قاراوتكەلدىڭ قىمىزى-اي! - ايازدى كۇندەرى دە بيە بايلاپ، قىمىز ساپىرىپ وتىر
استانا. قازاقپارت- قىستا دا قىمىز ۇزىلمەيدى. استانانىڭ ىرگەسىندەگى قاراوتكەل اۋىلىنداعى جۇرتشىلىق وسىنداي ايازدى كۇندەرى دە بيە بايلاپ، قىمىز ساپىرىپ وتىر. جىلقى - قازاقتىڭ جانى عوي. ال قىمىز دەرتكە شيپا، جانعا داۋا.
راس، قىمىزدى قىستا دا ىشەمىز. ءبىراق جازعا قاراعاندا ونى باپتاپ ۇستاۋدىڭ بەينەتى كوپ. وسىنداي تاۋەكەلگە بارىپ وتىرعان كىم ەكەن؟
گۇلنار ءشارىپوۆا - 40 جىلداي كۇبى ءپىسىپ، قىمىز باپتاپ كەلەدى. 60 تان اسقان انا ءالى كۇنگە 6 بيەنى ءوزى ساۋادى. قىمىز بۇل ۇيدەن قىسى-جازى ۇزىلگەن ەمەس.
گۇلنار ءشارىپوۆا، ساۋىنشى:
- كۇنىنە 6 مەزگىل ساۋامىن، تاڭەرتەڭ ءبىرىنشى ساۋىن 9 دا، 2 ساعات سايىن، سوسىن كەشكى 7 دە ساۋامىز دا، بيەلەردى اعىتامىز. كۇنىنە ءارتۇرلى بولادى. ءبىر كۇنى 1 ليتر بەرەدى، ءبىر كۇنى 5 ليتر، ءبىر كۇنى 10 ليتر بولىپ كەتەدى. اساۋ بيەلەر كەزدەسەدى، بيەدەن تاياق جەگەن كەزدەرىمىز بولدى، ال بىلاي قيىنشىلىعى جوق.
ساباداعى سارى قىمىزعا سۇرانىس مول. گۇلنار اپانىڭ ايتۋىنشا، جۇرت قىمىزدى توي-تومالاق قانا ەمەس، دەرتىنە شيپا بولسىن دەپ تە ىزدەيدى. سول سەبەپتى ءار ساۋىم سايىن كەزەك كۇتەتىن جۇرت كوپ.
ەلميرا احاتوۆا، ساتىپ الۋشى:
- بالاما ترومبوتسيتوپەنيا دەگەن دياگنوزدى قويدى. سول ءۇشىن 10 كۇن بويى ساۋمال ىشەدى. ەندى 10 كۇن ءوتىپ كەتتى. بۇگىن سوڭعى كۇن. ساۋعاننان كەيىن جىلى كۇيىندە 15 مينۋتتىڭ ىشىندە ىشەدى.
مامانداردىڭ ايتۋىنشا ساۋمال بىردەن اۋرۋمەن كۇرەسپەيدى. تەك ءسىزدىڭ يممۋندىق قورىڭىزدى كوبەيتەدى. ياعني ءسىز اۋىرعان جاعدايدا ساۋمال نە قىمىز ىشكەن كەزدە سىزدەگى جەتىسپەيتىن ۆيتاميندى تولىقتىرادى. سول كەزدە ءسىزدىڭ اعزاڭىز ەش ءدارى-دارمەكتىڭ كومەگىنسىز، ۇدايى اۋرۋمەن ءوزى كۇرەسە بەرەدى. قاراوتكەلدە قىستىڭ وزىندە بيە بايلاپ وتىرعاندار كوپ. بۇل ءبىر جاعىنان اۋىلداعى كاسىپكەرلىكتى دە دامىتىپ وتىر.
تالاپتان داۋىلتايەۆ، قاراوتكەل اۋىلدىق وكرۋگىنىڭ اكىمى:
- جۇمىسپەن قامتۋ كوبىنە جەكە كاسىپكەرلەردە. قازىر مال شارۋاشىلىعى بار. ونىڭ ۇستىنە قازىر جىلقى ۇستاپ وتىرعان 27 وتباسى بار. قىمىزدارىن ساۋىپ كۇندەلىكتى كاسىبىن اينالدىرىپ وتىر. سول كىسىلەر دە جۇمىسشىلار الادى. جۇمىسپەن كوبىنەسە كاسىپكەرلەر قامتىپ وتىر.
اكىم اۋىلدا جۇمىس تابىلاتىنىن ايتادى. تەك استانانىڭ ىرگەسىندە تۇراتىن جۇرتتىڭ كوبى تابىسى كوپ قىزمەت ىزدەيدى. ايتپەسە وسى جىلقى ۇستاپ وتىرعانداردىڭ ءوزى جۇمىس بەرۋگە ءازىر. قاراوتكەل اۋىلىندا قىستىڭ وزىندە 4 قىمىزحانا جۇمىس ىستەپ تۇر.
www.24.kz
