«قارا بۇركىتتە» كىسى ولتىرگەندەر مەن پەدوفيلدەر جازاسىن قالاي وتەپ ءجۇر - فوتورەپورتاج

بۇل رەتتە، وسى تۇرمەدە وتىرعاندار مەن ونداعى ەرەكشە تارتىپكە قاتىستى ماتەريالدى كوپشىلىك نازارىنا ۇسىنۋدى ءجون كوردىك.

«قارا بۇركىت» اتاۋىمەن ەلگە بەلگىلى تۇرمەنىڭ رەسمي اتاۋى – ق ر ءى ءى م ق ا ج ك قوستاناي وبلىسى بويىنشا ق ا ج د «39-مەكەمە». كولونيا ءجىتىقارا قالاسىنان 45 شاقىرىم جەردە ورنالاسقان. ول 1961-جىلى جالپى رەجيمدەگى تۇزەۋ-ەڭبەك كولونياسى رەتىندە اشىلدى. ول كەزدە كولونيا اۋماعىندا بىرنەشە كاسىپورىن جۇمىس ىستەدى، ونىڭ ىشىندە تەحنيكاعا ارنالعان بولشەكتەر جاسالاتىن راديوتسەح بولدى. كەيىننەن ول ەرەكشە رەجيم تارتىبىنە اۋىستىرىلىپ، 2004-جىلى مەكەمە ءومىر بويىنا باس بوستاندىعىنان ايىرىلعانداردى قابىلدادى. قازىر «قارا بۇركىت» قازاقستانداعى «توتەنشە قاۋىپسىزدىك» مارتەبەسى بار جالعىز كولونيا.

تازالىق پەن ءتارتىپ

جابىق تارتىپتەگى وسى نىسانعا جەتۋ ءۇشىن كولىك جۇرگىزۋدەگى شەبەرلىك بولۋى كەرەك. كولونيانى وركەنيەتپەن بايلانىستىراتىن جولدىڭ جاعدايى ناشار، ياعني تاس جولمەن ءجيى جۇرەتىن اۋىر جۇك كولىكتەرى اسفالت بەتىن شۇڭقىرعا اينالدىردى.

جالپى، كولونيا جەرگىلىكتى ايماق جانە شارۋاشىلىق ۋچاسكەسى دەپ ەكىگە بولىنگەن. نەگىزگى اۋماقتا ءومىر بويىنا باس بوستاندىعىنان ايىرىلعاندار جازاسىن وتەپ جاتىر. سوڭعى مالىمەتتەرگە قاراعاندا، ولاردىڭ سانى 200 گە جۋىق.

تۇرمەدەگى باسقا دا اۋماقتىڭ تازالىعىن، سونداي-اق تاماق ازىرلەۋگە سوتتالعان شارۋاشىلىق قىزمەتكەرلەرى جۇمىلدىرىلعان. شارۋاشىلىق قىزمەتتەگى وسى سوتتالعانداردىڭ سانى 60 قا جۋىق.

ولارعا اسحانا، ناۋبايحانا، سپورت الاڭى، دەمالىس بولمەلەرى بولىنگەن.

سونداي-اق وندا كىتاپحانا بار، ءارتۇرلى سالاداعى 3000 نان استام كىتاپ جيناقتالعان. بارلىق ادەبيەتتەر مىندەتتى تۇردە تەكسەرىلەدى جانە تىيىم سالىنعان كىتاپتار مەكەمە اۋماعىنا وتكىزىلمەيدى.

تۇرمە اۋماعىنداعى عيمارات پەن اۋلاعا جاقسى كۇتىم جاسالاتىنى بايقالىپ تۇر.

كولونياعا سىرتتان كەلگەن ادامدار مىندەتتى تۇردە تەكسەرۋ ايماعىنان ءوتۋى كەرەك. مۇندا ءبارى قاتاڭ - ەرەجەمەن مىندەتتى تۇردە تانىسۋ ەسكەرىلگەن، ونىڭ ىشىندە تىيىم سالىنعان زاتتاردى اكەلگەندەردىڭ جاۋاپكەرشىلىگى تۋرالى ەسكەرتۋ جاسالادى. قۇجاتتاردى تولتىرعاننان كەيىن، جاۋاپتى قىزمەتكەر تەكسەرەدى. كەنەتتەن قاۋىپ تونگەن جاعدايدا قۇتقارۋ ءۇشىن بارلىق كەلگەن ادامعا ارنايى تۇيمەسى بار پۋلت بەرىلەدى.

ءومىر بويىنا باس بوستاندىعىنان ايىرىلعاندار

ءومىر بويىنا باس بوستاندىعىنان ايىرۋ جازاسىنا كەسىلگەندەرگە قاتىستى جاعداي مۇلدەم باسقاشا. سوتتالعاندار جازاسىن ادەتتە بىرنەشە ادامنان تۇراتىن كامەرالاردا وتەيدى (ەڭ كوبى ءتورت ادامعا دەيىن).

ولارعا كامەرادان شىعۋعا تىيىم سالىنعان. تەك دۋشقا بارعان كەزدە (اپتاسىنا ەكى رەت)، مەديتسينالىق جانە تاربيەلىك ءىس-شارالارعا قاتىسۋعا، سونداي-اق سەرۋەندەۋگە جانە تۋىستارىمەن كەزدەسۋ كەزىندە عانا كامەرادان شىعۋعا رۇقسات ەتىلەدى. وقۋعا كەرەك كىتاپتاردى الۋعا بولادى.

سوتتالعان ادامنىڭ دارەجەسىنە قاراي (جاعىمدى مىنەز-قۇلىقتىڭ ءۇش دارەجەسى بار: ءبىرىنشى، ەكىنشى جانە ءۇشىنشى، سوندا-اق جازانى وتەۋ شارتتارىن بۇزعانى ءۇشىن بەرىلەتىن جاعىمسىز مىنەز-قۇلىقتىڭ ءۇش دارەجەسى: ءبىرىنشى، ەكىنشى، ءۇشىنشى)، سالەمدەمەلەردى الىپ، جاقىندارىمەن كەزدەسۋلەرگە رۇقسات بەرىلەدى.

بىلتىر شىلدە ايىنان باستاپ ۇزاقمەرزىمدى كەزدەسۋ رۇقسات ەتىلىپ، قالىپتى جانە جەڭىلدەتىلگەن جاعدايدا سوتتالعاندارعا ارنالعان. ول ءۇشىن ارنايى بولمە جابدىقتالدى. ۇزاقمەرزىمدى كەزدەسۋگە تەك جاقىن تۋىستارعا عانا جىبەرىلەدى جانە جىلىنا ەكى رەتكە دەيىن رۇقسات بەرىلگەن.

جازاسىن وتەۋدىڭ جەڭىل جاعدايى قاراستىرىلسا، وندا كۇنىنە ءبىر رەت 1,5 ساعاتقا دەيىن سەرۋەندەۋگە بولادى (قاتاڭ جاعدايدا وتىرعاندارعا ءبىر ساعات قانا بەرىلەدى).

سەرۋەن كەزىندە كوك اسپاندى تەمىر توردان عانا تاماشالاي الاتىن ارنايى اۋلاعا شىعارىلادى. وندا دا ولار قىزمەتكەرلەردىڭ باقىلاۋىندا بولادى.

عيماراتتان مەديتسينالىق بولىمشەگە بارعاننىڭ وزىندە سوتتالعان ادام ارنايى كوزىلدىرىك تاعادى، ياعني بۇل ارەكەت ولار ءوزىنىڭ بارعان جولىن بىلمەس ءۇشىن جاسالادى.

ءومىر بويىنا باس بوستاندىعىنان ايىرىلعاندارعا تاماق كۇنىنە بىرنەشە رەت جەتكىزىلەدى. ولارمەن تىكەلەي بايلانىس جوق.

بۇل ءادىس مەكەمە قىزمەتكەرلەرىنىڭ قاۋىپسىزدىگى ءۇشىن قولدانىلادى. تاماقتاندىرۋ جۇمىستارىن «ەڭبەك» ر م ك فيليالى جۇزەگە اسىرادى. ولارعا ادەتتە بوتقا، جۇمىرتقا، جەمىس-جيدەك جانە كوجە بەرەدى. ءار بەيسەنبى سايىن بالىقتان جاسالعان تاعام تاراتىلادى.

جالپى، ءبىر سوتتالعانعا كۇنىنە 5 مىڭ تەڭگەگە جۋىق قارجى جۇمسالادى (4780 تەڭگە). بۇل سوماعا ازىق-تۇلىك، كيىم-كەشەك پەن كەرەك-جاراقتار، كوممۋنالدىق شىعىندار كىرەدى.

«قارا بۇركىت» اۋماعىندا ءومىر بويىنا باس بوستاندىعىنان ايىرىلعاندار جۇمىس ىستەي الاتىن تىگىن سەحى العاش رەت اشىلدى. جوبا 2021-جىلدىڭ قاراشاسىندا ىسكە قوسىلدى.

بۇگىندە وندا ەكى كاسىپورىن جۇمىس ىستەپ تۇر. ولاردىڭ ءارقايسىسى جۇمىس كيىمدەرىن، ماتراستار جانە باسقا دا زاتتاردى الادى. كەز كەلگەن سوتتالعان ادام تىگىن ماشيناسىنا وتىرا المايدى، ياعني تىڭعىلىقتى ىرىكتەۋدەن وتەدى. قازىر وندا 20 دان استام ادام جالاقىسىن الىپ ءجۇر.

وندىرىستە جۇمىس ىستەپ جۇرگەن سوتتالعان ا. ەسىمدى ادام كىسى ولتىرگەنى ءۇشىن جازاسىن وتەپ جۇرگەنىن ايتتى. ول تىگىنشىلىكتى باستاپقىدا بىلمەسە دە، كەيىننەن وسى مەكەمەدە ۇيرەنگەن.

«جۇمىس كۇنى ستاندارت بويىنشا باستالادى. ءبىز اۋىسىمدى تاڭعى 9 دا باستايمىز. سەح ىسكە قوسىلعان العاشقى كۇننەن باستاپ جۇمىس ىستەپ كەلەمىن. باستاپقىدا ءبىز ەشتەڭە بىلمەدىك، ءبىراق بىرتە-بىرتە تاجىريبە جيناقتادىق. ادەتتە، تاپسىرىسپەن تىگەمىز»، - دەپ ءتۇسىندىردى ول.

جۇمىس ورىندارىنىڭ ەنگىزىلۋىنىڭ ارقاسىندا سوتتالعاندار ءىستى بولعانداعى تالاپ-ارىزدى وتەۋگە (ەگەر ولار ۇكىم بويىنشا بار بولسا)، سونداي-اق جاقىندارىنا ماتەريالدىق كومەك كورسەتۋگە مۇمكىندىك الدى.

جاڭا كورپۋس سالىنۋى مۇمكىن

Kazinform اگەنتتىگىنىڭ ءتىلشىسى اتالمىش مەكەمە باسشىسىنىڭ مىندەتىن اتقارۋشى اسحات قانافيندى اڭگىمەگە تارتىپ، ودان وسى كولونيا اتاۋىنىڭ شىعۋ تەگى تۋرالى سۇرادى.

«ونىڭ بىرنەشە نۇسقاسى بار. ءبىرىنشى وقيعا بويىنشا جارالانعان قارا بۇركىت كولونيا اۋماعىنا قۇلاعان. سوتتالعاندار وعان كۇتىم جاساپ، كەيىن ۇشىرىپ جىبەرگەن. ەكىنشى نۇسقادا بۇل قۇستاردىڭ وسى وڭىردە كوپتەپ كەزدەسۋى سەبەپ بولدى دەپ ايتىلىپ ءجۇر»، - دەدى باسشىنىڭ مىندەتىن اتقارۋشى.

كولونيانىڭ جەكە «كوممۋنالدىق قىزمەتى» بار - سۋ مۇناراسى مەن كارىز جۇيەسى جاساقتالعان. بۇرىن ونەركاسىپتىك كەشەن دە بولسا، قازىر تەحنيكا جوندەيتىن گاراج جانە ەلەكتر سەحى عانا جۇمىس ىستەپ تۇر.

«قازىر وسىندا ءوز جازاسىن شارۋاشىلىق قىزمەتتە وتەپ جۇرگەندەر بولعاندىقتان، ونەركاسىپ ايماعى كەرەك ەمەس. ولار جۇمىسقا ورنالاسقان جانە باسقا قىزمەت تۇرلەرىنە تارتىلمايدى»، - دەپ ءتۇسىندىردى ا. قانافين.

تۇرمەنى ورنالاستىرۋ جەرى رەتىندە قوستاناي وبلىسىنىڭ جازىعىن تاڭداۋ كەزدەيسوق ەمەس. مۇندا بىرنەشە فاكتور بار، ياعني ەلدى مەكەندەردەن قاشىقتا ورنالاسۋى مەن اۋماقتى شولعىنداۋدىڭ جەڭىلدىگى سەبەپ بولدى. مەكەمە جازىقتا ورنالاسقان - مۇندا نازاردان تىس قالۋ مۇمكىن ەمەس.

ءومىر بويىنا باس بوستاندىعىنان ايىرىلعاندار بىرنەشە كورپۋستا جازاسىن وتەپ جاتىر. سونىمەن قاتار، ءومىر بويىنا باس بوستاندىعىنان ايىرىلعانداردى ورنالاستىرۋ ءۇشىن 140 ورىندىق ليميتى بار تاعى ءۇش قاباتتى عيمارات سالۋ جوسپارلانعان. قازىرگى كەزدە جوبا پىسىقتالىپ جاتىر جانە ودان ءارى ىسكە اسىرۋ ساتىسىندا.

اتاپ ايتقاندا، كولونيادا مەديتسينالىق كومەكتى تاۋلىكتىڭ كەز كەلگەن ۋاقىتىندا الۋعا بولادى.

2020-جىلدىڭ تامىز ايىندا «قارا بۇركىت» تۇرمەسىنىڭ باسشىسى پارا العانى ءۇشىن ۇستالدى.

وسىدان كەيىن سىبايلاس جەمقورلىق تاۋەكەلدەرىنىڭ الدىن الۋ جۇمىستارى كۇشەيتىلدى.

«قازىر انتيكوردان، ق ا ج دەپارتامەنتىنەن مامانداردى شاقىرىپ، تاربيە جۇمىستارىن جۇرگىزىپ جاتىرمىز. جاۋاپكەرشىلىك تۋرالى ايتىپ، تانىمدىق بەينەروليكتەر كورسەتەمىز. تەكسەرۋ كۇشەيتىلدى - تىيىم سالىنعان زاتتاردى وتكىزبەۋ ماقساتىندا قىزمەتكەرلەر دە تەكسەرىلەدى»، - دەدى سپيكەر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى