قاراعاندىلىق تاۋ-كەن قۇتقارۋشىلارى شاحتاداعى قاۋىپتى جاعداي تۋرالى شىندىقتى ايتتى

«ءبىز ول جەرگە ساعات 4-تە باردىق (اپات ساعات 2:33-تە بولدى - رەد.). ءبىزدى جارىلىستان كەيىنگى جاعدايدى بارلاۋعا جىبەردى. نە بولدى، جاعداي قانداي، تاعى باسقاسىن انىقتاۋعا. قاراپ جۇرگەن كەزىمىزدە ءورت وشاعىنا تاپ بولدىق. ءورت سوندىرگىش تاۋىپ الىپ، سوندىرۋگە كىرىستىك. اپاتتىق ۋچاسكەدەگى ءبىرىنشى قيىندىق ۋلى گاز تارالۋى جانە سۋدىڭ جوقتىعى بولدى. جارتى ساعات سۋ ىزدەۋمەن جۇگىردىك. بۇل - ءبىرىنشى رەت بولىپ تۇرعان جايت ەمەس، ياعني ماسەلە قازىر باقىلاۋدىڭ وسالدىعىندا»، - دەيدى ۆاديم ەسىمدى قۇتقارۋشى.

ايتۋىنشا، ولار ءبىر-ەكى ساعات كەشىككەندە كوستەنكو شاحتاسىندا تاعى ءبىر جارىلىس بولۋى مۇمكىن ەدى.

«ەگەر شاحتادا شوعىرلانعان توزاڭ جارىلعاندا ونىڭ اۋقىمى وتە ۇلكەن بولار ەدى»، - دەيدى ول.

قۇتقارۋشىلار قاۋىپتى جاعداي تۋرالى ەسكەرتۋلەردەن كەيىن شاحتاداعى ءوندىرىس توقتاتىلۋى كەرەكتىگىن ايتادى. بۇرىن سولاي بولعان، ال قازىر ۋچاسكەلەردەن بايقاپ، ءتىزىپ بەرگەن ەسكەرتۋلەردىڭ جارتىسى جوق بولىپ كەتەتىنىنە قىنجىلادى.

«ءبىزدىڭ باستاپقى مىندەتىمىز - جارىلىستىڭ الدىن الۋ. تەكسەرىپ قارايمىز، ءبارىن جازىپ بەرەمىز. ءبىراق، ەسكەرتۋلەردىڭ جارتىسى جوق بولىپ كەتەدى. نەگە؟ سەبەبى، «ارسەلور» كەلىسىمشارتتى بۇزادى دەگەن قورقىنىش بار. ءبىز - تاۋ-كەن قۇتقارۋشىلارىمىز، ءبىراق قازىر ءوزىمىزدىڭ نە ىستەپ، نە قويىپ جۇرگەنىمىزدى، كىمگە باعىناتىنىمىزدى بىلمەي قالدىق. جۇمىسىمدى قاتتى جاقسى كورەمىن، الايدا وسى جۇمىسىم ءۇشىن ۇيالاتىن كۇيگە ءتۇستىم»، - دەپ كۇيىنەدى الەكساندر گريگوريەۆ.

ولار «بار ماسەلە قۇتقارۋ قىزمەتىنىڭ جەكەشەلەنىپ كەتۋىندە» دەپ ەسەپتەيدى. سوندىقتان دا شىندىقتى اشىپ ايتۋعا بەل بۋعان.

ەسكە سالساق، 28-قازان ساعات 2:33-تە قاراعاندى وبلىسىنداعى كوستەنكو اتىنداعى شاحتادا اپات بولدى. قاراعاندى وبلىسىنىڭ اكىمى ەرماعانبەت بولەكپايەۆ الەۋمەتتىك جەلىدەگى پاراقشاسىندا حابارلاعانىنداي، اپات كەزىندە شاحتادا 252 ادام بولعان، جەر بەتىنە 205 شاحتەر شىعارىلدى.

قازاقستان پرەزيدەنتى قاسىم-جومارت توقايەۆ قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەدى. ۇكىمەتكە كەنشىلەردىڭ وتباسىلارىنا بارلىق قاجەتتى كومەك كورسەتۋدى، سونداي-اق «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى.

شاحتاداعى ءورت فاكتىسى بويىنشا قىلمىستىق كودەكستىڭ 277-بابىنىڭ 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك قاعيدالارىن بۇزۋ» بابى بويىنشا سوتقا دەيىنگى تەرگەپ-تەكسەرۋ باستالدى.

مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى. سونداي-اق، ۇكىمەت «ارسەلورميتتال تەمىرتاۋ» ا ق اكسيونەرلەرىمەن الدىن الا ۋاعدالاستىققا قول جەتكىزگەنى جانە كاسىپورىننىڭ مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ تۋرالى كەلىسىمشارتتى راسىمدەۋ اياقتالۋ ۇستىندە ەكەندىگى حابارلاندى.

مەملەكەت باسشىسى قاسىم-جومارت توقايەۆ اپاتتىڭ ءمان-جايىن انىقتاپ، ءتيىستى شەشىم قابىلداۋ ءۇشىن قاراعاندى وبلىسىنداعى قايعىلى وقيعا بولعان جەرگە باردى. قازا تاپقان كەنشىلەردىڭ وتباسىلارىمەن جانە تۋعان-تۋىستارىمەن كەزدەسىپ، كوڭىل ايتتى. اپاتتىڭ ءمان-جايىن انىقتاۋ، كەنشىلەردى قۇتقارۋ جانە زارداپ شەككەندەر مەن قازا تاپقانداردىڭ وتباسىلارىنا شۇعىل كومەك كورسەتۋگە قاجەتتى شارالار قابىلداناتىنىن جەتكىزدى. شاحتادا بولعان اپات سالدارىن جويۋ جونىندەگى جەدەل شتاب وتىرىسىن وتكىزدى. 29-قازاندى جالپىۇلتتىق ازا تۇتۋ كۇنى ەتىپ جاريالايتىن وكىمگە قول قويدى.

اۆتور

گۇلنۇر عازيز قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى