قارقارالى، ۇلىتاۋ، زايسان جانە كاتونقاراعايدا اۋەجاي سالىنباق

«ۇشۋ تۇراقتىلىعىن جانە اۆياتاسىمالداردىڭ قولجەتىمدىلىگىن ارتتىرۋ ءۇشىن وتاندىق كومپانيالاردىڭ ۇشاقتار پاركى تولىقتىرىلىپ جاتىر. وسى جىلى قازاقستاندىق اۆياكومپانيالار 10 اۋە كەمەسىن ساتىپ الدى. ناتيجەسىندە ولارداعى ورىندىقتاردىڭ سانى 26 پايىزعا ءوسىپ، 15 مىڭ 200 بولدى. جالپى، 2025-جىلدىڭ سوڭىنا دەيىن قازىرگى قول قويىلعان شارتتارعا سايكەس اۋە پاركى 25 بىرلىكپەن تولىقتىرىلىپ، 124 ۇشاقتى قۇرايتىن بولادى. ونداعى ورىندار سانى 32 پايىزعا ارتادى. بورتتار سانىنىڭ ارتۋى اۆيابيلەتتەر قۇنىنىڭ جانە اۆيارەيستەردىڭ كەشىگۋ دەڭگەيىنىڭ تومەندەۋىنە ىقپال ەتەتىن بولادى. وعان قوسا، جۇك تاسىمالى سەگمەنتىن دامىتۋ ماقساتىندا 3 جاڭا جۇك اۆياتاسىمالداۋشى قۇرىلۋ ساتىسىندا»، - دەدى مارات قارابايەۆ.

ءمينيستردىڭ ايتۋىنشا، شاعىن اۆياتسيانى دامىتۋ ءۇشىن بيۋجەت قاراجاتى ەسەبىنەن بالقاش، ءۇشارال جانە ءۇرجار اۋەجايلارىنداعى ۇشۋ-قونۋ جولاقتارى جاڭعىرتىلدى جانە ءۇشارالدا جاڭا اەروۆوكزال سالىندى.

سونىمەن قاتار، از قۋاتتى اۋەجايلار جانە اتالعان اۋەجايلارعا ۇشاتىن رەيستەر مەملەكەت تاراپىنان سۋبسيديالانىپ جاتىر.

«الداعى 2-3 جىلعا ارنالعان جوسپاردا بالقاش جانە ءۇرجار اۋەجايلارىن جاڭعىرتۋدى جۇزەگە اسىرۋ، قارقارالى، ۇلىتاۋ، زايسان جانە كاتونقاراعاي اۋەجايلارىن سالۋ ماسەلەسى پىسىقتالىپ جاتىر»، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى