قاسىم-جومارت توقايەۆ: تۇركى حالىقتارىنىڭ ىقپالداستىعىن ارتتىرا ءتۇسۋ - بارىمىزگە ورتاق
وزگە ەلدەر تۇركى مەملەكەتتەرى ۇيىمىنىڭ ۇستانىمدارىنا باسا ءمان بەرەتىن بولدى. بۇل تۋرالى اقوردادا ءوتىپ جاتقان تۇركى مەملەكەتتەرى ۇيىمىنىڭ X سامميتىندە مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.
«وزدەرىڭىزگە ءمالىم، وسى كۇنگە دەيىن ءبىراز شارۋا اتقارىلدى. ناقتى جەتىستىكتەرىمىز بار. قازاقستاننىڭ باستاماسىمەن قۇرىلعان تۇركىتىلدەس مەملەكەتتەر ىنتىماقتاستىعى كەڭەسى قازىرگى ۋاقىتتا تولىققاندى، بەدەلدى حالىقارالىق ۇيىمعا اينالدى. «تۇركى الەمىنىڭ كەلەشەگى-2040» اتتى قۇجات بەكىتىلدى. ەڭ باستىسى - باۋىرلاس ەلدەردىڭ بىرلىگىن بەكەمدەي تۇستىك. ورتاق قۇندىلىقتارىمىزدى تورتكۇل دۇنيەگە تانىتتىق. ءبىز بابالار وسيەتىن ورىنداپ، تۇركى ەلدەرىنىڭ ىنتىماعىن نىعايتىپ كەلەمىز»، - دەدى مەملەكەت باسشىسى.
قازاقستان پرەزيدەنتى ەندىگى ماقسات - ءوزارا سەنىمگە جانە باۋىرلاستىققا نەگىزدەلگەن بىرلىگىمىزدى ساقتاپ، وسكەلەڭ ۇرپاققا تابىستاۋ ەكەندىگىن باسا ايتتى.
«تۇركى الەمى جاھاندىق ىقپالى بار ەلدەرمەن تەڭ دارەجەدە قارىم-قاتىناس جاساپ وتىر. باسقا مەملەكەتتەر ءبىزدىڭ ۇيىمنىڭ ۇستانىمدارىنا باسا ءمان بەرەتىن بولدى. سوندىقتان تۇركى حالىقتارىنىڭ ىقپالداستىعىن ارتتىرا ءتۇسۋ - بارىمىزگە ورتاق مىندەت»، - دەدى قاسىم-جومارت توقايەۆ.
