قاراعاندىدا مەرت بولعان 46 شاحتەردىڭ تۋىستارىنا قانداي تولەمدەر بەرىلدى
كوستەنكو شاحتاسىندا قازا تاپقان 46 شاحتەردىڭ وتباسى ءبىرىڭعاي جيناقتاۋشى زەينەتاقى قورىنان جەرلەۋ راسىمدەرىنە ءبىرجولعى تولەم الدى.
بۇل تۋرالى قاراعاندى وبلىسىنىڭ اكىمى ەرماعانبەت بولەكپايەۆ ورتالىق كوممۋنيكاتسيالار قىزمەتىندە ايتتى، دەپ حابارلايدى Kazinform اگەنتتىگى.
وبلىس اكىمىنىڭ ايتۋىنشا، مەملەكەت تاراپىنان بارلىق قاجەتتى ماتەريالدىق قولداۋ كورسەتىلىپ جاتىر.
«بارلىق 46 وتباسى ب ج ز ق- دان جەرلەۋ جۇمىستارىنا ءبىرجولعى تولەم الدى. كامەلەتكە تولماعان بالالارى بار جانە 23 جاسقا دەيىنگى جوعارى وقۋ ورىندارىندا وقيتىن بالالارى بار 20 وتباسىنا اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى تاعايىندالدى. قازا تاپقان كەنشىلەردىڭ وتباسىلارىنا باسقا دا قولداۋلار كورسەتىلەدى»، - دەدى ەرماعانبەت بولەكپايەۆ.
اكىم «ارسەلورميتتال تەمىرتاۋ» كومپانياسى تاراپىنان 44 وتباسىنا 10 جىلدىق جالاقى تولەنگەنىن (ەكى وتباسىنىڭ شوتىنا ءالى تۇسكەن جوق) حابارلادى. قازا تاپقان كەنشىلەردىڭ، ولاردىڭ جۇبايلارىنىڭ، اتا-انالارىنىڭ، بالالارىنىڭ نەسيەلەرى وتەلدى.
سونداي-اق، كومپانيا ءار وتباسى مۇشەسىنە كەمىندە 18 شارشى مەتر الاڭ بولاتىن پاتەر ساتىپ الادى، ازىرگە 7 ءوتىنىم قابىلداندى. سونداي-اق 18 جاسقا دەيىنگى (وقۋ كەزىندە 23 جاسقا دەيىن) بالالارعا ساقتاندىرۋ تولەمدەرى بولادى .
ە. بولەكپايەۆ زارداپ شەككەندەردىڭ ءتورت شاحتەر مەديتسينالىق مەكەمەلەردە جاتقانىن، ولاردىڭ جاعدايى ورتاشا جانە جەڭىل دارەجەدە ەكەنىن جانە قاجەتتى مەديتسينالىق كومەك الىپ جاتقانىن ايتتى.
ايتا كەتەيىك، «اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايىمبەك باتالوۆ «ارسەلورميتتال تەمىرتاۋ» كومپانياسىنىڭ ورنىنا ينۆەستور بولۋعا نيەتتى كومپانيالار الەمنىڭ قاي ەلدەرىنەن حابارلاسىپ جاتقانىن ايتتى.
