قاراعاندى وبلىسىندا «سپۋتنيك ۆ» ۆاكسيناسىن شىعارعان زاۋىت نەمەن اينالىسىپ جاتىر
استانا. KAZINFORM - دەنساۋلىق ساقتاۋ ۆيتسە-ءمينيسترى - مەملەكەتتىك باس سانيتار دارىگەر ايجان ەسماعامبەتوۆا قاراعاندى وبلىسىندا «سپۋتنيك V» ۆاكسيناسىن شىعارۋ زاۋىتىنا قاتىستى سۇراققا جاۋاپ بەردى.
«بۇل زاۋىت باستاپقىدا ءدارى- دارمەك ءوندىردى، ياعني ۆاكسينا شىعارمادى. كوروناۆيرۋس كەڭىنەن تارالعان كەزەڭدە «سپۋتنيك V» ۆاكسيناسىن شىعارۋ ءۇشىن وندىرىستىك بازا قاجەت بولعانىن ەسكەرە وتىرىپ، زاۋىت وسى ۆاكسينانىڭ جەكە پارتيالارىن شىعارۋ ءۇشىن پايدالانىلدى. ۆاكسينا ءوندىرىسى اياقتالعاننان كەيىن، بۇل زاۋىت قالىپتى جۇمىسىنا قايتا ورالدى. ول ەلىمىزگە قاجەت ءدارى-دارمەكتى شىعارىپ جاتىر»، - دەدى ا. ەسماعامبەتوۆا سەناتتاعى باسپا ءسوز ءماسليحاتىندا.
سونىمەن بىرگە ول قازىر قازاقستاندا كوروناۆيرۋسقا قارسى ۆاكسينا قاي جەردە ءوندىرىلىپ جاتقانىن دا ءتۇسىندىردى.
«ەگەر كوروناۆيرۋس ينفەكسياسىنا قارسى ۆاكسينا ءوندىرىسى تۋرالى ايتاتىن بولساق، وندا OtarBioPharm زاۋىتىنىڭ ءبىرىنشى كەزەگىنىڭ قۇرىلىسى اياقتالعانىن بىلەسىزدەر. وندا ىندەتكە قارسى ۆاكسينا شىعارىلىپ جاتىر. اتاپ ايتقاندا، ونى وتاندىق عالىمدار دايارلادى»، - دەدى ۆيتسە-مينيستر.
