلعى 7-قاڭتاردا ساعات 19.30 شاماسىندا سوتتالۋشى ا. جۇمان بلوك-بەكەتىندە بولا تۇرا، ونىڭ قاراماعىنداعى اسكەري قىزمەتشىلەرگە بلوك-بەكەتىنە جاقىنداپ كەلە جاتقان اۆتوكولىككە وق اتۋ تۋرالى زاڭسىز بۇيرىق بەرگەن. ناتيجەسىندە العان وق جاراقاتى سالدارىنان جاس بالا (2017 -جىلى تۋعان ايكوركەم مەلدەحان) قايتىس بولىپ، ال كامەلەتكە تولماعان (2006 -جىلى تۋعان ج. مەلدەحان) 5 وق جاراقاتىنان دەنساۋلىعىنا اۋىر زيان كەلتىرىلگەن.
«سوتتالۋشىنىڭ كىناسى ءىس بويىنشا جينالعان دالەلدەمەلەرمەن، ياعني جابىرلەنۋشىلەر مەن كۋاگەرلەردىڭ ايعاقتارىمەن، سوت ساراپتامالارىنىڭ قورىتىندىلارى جانە زاتتاي دالەلدەمەلەرىمەن دالەلدەندى. ق ر اسكەري سوتىنىڭ سوت القاسى اقتاۋ ۇكىمىنىڭ كۇشىن جويىپ، جاڭا ايىپتاۋ ۇكىمىن شىعاردى. وعان سايكەس ق ك- ءنىڭ 451-بابى 2-بولىگىنىڭ 1-تارماعى بويىنشا ا. جۇمان كىنالى دەپ تانىلىپ، باس بوستاندىعىنان ايىرىلىپ، 7 جىلعا سوتتالدى»، - دەپ ق ر اسكەري سوتىنىڭ باسپا ءسوز قىزمەتى.
سونىمەن قاتار سوت القاسى ق ر قورعانىس ءمينيسترىنىڭ اتىنا اسكەري قىزمەتشىلەردىڭ جول بەرگەن زاڭ بۇزۋشىلىقتارى، سونداي-اق ولاردى جويۋ جانە ودان ءارى بولدىرماۋ جونىندە شارالار قابىلداۋ ءۇشىن قىلمىس جاساۋعا ىقپال ەتكەن سەبەپتەر مەن جاعدايلار تۋرالى جەكەشە قاۋلى شىعاردى.
اپەللياتسيالىق ۇكىم زاڭدى كۇشىنە ەندى.
ەسكە سالساق، وتكەن جىلى قاراشا ايىندا الماتى گارنيزونى اسكەري سوتى قاڭتاردا كىشكەنتاي ايكوركەمدى ءولتىردى دەپ ايىپتالعان ارمان جۇمانعا ۇكىم شىعارىپ، ونى اقتاعان ەدى.
