قارىزسىز قوعام: ءبىر نەسيەنى تولەۋ ءۇشىن تاعى ءبىر نەسيە الۋ تىعىرىقتان شىعارمايدى

جوبا اياسىندا 840 مىڭنان استام ازامات قارجى ساۋاتتىلىعىن ارتتىرۋ ءۇشىن ساباق وقىدى. 70 مىڭنان استام تۇرعىنعا زاڭگەرلەر كومەكتەستى. قارجىگەر، زاڭگەر، ساراپشى ماماندار قارىزدان قۇتىلا الماي جۇرگەن تۇرعىندارعا جول كورسەتتى. ءجون سىلتەدى. وسى جوباعا قاتىسقان ازاماتتىڭ ءبىرى ەرىمبەت ناعىزحان «قارىزسىز قوعامنىڭ» حالىققا قانداي پايداسى بار ەكەنىن ايتىپ بەردى.

ونىڭ پىكىرىنشە، ءبىر نەسيەنى ەكىنشى نەسيەمەن جابۋ تىعىرىقتان شىعاتىن جول ەمەس.

«قارىزسىز قوعام» جوباسىنا قاتىسقان سوڭ، قارىزدان قۇتىلۋدىڭ جولى قاراپايىم ەكەنىنە كوزىم جەتتى. قارىز تاس سەكىلدى اۋىر. قارىزدىڭ قۇردىمىنا تۇسكەن ادام ءۇشىن ءومىردىڭ ءمانى جوعالادى. كۇيزەلىسكە دۋشار بولادى. 20 ميلليون حالىقتىڭ ىشىندە 9600 مىڭداي ادام جۇمىس ىستەيدى. جالاقى الادى. ءبىرىنشى كرەديتتىك بيۋرونىڭ مالىمەتىنشە، 6 ميلليوننان استام ادامنىڭ نەسيەسى بار. سونىڭ ىشىندە، 1,5 ميلليون ادامنىڭ نەسيەنى تولەۋ مەرزىمى 90 كۇننەن اسىپ كەتكەن. وسى ماسەلەنىڭ سەبەبىنە ۇڭىلگەندە قارىزدى قارىزبەن جابۋ تىعىرىقتان شىعاتىن جول ەمەس ەكەنىنە كوزىم جەتتى، - دەيدى ەرىمبەت ناعىزحان.

نەسيەنى ۋاقىتىندا تولەي الماعان ادامدارعا قىسىم كوپ. جان- جاقتان حابارلاسىپ، جۇيكەگە سالماق تۇسىرەدى. كەيىپكەرىمىز وسىنداي قيىن كەزەڭدە ادام نەسيەدەن قۇتىلماق تۇرماق ءومىر سۇرۋگە قۇلشىنىسى دا ازايا بەرەدى دەيدى.

«قارىزعا بەلشەمنەن باتتىم. مولشەرى 10 ميلليون تەڭگەگە دەيىن ءوسىپ كەتتى. ءبىر جوبانى ىسكە اسىرامىن دەپ ويلادىم. ءبىراق جوسپارىم مەن ويلاعانداي بولمادى. قارىزدى قارىز الىپ جاپپاق بولدىم. نەسيەنىڭ تولەۋ مەرزىمى جاقىنداعاندا بانكتەن بوت-روبوتتار حابارلاسادى. ودان كەيىن مەنەدجەر، ىلە-شالا تۋعان-تۋىسىڭا، دوس-جارانىڭا (نەسيە العان كەزدە كورسەتكەن تەلەفون ءنومىرى بويىنشا - رەد. ) حابارلاسادى. ەگەر ميكروقارجى ۇيىمىنان قارىز الساڭ، WhatsApp مەسەدجەرى ارقىلى قارىز تۋرالى اقپاراتتى تۋعان-تۋىستارىڭا جىبەرەدى. بۇكىل تۋعان-تۋىستىڭ جان-جاقتان قىسىمى كۇشەيەدى. وسىدان ءۇش-ءتورت جىل بۇرىن نەسيە الۋ وپ-وڭاي بولدى. ءار ادامنىڭ نەسيە تولەۋ مۇمكىندىگى ورتاشا كورسەتكىشتەن تومەن بولسا دا نەسيە بەردى. تاپقان تابىسىنان تولەيتىن نەسيەسى كوپ بولدى. سونىڭ سالدارىنان ءاربىر ءۇشىنشى ادام نەسيەنى ۋاقىتىلى تولەي المادى. ەكىنشى دەڭگەيلى بانكتەر نەسيەنى كەشىگىپ تولەپ جۇرگەن ادامدارعا دا قارىز بەرە بەردى. ونلاين 3 مينۋتتا نەسيە الۋ قولجەتىمدى بولدى. ءبىر نەسيەنى تاعى ءبىر نەسيە الىپ تولەۋ تىعىرىقتان شىعاتىن جول سەكىلدى كورىندى»، - دەيدى ول.

