قاسىم-جومارت توقايەۆ ولگا رىپاكوۆا اتىنداعى جەڭىل اتلەتيكا ورتالىعىنا باردى
وسكەمەن. KAZINFORM - مەملەكەت باسشىسى شىعىس قازاقستان وبلىسىنا جۇمىس ساپارى كەزىندە ولگا رىپاكوۆا اتىنداعى جەڭىل اتلەتيكا ورتالىعىن جانە ونىڭ بازاسىندا اشىلعان جەڭىل اتلەتيكا بويىنشا وبلىستاعى بالالار مەن جاس وسپىرىمدەرگە ارنالعان وليمپيادالىق رەزەرۆ مەكتەبىن ارالاپ كوردى.
وليمپيادا چەمپيونى ولگا رىپاكوۆا پرەزيدەنتكە وقۋ-جاتتىعۋ جيىندارىن جىل بويى تۇراقتى تۇردە وتكىزۋ ءۇشىن ورتالىقتا بارلىق جاعداي جاسالعانىن ايتتى. مەكتەپ اشىلعان ساتتەن بەرى قازاقستاننىڭ جەڭىل اتلەتيكادان بارلىق قىسقى چەمپيوناتتارى وسى جەردە وتكىزىلىپ كەلەدى.
بۇگىندە ورتالىقتا 713 جاس ورەن جاتتىعادى. ولار رەسپۋبليكالىق جانە حالىقارالىق جارىستاردان ۇدايى جۇلدەلى ورالادى. سپورتشىلار 2023-جىلى 281 مەدال جەڭىپ العان.
ولگا رىپاكوۆا ەلىمىزدە جەڭىل اتلەتيكانى دامىتۋعا قاتىستى ءبىرقاتار ۇسىنىسىن جەتكىزدى. اتاپ ايتقاندا، ول وڭىردە سپورت مەديتسيناسى ورتالىعىن قۇرۋ ماڭىزدى دەپ سانايدى.
بۇل التايدىڭ اسەم دە جانعا جايلى تابيعاتى اياسىندا وتەتىن جەڭىل اتلەتيكا بويىنشا وقۋ-جاتتىعۋ جيىندارىن ەمدەۋ-وڭالتۋ پروتسەدۋرالارىمەن ساباقتاستىرۋعا مۇمكىندىك بەرەدى.
2015-جىلدان باستاپ سپورت ارەناسىندا وليمپيادا چەمپيونى ولگا رىپاكوۆا اتىنداعى تۋرنير وتكىزىلىپ كەلەدى. اتالعان جارىسقا World Athletics Continental Tour دەڭگەيى بەرىلگەن. ياعني، بۇل سپورتشىلار الەمدىك رەيتينگتە ۇپاي جيناي الاتىن ەڭ جوعارى دەڭگەيدەگى سايىس سانالادى.
داڭقتى سپورتشى وسى تۋرنيردىڭ مارتەبەسىن «كۇمىس» دەڭگەيگە دەيىن كوتەرۋگە ىقپال ەتۋدى سۇرادى. ول ءۇشىن جەڭىل اتلەتيكا مانەجىنىڭ جابىندىسىن جاڭارتۋ، سونداي-اق جۇلدە قورىنىڭ سوماسىن ارتتىرۋ قاجەت
مەملەكەت باسشىسى پرەمەر-ءمينيستردىڭ ورىنباسارى تامارا دۇيسەنوۆا مەن ش ق و اكىمى ەرمەك كوشەربايەۆقا اتالعان ماسەلەنى باقىلاۋعا الۋدى تاپسىردى.
پرەزيدەنت سپورتشىلارمەن اڭگىمەلەسىپ، مەملەكەت سپورت ينفراقۇرىلىمىن جاقسارتۋعا ەرەكشە كوڭىل بولەتىنىن اتاپ ءوتتى.
- مۇندا بالالاردىڭ فۋتبول وينايتىنىن، جەڭىل اتلەتتەردىڭ جاتتىعاتىنىن كورىپ وتىرمىن. ارينە، سپورتپەن اينالىسۋ كەرەك، سونداي-اق سالاۋاتتى ءومىر سالتىن ۇستانعان ءجون. مەن سپورتتى دامىتۋعا باسا ءمان بەرەمىن. بارشاڭىزدىڭ مىقتى سپورتشى بولۋلارىڭىزعا، قوعامنىڭ باسقا دا سالالارىندا جەتىستىككە جەتۋلەرىڭىزگە تىلەكتەسپىن. باستى مىندەت - ەلىمىزدىڭ لايىقتى ازاماتى بولۋ. سىزدەردى مىقتى مامان، وليمپيادا چەمپيونى، سپورتتا ۇلكەن جەتىستىككە جەتكەن باپكەر جاتتىقتىرادى. سوندىقتان ۇلگى الاتىن ادامدارىڭىز بار، - دەدى مەملەكەت باسشىسى.
قاسىم-جومارت توقايەۆقا جەرگىلىكتى جەڭىل اتلەتتەردىڭ باستى جەتىستىكتەرى جونىندە مالىمەت بەرىلدى. اتاپ ايتقاندا، 2023-جىلى استانادا وتكەن ازيا چەمپيوناتىندا نادەجدا دۋبوۆيتسكايا ايەلدەر اراسىندا بيىكتىككە قارعىپ سەكىرۋدەن التىن مەدالعا يە بولدى.
جاقىندا تەگەراندا وتكەن جەڭىل اتلەتيكادان XI ازيا چەمپيوناتىندا ەليزاۆەتا ماتۆەيەۆا جەڭىمپاز اتاندى. ال وتكەن جىلعى VI رەسپۋبليكالىق سپارتاكيادادا ايماقتىڭ جەڭىل اتلەتيكا قۇراماسى جالپىكوماندالىق ەسەپتە ءبىرىنشى ورىن الدى.
