قاراعاندىداعى Qarmet كومپانياسىن جاڭعىرتۋ جوسپارى بەلگىلى بولدى
ق ر پرەمەر-ءمينيسترىنىڭ ءبىرىنشى ورىنباسارى رومان سكليار جۇمىس ساپارىمەن قاراعاندى وبلىسىنا باردى. ءوڭىر باسشىسى ەرماعانبەت بولەكپايەۆپەن بىرگە Qarmet-تى جاڭعىرتۋ جوسپارىمەن تانىستى، دەپ حابارلايدى primeminister.kz.
«قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «التىن ساپا» جانە «پارىز» لاۋرەاتتارىن ماراپاتتاۋ راسىمىندە سويلەگەن سوزىندە قاراعاندى مەتاللۋرگيا كومبيناتىنىڭ قازاقستاندىق كومپانيانىڭ مەنشىگىنە ءوتۋ ماسەلەسى ءساتتى اياقتالعانىن اتاپ ءوتتى. سونىمەن قاتار مەملەكەت باسشىسى كاسىپورىننىڭ الداعى تاعدىرى ءۇشىن Qarmet پەن ۇكىمەتتىڭ جاۋاپكەرشىلىك دارەجەسى تۋرالى ناقتى تۇسىنىك بەردى. وسى تاپسىرمانى ورىنداۋ ءۇشىن ءبىز بۇگىن دامۋدىڭ ەڭ وڭتايلى جولدارىن بىرلەسىپ زەرتتەپ جاتىرمىز»، - دەپ حابارلادى ر. سكليار.
ت. كۇزەمبايەۆ اتىنداعى شاحتادا دەلەگاتسياعا بارلىق نىساندارعا ەنگىزىلەتىن جەراستى پوزيتسيالاۋ جانە راديوبايلانىس جۇيەسى تانىستىرىلدى.
جۇيەنىڭ كومەگىمەن ديسپەتچەر شاحتا ىشىندەگى پەرسونالدىڭ ورنالاسقان جەرىن جانە قوزعالىسىن باقىلايدى.
بۇل جاعدايدى دۇرىس باعالاۋعا جانە قاجەت بولعان جاعدايدا قاجەتتى شارالاردى قابىلداۋعا مۇمكىندىك بەرەدى.
ساپار بارىسىندا Qarmet باسشىلىعى شاحتالار مەن كومبيناتتى تەحنيكالىق جاراقتاندىرۋداعى كۇردەلى پروبلەمالار، سونداي-اق زاماناۋي وندىرىستىك تەحنولوگيالاردى ەنگىزۋ پەرسپەكتيۆالارى تۋرالى باياندادى.
كەزدەسۋدى قورىتىندىلاي كەلە، رومان سكليار ق ر ۇكىمەتى تاراپىنان جوعارى سەنىم بار ەكەنىن اتاپ ءوتىپ، ونەركاسىپتىك قاۋىپسىزدىك ستاندارتتارىن ارتتىرۋ بويىنشا بارلىق قاجەتتى شارالاردى قابىلداۋدى تاپسىردى.