«قارىزسىز قوعام» جوباسىنىڭ وسىنداي پروبلەمالاردىڭ الدىن الۋدا ماڭىزى زور. جۋىردا «AMANAT» پارتياسىنىڭ مۇشەسى، ءماجىلىس دەپۋتاتى ەلنۇر بەيسەنبايەۆ تاپقان تابىستى ۇنەمدەپ جۇمساپ، مەيلىنشە ارتىق شىعىنداردى قىسقارتۋ كەرەك دەگەن ۇسىنىس ايتتى. دەپۋتات اسىرەسە، جارناماعا سەنىپ، iPhone 16 ماركالى سمارتفون، تاۋاردى نەسيەگە الۋ (راسسروچكا - ءبولىپ تولەۋ) جانە تاعى باسقا دا قاجەتسىز شىعىنداردى ازايتۋ كەرەگىنە توقتالدى. ۇنەمشىل بولۋدان ۇتپاسا، ۇتىلماسىمىز انىق. «قارىزسىز قوعام» جوباسىنا قاتىسقان ەرىمبەت ناعىزحاننىڭ پايىمداۋىنشا، ۇنەمدەۋ دە قارىزدىڭ قۇتىلۋدىڭ ءبىر جولى.

«اي سايىنعى شىعىنداردى ازايتىپ، قارجىنى ۇنەمدەۋگە بولادى ەكەن. ەسەپتەسەم، اقىلى ماركەتپلەيستەرگە اي سايىن كوپ قارجى جۇمسايدى ەكەنمىن. كەرەگىن عانا الىپ، ءجيى پايدالانبايتىنىمدى ءوشىردىم. «كەرەك بولىپ قالادى-اۋ...» دەپ اقىسىن تولەپ جۇرگەنمىن. ۇساق-تۇيەك دەسەك تە، اي، جىلمەن ساناپ ەسەپتەگەندە ەلەۋسىز شىعىنداردىڭ وزىنەن قوماقتى قارجى ۇنەمدەۋگە سەپتىگىن تيگىزەدى.

قازىر وسىنداي قاجەت اقپارات بارلىق جەردە ايتىلىپ جاتىر. باستى ماسەلە بانكتەر تولەم قابىلەتىن ەسكەرمەي وڭدى-سولدى كرەديت بەرەدى. تابىستىڭ 50 پايىزىنا ەسەپتەپ كرەديت بەرۋدى قاراستىرادى. سيفرلاندىرۋدىڭ ارقاسىندا جەكە مالىمەت (وتباسى، بالا-شاعا، قوسىمشا تابىسى جانە ت. ب) قولجەتىمدى. ەكىنشى سەبەبى، كوپ ادام جارنامانىڭ قۇربانى. قازىر egov mobile ارقىلى وزىنە-ءوزى كرەديت الۋعا شەكتەۋ قويا الادى. ءار ادام وزىنە كرەديت الۋدان شەكتەۋ قويعاننان كەيىن بانكتەردىڭ جارناماسى دا سول ادامعا حابارلاما بولىپ كەلمەۋى ءتيىس. وسى ماسەلەنى زاڭ شەڭبەرىندە رەتتەۋ كەرەك»، - دەيدى ەرىمبەت ناعىزحان.

P.S. قارىزدان قايتسەم قۇتىلامىن دەپ جۇرگەن بورىشكەرلەردىڭ تاعدىرى ءار الۋان. سەبەبى دە سان ءتۇرلى. اراسىندا تۇرمىسىن تۇزەۋگە تالپىنعاندار دا بار. استا-توك توي-تويمالاق ءۇشىن كرەديت الىپ وكىنەتىندەر دە كەزدەسەدى. وڭاي ولجاعا كەنەلەمىن دەپ الاياققا الدانعاندار جەتەرلىك. جالاقىسى كۇنكورىسىنە جەتپەيتىن ازاماتتاردىڭ قارىزدان قاشان قۇتىلاتىنى ازىرگە بەلگىسىز... 

aikyn.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى