قاسىم-جومارت توقايەۆ بوزىمبايەۆقا ۇلتتىق جوبا بويىنشا تاپسىرما بەردى
استانا. KAZINFORM - مەملەكەت باسشىسى قاسىم-جومارت توقايەۆ پرەمەر- ءمينيستردىڭ ورىنباسارى قانات بوزىمبايەۆتى قابىلدادى، دەپ حابارلايدى اقوردا.
قاسىم-جومارت توقايەۆقا ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ بويىنشا ۇلتتىق جوبانىڭ ازىرلەنۋ بارىسى جونىندە اقپارات بەرىلدى.
الداعى بەس جىلعا ارنالعان جوبا اياسىندا ەنەرگەتيكالىق جانە كوممۋنالدىق سەكتوردىڭ قولدانىستاعى ينفراقۇرىلىمىن جاڭارتۋ، 6 مىڭ مەگاۆاتتان اسا ەلەكتر قۋاتى گەنەراتسياسىن ىسكە قوسۋ ءارى جاڭعىرتۋ جۇمىستارىن جۇرگىزۋ قاراستىرىلعان.
جوبانىڭ جالپى قۇنى 10 تريلليون تەڭگەدەن اسادى. قاجەتتى قاراجات نارىقتان زايم نەگىزىندە، سونداي-اق ءىشىنارا رەسپۋبليكالىق بيۋدجەتتەن تارتىلادى.
كەشەندى جاڭعىرتۋ جۇمىستارى ەنەرگەتيكالىق نىساندار مەن كوممۋنالدىق سەكتوردىڭ توزۋىن ءبىرشاما تومەندەتىپ، حالىقتىڭ تۇرمىس- تىرشىلىگىن قامتاماسىز ەتۋ جۇيەلەرىن جەتىلدىرەدى.
بۇدان بولەك، پرەزيدەنتكە وڭىرلىك ساياساتتى ىسكە اسىرۋدىڭ جاڭا تاسىلدەرى تۋرالى مالىمەت بەرىلدى. بۇل شارا وبلىستار اراسىنداعى الەۋمەتتىك، وندىرىستىك جانە كوممۋنالدىق ينفراقۇرىلىمدى قامتاماسىز ەتۋ بارىسىنداعى الشاقتىقتى جويۋعا باعىتتالعان.
قانات بوزىمبايەۆتىڭ ايتۋىنشا، پرەزيدەنتتىڭ تاپسىرماسىن ورىنداۋ ماقساتىندا مەملەكەتتىك باعدارلامالاردى جۇزەگە اسىرۋدى جۇيەلى ۇيلەستىرۋ ءۇشىن ۇكىمەت جانىنان وڭىرلىك ساياسات جوبالىق كەڭسەسى قۇرىلادى.
بۇدان بولەك، مەملەكەت باسشىسىنا ماڭعىستاۋ وبلىسىندا اۆياتسيالىق حابتى دامىتۋ جونىندەگى ينۆەستيتسيالىق جوبانى ىسكە اسىرۋ پەرسپەكتيۆاسى باياندالدى. اتالعان جوبا ءوڭىردىڭ ەكونوميكالىق وسىمىنە تىڭ سەرپىن بەرىپ، حالىقارالىق كولىك-لوگيستيكا تىزبەگىنىڭ ماڭىزدى بولىگىنە اينالادى.
قاسىم-جومارت توقايەۆ قانات بوزىمبايەۆقا ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ بويىنشا ۇلتتىق جوبانى مۇقيات دايىنداپ، جىل سوڭىنا دەيىن بەكىتۋدى تاپسىردى. سونىمەن قاتار وڭىرلىك ساياسات تۇجىرىمداماسىن بەلسەندى ىسكە اسىرۋ مىندەتىن جۇكتەدى.
