قارجى پيراميداسى: سالىمشىلاردىڭ 3 ميلليارد قاراجاتىن زاڭسىز يەمدەنگەن كۇدىكتى گرۋزيادان ەكستراديسيالاندى
استانا. KAZINFORM - قازاقستان رەسپۋبليكاسىنىڭ باس پروكۋراتۋراسى جانە ىشكى ىستەر مينيسترلىگىنىڭ قىزمەتكەرلەرى سىرتقى ىستەر مينيسترلىگىنىڭ كومەگىمەن قارجى پيراميداسىن قۇرعانى جانە باسقارعانى ءۇشىن قىلمىستىق جاۋاپتىلىققا تارتۋ ماقساتىندا كۇدىكتىنى گرۋزيادان ەكستراديتسيالادى. بۇل تۋرالى باس پروكۋراتۋرانىڭ باسپا ءسوز قىزمەتى مالىمدەدى.
«ونىڭ قۇرعان قىلمىستىق توبى 2020 -جىلى ماڭعىستاۋ وبلىسىندا «Plus Capital» قارجى پيراميداسىن ۇيىمداستىرىپ، 600-دەن استام سالىمشىنىڭ جالپى سوماسى 3 ميلليارد تەڭگەدەن استام اقشالاي قاراجاتىن، جىلجىمالى جانە جىلجىمايتىن مۇلىكتەرىن زاڭسىز يەمدەنگەن»، - دەلىنگەن حابارلامادا.
قىلمىستىق توپ مۇشەلەرىنىڭ ءبىر بولىگى ءتۇرلى جازا تۇرلەرىنە سوتتالدى، ال كۇدىكتى قىلمىس جاساعاننان كەيىن جاسىرىنعان، سوعان بايلانىستى حالىقارالىق ىزدەستىرۋگە جاريالاندى. 2023 -جىلعى قاراشادا ول گرۋزيا اۋماعىندا ۇستالدى.
«قازىرگى ۋاقىتتا كۇدىكتى اقتاۋ قالاسىنداعى ۋاقىتشا ۇستاۋ يزولياتورىنا قامالدى. وسى قىلمىستى جاساعانى ءۇشىن مۇلكى تاركىلەنىپ، بەلگىلى ءبىر لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان»، - دەپ حابارلادى پروكۋراتۋرا.
اۆتور
باقىتگۇل اباي قىزى
