قاسىم-جومارت توقايەۆ جاستارعا ۇندەۋ جولدادى

«قازاقستان دامۋدىڭ جاڭا كەزەڭىنە قادام باستى. ساياسي جانە الەۋمەتتىك- ەكونوميكالىق رەفورما قوعامدىق سانانىڭ تۇبەگەيلى وزگەرىسىنە ۇلاسۋى كەرەك. مەن تۇركىستاندا وتكەن قۇرىلتايدا سويلەگەن سوزىمدە جاڭا قوعامدىق ەتيكا تۋرالى ايتتىم. القالى جيىننان سوڭ قۇرىلتايدىڭ كەيبىر مۇشەلەرى ماعان ءوز ۇسىنىستارىن جولدادى. ولار ەلىمىزدە قۇندىلىقتار جۇيەسىن قالىپتاستىرۋ قاجەتتىگىنە نازار اۋدارۋدا. شىن مانىندە، مۇنى وتە ماڭىزدى باستاما دەپ ويلايمىن. ونى جان- جاقتى تالقىلاپ، قاراستىرۋىمىز كەرەك. مەن بۇعان دەيىن ادال ازامات ۇعىمىن ۇسىندىم. وسى ورايدا جاستارىمىزعا ارنايى ۇندەۋ جولداعىم كەلەدى. ەلىمىزدە جۇزەگە اسىرىلىپ جاتقان ءاربىر باستاما، ەڭ الدىمەن، سىزدەرگە ارنالادى. قازىرگى رەفورمالاردىڭ يگىلىگىن كورەتىن دە، ەلدىك ىستەردى جالعاستىراتىن دا - سىزدەر»، - دەدى پرەزيدەنت.

مەملەكەت باسشىسى بۇگىنگى جاستاردى قازاقستاننىڭ كەلبەتى دەۋگە بولاتىندىعىن باسا ايتتى.

«شىن مانىندە، كەز كەلگەن مەملەكەتتى تۇرعىندارىنا قاراپ باعالايدى. ياعني، ءبىزدىڭ قانداي ەل بولارىمىز وسكەلەڭ ۇرپاققا بايلانىستى. سوندىقتان جاستارىمىز وتانشىل، ءبىلىمپاز، ەڭبەكقور، ۇنەمشىل، ءادىل ءارى جاناشىر بولۋى قاجەت. جاستار سپورتپەن، دەنە شىنىقتىرۋمەن اينالىسۋى كەرەك. مەن مۇنى ۇنەمى ايتىپ ءجۇرمىن. وسى قۇندىلىقتاردى بارىنشا ناسيحاتتاپ، تاراتۋ قاجەت. سوندا جەكە ادامنىڭ قاسيەتى تۇتاس ۇلتتىڭ قاسيەتىنە اينالادى»، - دەدى قاسىم-جومارت توقايەۆ.

پرەزيدەنتتىڭ اتاپ وتۋىنشە، جاستار كەز كەلگەن وزگەرىسكە بەيىم بولادى.

«ءار نارسەنى بويىنا تەز سىڭىرەدى. مەن سىزدەردى جاقسىدان ۇيرەنۋگە، جاماننان جيرەنۋگە شاقىرامىن. ۇلى اباي ايتقان بەس نارسەدەن قاشىق، بەس نارسەگە اسىق بولىڭىزدار. سىزدەر دارىپتەگەن قۇندىلىقتار قوعامدا تەز ورنىعادى. سىزدەر قولداعان وزگەرىستەر جىلدام جۇزەگە اسادى. ءبارىمىزدىڭ تىلەگىمىز - ءبىر، بۇل - قوعامىمىزدا جاپپاي ادىلەتتىك ورناتۋ. ەندەشە، ماقساتىمىزعا بىرگە جەتەيىك. مەن جاس ۇرپاقتىڭ جاسامپازدىق قۋاتىنا سەنەمىن. وزدەرىڭىز سياقتى سانالى ۇل-قىزدارى بار قازاقستان وركەنيەت كوشىنىڭ باسىندا بولارى ءسوزسىز»، - دەدى مەملەكەت باسشىسى.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى