قاسىم-جومارت توقايەۆ رەسەي پرەزيدەنتى ۆلاديمير پۋتينگە كوڭىل ايتتى
استانا. KAZINFORM - «قازاقستان ماسكەۋدەگى بەيبىت ازاماتتارعا قارسى تەرروريستىك اكتىنى قاتاڭ ايىپتايدى»، - دەپ مالىمدەدى پرەزيدەنت قاسىم-جومارت توقايەۆ. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى تەرروريزمدى مۇلدە اقتاۋعا بولمايدى دەپ سانايدى. ول ب ۇ ۇ- عا مۇشە مەملەكەتتەردى جازىقسىز ازاماتتارعا قارسى زورلىق-زومبىلىقتىڭ بۇل تۇرىنە ءبىراۋىزدان قارسىلىق تانىتۋعا شاقىردى.
پرەزيدەنتتىڭ تاپسىرماسى بويىنشا، قاجەت بولعان جاعدايدا، قازاقستاننىڭ قۇقىق قورعاۋ ورگاندارى رەسەيلىك ارىپتەستەرىنە كومەك كورسەتەدى.
سونىمەن قاتار قازاقستان پرەزيدەنتى لاڭكەستىك ارەكەت كەزىندە ازاماتتاردىڭ قازا تابۋىنا بايلانىستى رەسەي پرەزيدەنتى ۆلاديمير پۋتينگە كوڭىل ايتتى.
