قاسىم-جومارت توقايەۆ قىتايدىڭ ۇلتتىق يادرولىق ونەركاسىپ كورپوراتسياسىنىڭ باسشىسىن قابىلدادى
استانا. KAZINFORM - قىتايدىڭ ۇلتتىق يادرولىق ونەركاسىپ كورپوراتسياسىنىڭ (CNNC) باسشىسىمەن كەزدەسۋدە اتوم ەنەرگەتيكاسى سالاسىنداعى ىنتىماقتاستىق پەرسپەكتيۆاسى تالقىلاندى.
قاسىم-جومارت توقايەۆ شەن يانفەنگە قازاقستاننىڭ اتالعان سالانى دامىتۋ جونىندەگى جوسپارىن تانىستىرىپ، تاياۋدا يادرولىق ەنەرگەتيكا اگەنتتىگىن قۇرۋ تۋرالى ماڭىزدى شەشىم قابىلدانعانىنا نازار اۋداردى. بۇل ۇلتتىق ەكونوميكا الدىنداعى ستراتەگيالىق مىندەتتى جۇيەلى تۇردە جۇزەگە اسىرۋدى كوزدەيدى.
پرەزيدەنت قىتاي حالىق رەسپۋبليكاسىنىڭ اتوم ەنەرگەتيكاسىندا كوشباسشى سانالاتىن CNNC تاجىريبەسىنە ەلىمىزدىڭ قىزىعۋشىلىق تانىتىپ وتىرعانىن ايتتى.
شەن يانفەن مەملەكەت باسشىسىنا كومپانيانىڭ قىتايداعى جانە ودان تىسقارى جەرلەردەگى جوبالارى تۋرالى مالىمەت بەردى.
اڭگىمەلەسۋ بارىسىندا اتوم ەنەرگياسىن بەيبىت ماقساتتا پايدالاناتىن وزىق تەحنولوگيالاردى زەردەلەۋ جانە قازاقستاندىق مامانداردى وقىتۋ باعىتىنداعى ىقپالداستىق ماسەلەلەرى قاراستىرىلدى.
اۆتور
نازىم بولەسوۆا
