قارىز الىپ، اۋىزاشار بەرۋگە بولا ما

- يسلام ءدىنىمىز ادامعا ەشقاشان قيىنشىلىقتى بۇيىرمايدى. سوندىقتان شاماسى كەلگەن ادام ساداقا مەن اۋىزاشار بەرەدى. قارىزعا باتىپ، اۋىزاشار بەرگەننەن گورى، اۋىزاشار بەرۋگە نيەت قىلىپ، ياعني كىشكەنە قۇرما نەمەسە ءبىر جۇتىم سۋدى اۋىزاشار رەتىندە بەرسە، سونىڭ ءوزى جەتكىلىكتى. وسى ارقىلى اۋىزاشاردىڭ ساۋابىن الادى، - دەدى ناۋرىزباي قاجى تاعان ۇلى.

وسى ورايدا باس ءمۇفتي شاريعات بويىنشا جايىلاتىن كەز كەلگەن داستارحاندا ىسىراپقا جول بەرىلمەيتىنىن ەسكە سالدى.

- قازىر اقپاراتتىق تەحنولوگيانىڭ دامىعان زامانى. ءبىز دە زامان ۇدەرىسىنەن بارىنشا قالىس قالماۋعا تىرىسىپ، قاسيەتتى رامازان ايى قارساڭىندا ارنايى بىرنەشە جوبانى قولعا الدىق. ناقتى ايتقاندا، MuftyatBot دەپ اتالاتىن تەلەگرام-بوتىن ىسكە قوستىق. جاڭا تەلەگرام-بوت ارقىلى جالپى ءدىني سۇراقتارعا جاۋاپ الۋعا بولادى. ياعني بۇل جوبا شاريعات ماسەلەلەرى بويىنشا اقپارات بەرۋگە جانە كەڭەس ۇسىنۋعا ارنالعان. سونىمەن قاتار، ءمۇفتيات ماماندارى وبلىس، قالا، اۋدان جانە اۋىلدىڭ، بارلىعىن ەسەپتەگەندە ەلىمىز بويىنشا 6000 ەلدى مەكەننىڭ ورازا جانە ناماز كەستەسىن جوعارى ساپادا پدف فورماتتا muftyat.kz سايتىنا جاريالادى. وزىڭىزگە قاجەتتى ءوڭىردىڭ ورازا جانە ناماز كەستەسىن سايتىمىزدان جانە تەلەگرام بوتتان جۇكتەپ الۋعا بولادى، - دەدى باس ءمۇفتي.

سونداي-اق ءمۇفتيات جانىنداعى ءدىني اقپارات بەرۋ، ياعني كولل ورتالىعى تاۋلىك بويى جۇمىس ىستەيدى. كولل ورتالىقتىڭ ءنومىرى - 87072333030.

قازاقستان مۇسىلماندارى ءدىني باسقارماسى ورتاق ءپاتۋاعا سايكەس، قاسيەتتى رامازان ايى 1-ناۋرىزدا باستالاتىنىن حابارلاپ وتىر. ناۋرىز ايىنىڭ 26 نان 27 نە قاراعان ءتۇن - قادىر ءتۇنى، ال 30-ناۋرىز - ورازا ايت مەرەكەسى.

ەلىمىزدىڭ باس ءمۇفتيى ناۋرىزباي قاجى تاعان ۇلىنىڭ توراعالىعىمەن وتكەن قازاقستان مۇسىلماندارى ءدىني باسقارماسىنىڭ ءتورالقا ماجىلىسىندە ءپىتىر ساداقاسى ەلىمىز بويىنشا ەكى كەلى ۇننىڭ ورتاشا باعاسى نەگىزىندە 655 تەڭگە بولىپ بەكىتىلدى.

بۇدان بۇرىن حابارلانعانداي، باس ءمۇفتي كاسىپكەرلەردى ازىق-تۇلىك باعاسىنا جەڭىلدىك جاساۋعا شاقىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى