قارىزدى بيۋدجەتتىڭ تەسىگىن جابۋعا پايدالانىپ وتىرمىز - دەپۋتات

- ەلەكتر ەنەرگەتيكاسى تاۋارلارىن وزىمىزدە وندىرسەك، دوللاردىڭ كۋرسىنا اسا تاۋەلدى بولمايمىز، سەبەبى تاۋاردى وزىمىزدە شىعارامىز. بۇل تەڭگەنىڭ از دا بولسا كۇشەيۋىنە ىقپال ەتەدى. ەكونوميستەردىڭ ايتۋىنشا، مەملەكەتكە كىرەتىن ءۇش قارجى كوزى بار. ءبىرىنشى - ەكسپورت، بىزدە ەكسپورتتىڭ %90 شيكىزات، ونىڭ ىشىندە %58 مۇناي. ەكىنشىدەن، قاراجات قارجى ينستيتۋتتارىنان كەلەدى، ونىڭ كوزى ازايىپ قالدى، ءبىز قازىر قارىزدى بيۋدجەتتىڭ تەسىگىن جابۋعا پايدالانىپ وتىرمىز. ءۇشىنشى قارجى كوزى قازاقستاندا شىعارىلاتىن تاۋارلار، ال بىزدە ونىڭ ۇلەسى جوقتىڭ قاسى، - دەدى ەدىل جاڭبىرشين ەلوردادا وتكەن ەلەكتر ەنەرگەتيكا سالاسىنداعى وتاندىق تاۋار وندىرۋشىلەردى مەملەكەتتىك قولداۋ شارالارىنا ارنالعان ءىس-شارادا.

حالىق قالاۋلىسىنىڭ ايتۋىنشا، وتاندىق تاۋارلاردىڭ ءوندىرىسىن، ونى قولدانۋدىڭ ۇلەسىن ارتتىرسا، سوعۇرلىم ىشكى قارجى اينالىمى ارتا تۇسەدى.

- مەن يراندا ەكى رەت بولدىم، العاش 1997 -جىلى باردىم، سوسىن 2001 -جىلى بولدىم. شەگەدەن باستاپ، ماشيناعا دەيىن وزدەرى شىعارادى. بۇكىل تاۋاردى ىشكى نارىقتا اينالدىرىپ وتىر. ءبىز سول جاعدايعا جەتۋىمىز كەرەك، - دەدى دەپۋتات.

بۇعان دەيىن ءماجىلىس دەپۋتاتى ەلىمىز بيىل 10 ايدا سىرتتان 48,4 ميلليارد دوللارعا ەلەكتر ەنەرگەتيكا تاۋارىن ساتىپ العانىن ايتقان ەدى.

ايتا كەتەيىك، بۇگىن ەلوردادا ەنەرگەتيكا مينيسترلىگىنىڭ قولداۋىمەن قازاقستان ەلەكتر ماشينا جاساۋشىلار قاۋىمداستىعىنىڭ ۇيىتقى بولۋىمەن «ەلەكتر ەنەرگەتيكا سالاسىنداعى وتاندىق تاۋار وندىرۋشىلەردى مەملەكەتتىك قولداۋ شارالارى» اتتى تاقىرىپتا وتكەن دوڭگەلەك ۇستەل ءوتىپ جاتىر. ءىس-شاراعا ەنەرگەتيكا ۆيتسە- ءمينيسترى، ءماجىلىس دەپۋتاتتارى، سالا ماماندارى مەن وتاندىق ەلەكتر ەنەرگەتيكاسى تاۋار وندىرۋشىلەر قاتىسىپ جاتىر.

بۇعان دەيىن حابارلاعانىمىزداي، ەلىمىزدەگى ەلەكتر ستانسالارى مەن ەلەكتر جەلىلەرىنىڭ 70 پايىزىن جاڭعىرتۋ قاجەت، ياعني توزعان.

سونداي-اق، ءىس-شارا بارىسىندا ەلەكتر ەنەرگەتيكاسى سالاسىندا وتاندىق تاۋار وندىرۋشىلەردىڭ ۇلەسىنىڭ ازدىعى ايتىلدى.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى