قاراعاندى وبلىسىندا ءىرى جوبا جۇمىسىنا كەدەرگى كەلتىرگەن باسقارما قىزمەتكەرى جاۋاپقا تارتىلدى

الايدا، جوبانى يندۋستريالاندىرۋدىڭ ءبىرىڭعاي كارتاسىنا ەنگىزۋ تۋرالى ءوتىنىم 5 اي بويى، ءار جولى جاڭا ەسكەرتۋلەرمەن كەرى قايتارىلىپ وتىرعان.

قاراعاندى وبلىسىنىڭ پروكۋراتۋراسى ينۆەستورلاردىڭ قۇقىقتارىن قورعاۋ جانە ينۆەستيتسيالىق جوبالاردى قولداۋ بويىنشا جۇمىستى جالعاستىرىپ وتىر.

بۇگىنگى تاڭدا وبلىس ەكونوميكاسىنا سالعان ينۆەستيتسياسى 219 ميلليارد تەڭگەدەن اساتىن 10 ينۆەستورعا قۇقىقتىق كومەك كورسەتىلىپ، قيىندىق تۋدىراتىن ماسەلەلەرى شەشىلدى.

ماسەلەن، «Manufacturing - United Energy Qazaqstan» ج ش س (گەرمانيا) اتالعان وڭىردە 198 ادامعا جۇمىس ورنىن بەرەتىن، جەل ەلەكتر ستانسيالارى ءۇشىن كونۋستىق مۇنارالار شىعاراتىن زاۋىت سالۋ جوباسىن جۇزەگە اسىرىپ جاتىر. ينۆەستيتسيا سوماسى - 36 ميلليارد تەڭگە. الايدا، پروكۋراتۋرا ماماندارى ينۆەستورمەن كەزدەسۋ بارىسىندا ول جەرگىلىكتى اتقارۋشى ورگاندار ءوتىنىمىن قاراۋدى سوزبالاڭعا سالىپ جۇرگەنىن مالىمدەگەن.

بۇزىلعان قۇقىقتاردى جەدەل قالپىنا كەلتىرۋگە جانە قورعاۋعا مەملەكەتتىك ورگاندار مەن بيزنەس- قوعامداستىق وكىلدەرىنىڭ قاتىساتىن فرونت- وفيس جۇمىسى ىقپال ەتەدى.

مەملەكەتتىك ىنتالاندىرۋ شارالارىن الۋ ءۇشىن يندۋستريالىق- يننوۆاتسيالىق جوبانى يندۋستريالاندىرۋدىڭ ءبىرىڭعاي كارتاسىنا ەنگىزۋ قاجەت.

ءمالىم بولعانداي، جوبانى يندۋستريالاندىرۋدىڭ ءبىرىڭعاي كارتاسىنا ەنگىزۋ تۋرالى ءوتىنىم 5 اي بويى سوزىلىپ كەلگەن. باسقارما ماماندارى ءار جولى جاڭا ەسكەرتۋ ايتىپ، قۇجاتتى قايتا قاراۋعا جىبەرىپ وتىرعان.

قاراعاندى قالاسىنىڭ ءا. بوكەيحان اۋدانىنىڭ پروكۋرورى ينۆەستور جانە مەملەكەتتىك ورگانداردىڭ وكىلدەرىمەن بىرلەسىپ، فرونت- وفيس الاڭىندا كەڭەس ۇيىمداستىردى، وندا قۇجاتتاردى دايىنداۋعا قۇقىقتىق كومەك كورسەتىلىپ، ءتيىستى تاپسىرمالار بەرىلدى.

ناتيجەسىندە ماسەلە تەز ارادا شەشىلىپ، جوبا قاجەتتى ايماقتىق ساراپتامادان ءوتىپ، يندۋستريالاندىرۋدىڭ ءبىرىڭعاي كارتاسىنا ەنگىزىلدى.

«ينۆەستوردىڭ وتىنىمدەرىن قاراۋدى سوزبالاڭعا سالۋ جانە ساپاسىز قاراۋ فاكتىسى بويىنشا قاداعالاۋ اكتىسى ەنگىزىلدى. وبلىستىڭ يندۋستريا جانە يننوۆاتسيالىق دامۋ باسقارماسىنىڭ كىنالى قىزمەتكەرى تارتىپتىك جاۋاپكەرشىلىككە تارتىلدى»، - دەلىنگەن حابارلامادا.

اۆتور

باقىتگۇل اباي قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى