Qarmet باسشىلىعى كوستەنكو شاحتاسىندا ءوندىرىستى قايتا باستاۋعا تىيىم سالدى

كومپانيا باسشىلارى بۇل شەشىم قايعىلى وقيعانىڭ قايتالانۋىنا جول بەرمەۋ ءۇشىن جاسالىپ وتىرعانىن جەتكىزدى، دەپ حابارلايدى kazinform ءتىلشىسى.

Qarmet كومپانياسىنىڭ جۇمىسشى توبى شاحتاداعى جاعدايمەن تانىسۋ ءۇشىن اپات بولعان جەرگە جاقىن نۇكتەگە، 600 مەتردەن استام تەرەڭدىككە تۇسكەن.

شاحتا ديرەكتورى اندرەي بويكو نىساندا جۇرگىزىلگەن تەكسەرۋلەردىڭ قورىتىندىلارى، بولعان جاعدايدىڭ سەبەپتەرى مەن سالدارىن جويۋ بويىنشا جوسپارلانعان جۇمىستار، كومىر ءوندىرۋدى قايتا باستاۋ الەۋەتى تۋرالى باياندادى.

«اندرەي لاۆرەنتيەۆ پەن ۆاديم باسين Qarmet باسشىلىعى رەتىندە جۇرگىزىلىپ جاتقان كۇردەلى جۇمىستارعا ريزاشىلىقتارىن ءبىلدىردى، الايدا قايعىلى وقيعانىڭ قايتالانۋىنىڭ كەز كەلگەن ىقتيمال فاكتورلارى جويىلعانعا دەيىن شاحتادا ءوندىرىستى قايتا باستاۋعا تىيىم سالىندى. ولار جۇمىستاردى ورىنداۋعا باعىتتالعان بارلىق قاجەتتى قاراجات كومىر دەپارتامەنتىنىڭ ينجەنەرلەرى ءۇشىن قولجەتىمدى ەكەنىن اتاپ ءوتتى»، - دەپ جازىلعان Qarmet تەلەگرام-ارناسىندا.

ەستەرىڭىزگە سالا كەتەيىك، 28- قازان كۇنى ساعات 02:33 تە «ارسەلورميتتال تەمىرتاۋ» كومپانياسىنا تيەسىلى قاراعاندى وبلىسىنداعى كوستەنكو اتىنداعى شاحتادا جارىلىس بولدى. اپات كەزىندە شاحتادا 252 ادام بولعان، جەر بەتىنە 205 كەنشى شىعارىلدى.

كوستەنكو اتىنداعى شاحتاداعى ت ج فاكتىسى بويىنشا باس پروكۋراتۋرا قىلمىستىق تەرگەۋدى باستادى. كومپانيانىڭ مالىمەتىنشە، لاۆادا مەتان گازى جارىلعان. وقيعا ورنىندا اپاتتىق-قۇتقارۋ جۇمىستارى ۇزدىكسىز جۇرگىزىلدى.

وقيعا ورنىنا قازاقستان پرەزيدەنتى قاسىم-جومارت توقايەۆ تا باردى. پرەزيدەنت قازا تاپقان كەنشىلەردىڭ تۋىستارى مەن جاقىندارىنا شىن جۇرەكتەن كوڭىل ايتتى. مەملەكەت باسشىسى ولارعا جان-جاقتى كومەك كورسەتۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى