قارۋلى توپ سيريانىڭ تاعى ءبىر ۇلكەن قالاسىن باسىپ الدى
استانا. KAZINFORM - قارۋلى توپ سيريانىڭ ءتورتىنشى ۇلكەن قالاسى حامانى باسىپ الدى. حاما قالاسى ستراتەگيالىق ماڭىزدى ورتالىق سانالادى. سيريا ۇكىمەتىنىڭ اسكەرى قالادان شەگىنگەنىن جاريالادى.
بۇل تۋرالى Kazinform مەنشىكتى ءتىلشىسى حابارلادى.
سيريالىق كوتەرىلىسشىلەر - حايات تاحرير اش-شام توبى (قازاقستاندا تىيىم سالىنعان - اۆت.) باستاعان وپپوزيتسيالىق قارۋلى توپ بەيسەنبى كۇنى حاما قالاسىنا باسىپ كىرگەنىن حابارلادى. كەيىن وسى وقياعاعا قاتىستى ۆيدەو جاريالاندى.
ۇكىمەتكە قارسى كۇشتەر حاما پوليتسياسىنىڭ شتاب-پاتەرى مەن ءبىرقاتار اسكەري اۋەجايلاردى، سونداي-اق كورشىلەس بىرنەشە اۋىلدى باسىپ الدى. الەۋمەتتىك جەلىدە حاما ورتالىق تۇرمەسىنەن بوساتىلعان تۇتقىنداردىڭ ۆيدەوسى تاراپ كەتتى.
سيريانىڭ قورعانىس ءمينيسترى بەيسەنبى كۇنى سيريا قارۋلى كۇشتەرى ادامداردىڭ ءومىرىن ساقتاپ قالۋ ءۇشىن قايتا جۇمىلدىرىلعانىن ايتتى. ۆەدومستۆو باسشىسى سيريا قارۋلى كۇشتەرىنىڭ بولىمشەلەرىن حاما قالاسىنان تىس جەرگە كوشىرۋ ۋاقىتشا تاكتيكالىق شاراعا اينالعانىن اتاپ ءوتتى.
حامانىڭ قۇلاۋى كوتەرىلىسشىلەرگە ەلدىڭ ورتالىعىن سولتۇستىكپەن جانە جەرورتا تەڭىزىنىڭ جاعالاۋىمەن بايلانىستىراتىن ءىرى كولىك تورابىن الۋعا مۇمكىندىك بەرەدى.
بۇعان دەيىن سيريا مىڭعا جۋىق «دجەبحات ان- نۋسرا» سودىرىنىڭ جويىلعانىن حابارلادى. سيريالىق كوتەرىلىسشىلەر ماڭىزدى قالا الەپپونىڭ ورتالىق اۋداندارىن باسىپ الدى. باتىس ەلدەرى سيرياداعى شيەلەنىستى دەەسكالاتسيالاۋعا شاقىرادى.
سيريادا سوڭعى ۋاقىتتا نە بولىپ جاتقانى تۋرالى Kazinform ءتىلشىسىنىڭ شولۋ ماتەريالىنان وقۋعا بولادى.
